Tui lăi pơthâo, ngă tui hơdră bruă “500 hrơi mlăm” hyu ĕp, pơƀut glăi hăng pơsit brơi anăn apăn tơlang tơleh tơhan djai pơsăn drơi aka ƀu hơmâo tơlơi pơhing hơget, truh ră anai đơ đam dêh čar hơmâo ĕp pơƀut glăi 1.080 per tơlang tơleh. Ding jum kông ang hơmâo pel ĕp, sem lăng, pơlăng nao rai tơlơi pơhing kơ hơdôm rơtuh rơbâo tơlang tơleh tơhan aka ƀu djop tơlơi pơhing; pơphun pơčrang lăng ADN ƀơi hơdôm boh ƀon lan hăng pơsit ĕp brơi anăp kơ 23 čô. Kơnuk kơna hơmâo ba tơbiă akŏ bruă pơphun hơdôm bruă pioh hơdor glăi 80 thun hrơi tơhna rơka-tơhan djai pơsăn drơi; pơjing akŏ bruă hăng abih tih prăk mă yua giăm 13.000 klai prăk ngă tui bruă pioh hơdor tơngia, bơwih brơi mơnuih djru hơkrŭ.

Đĭ pơhiăp pơđut mông jơnum, kơ-iăng Khua dêh čar yă Phạm Thị Thanh Trà lăi pơtong, tal hơdor glăi 80 hrơi hrơi tơhan rơka-tơhan djai pơsăn drơi lĕ bruă kơđi čar, gru grua him klă gưl dêh čar; anai lĕ hrơi kiăng Ping gah, abh bang mơnuih ƀôn sang, ling tơhan, pioh hơdor tơngia, pơpŭ kơ pran tuh rơyuh prong prin mơng ƀing mơnuih djru hơkrŭ brơi kơ lŏn ia ta. Kơ-iăng Khua dêh čar rơkâo pơphun hơdôm bruă pioh hơdor pơhlôm yôm phă, sit nik, hiam klă, dưi ngă lar hyu; pơlir hăng bruă bơwih brơi klă ƀiă tơlơi hơdip mơda kơ sang anŏ tơhan djai pơsăn drơi, tơhan rơka, tơhan ruă kă hăng mơnuih djru hơkrŭ.