Rơkơi bơnai bơn amai Trương Thị Tuyết Vân, dŏ ƀơi ƀut plơi Từ Nham, phường Sông Cầu, tong ten hăng bruă mă rông hơdang grông mơtah rơbêh 15 thun hăng anai ƀơi kual ia rơsĭ Hòn Mắm. Amai Vân brơi thâo, mơ̆ng hrơi phrâo pơphun mă bruă, aka ƀu hơmâo djơ̆ ôh tơlơi truh kơtang kah hăng kơthel Kalmaegi tal 13 thun anai ngă. Abih bang 60 gruh rông hơdang hăng 1.500 drơi kơdang grông truh hrơi sĭ mơdrô hăng 3000 drơi ană hơdang ngă djuai kơthel puh pơđuăi abih ƀhiao, lu gruh čơnăng rông hơdang truh ră anai ĕp aka ƀu ƀuh mơ̆n. Rơnoh prăk hơdôm rơtuh klăk čan mơ̆ng sang bruă prăk pioh tuh pơ alin kơ bruă rông hơdang anai, dŏ tơguan bơyan mă hơdang kah sĭ tla hnưh, ră anai hơgĕt hơmâo dơ̆ng, kơthel puh pơđuăi abih laih.

“Anŏ răm rai kơtang đơi, yua kơ gruh čơnăng pơkra pơtlep hrŏm hăng hơdôm gruh sang anŏ pơkŏn, samơ̆ ia pơđung đuăi abih laih, lơ̆m anun sang anŏ dŏ dong hnưh truh 500 klăk prăk mơ̆ng sang bruă prăk kơnuk kơna, pioh tuh pơ alin kơ bruă rông hơdang, ƀiă truh blan tla glăi hnưh čan laih. Rơkơi bơnai gơmơi čang rơmang kơnuk kơna djru ba, pơhrơ̆i hnưh kiăng tuh pơ alin rông phrâo dơ̆ng, đah mơ̆ng hơmâo prăk tla kơñ pơgi. Juăt rông djuai hơdang grông mơtah laih, tơdah ƀu rông hơgĕt či ngă dơ̆ng. Ƀing gơmơi ăt rơkâo sang bruă prăk djru pơhrơ̆i brơi hnưh, pơhrŏ ƀiă kơmlai čan laih anun tơdah dưi čan dơ̆ng tuh pơ alin kơ bruă mă hnun kah mơ̆ng hơmâo prăk tla hnưh”.

Yă Nguyễn Thị Sáu, dŏ ƀơi plơi Phú Mỹ, phường Sông Cầu, ăt aka ƀu abih ôh tơlơi bral hơngal tơdơi kơ kơthel ngă. Rơbêh 120 gruh rông 2000 drơi hơdang grông mơtah truh hrơi sĭ laih, ia kor đuăi ƀhiao, čơnăng rông hơdang člah člap, tơ̆i răm abih, ngă kơ hơdang tơbiă đuăi hĭ, rơngiă soh sel. Yă Sáu ol kơdol pran jua brơi thâo, djơ̆ biă gơ̆ plah wah blan 11 anai amra mă ba nao sĭ yơh, hlong tla prăk čan 1 klai 500 klăk prăk,  mơ̆ng sang bruă prăk kơnuk kơna, samơ̆ kơthel pưh rai, ia kor abih laih.

“Răm rai aka ƀu thâo hơdôm pă ôh, samơ̆ sang anŏ gơmơi jŭ yap rơngiă abih ha mơkrah laih mrô hơdang rông anun. Hơdang anai, pơmin lĕ 6-7 hrơi dơ̆ng truh mông mă ba sĭ yơh laih anun mă prăk tla hnưh sang bruă prăk kơnuk kơna, samơ̆ kơthel pưh rai, kor đuăi pôt baih. Hơdang rơngiă, mơnuih ăt djai tui mơ̆n anai. Sang anŏ gơmơi čang rơmang sang bruă prăk pơhrơ̆i brơi hnưh, lŏm hĭ prăk kơmlai kiăng dưi čan prăk tuh pơ alin glăi dơ̆ng, đah mơ̆ng hơmâo prăk tla hnưh”.

Ter hang ia rơsĭ phường Sông Cầu jing anih rông hơdang phun mơtam ƀơi tơring čar Phú Yên hơđăp, ră anai tơring čar Dak Lak, hăng djuai hơdang rông lĕ hơdang prong, grông mơtah, rông akan lăi aka čim djuai akan tih, aka mŭ….kơnong ƀơi bul pơtâo Hòn Mắm, Vũng Chao ră anai hơmâo rơbêh 92.800 čơnang, gruh rông akan hơdang, lu biă mă ñu rông hơdang grông mơtah năng nai 720 boh sang anŏ rông.

Ơi Huỳnh Đình Quang, Kơ-iăng khua Jơnum min mơnuih ƀôn sang phường Sông Cầu lăi, tơlơi pơhing kơthel 13 anăn Kalmaegi pưh rai ƀơi plơi pla anai, jua rơbŭ kơtang biă mă, mah ƀu ngă sat kơ mơnuih samơ̆ ñu pioh glăi anŏ răm ƀăm kơtang biă mă tơlơi bơwih ƀong huă, boh nik ñu hăng lu sang anŏ rông akan hơdang amăng ia rơsĭ. Ră anai, jơnum min mơnuih ƀôn sang phường hlăk jŭ yap glăi, ĕp lăng anŏ răm ƀăm hăng ngă hră rơkâo đĭ hăng djop sang bruă kơnuk kơna, kiăng hơmâo hơdră pok pơhai djru ba mơnuih ƀôn sang. Ơi Huỳnh Đình Quang brơi thâo:

“Rông akan hơdang lăi hrŏm hăng bruă rông hơdang grông mơtah hnun mơ̆n, răm rai prong biă mă tal anai. Ƀing gơmơi glăk jŭ yap glăi, anŏ răm ƀăm, rim hrơi kiăng hơmâo kơnôl lăi pơthâo hăng sang bruă prăk brơi čan prăk, rơkâo gơñu pơhlưh hĭ prăk kơmlai laih anun pơhrơ̆i thim thun blan tla prăk čan, djru brơi mơnuih ƀôn sang dưi čan dơ̆ng. hrŏm hăng anun, ƀing gơmơi čih anăn rơđah rơđong, tum teč rơkâo Jơnum min mơnuih ƀôn sang tơring čar Dak Lak mă yua prăk pơkrem pioh amăng keh prăk kơnuk kơna, kiăng djru ba ƀing hơmâo  tơlơi truh sat lŏn adai ngă hơmâo sa črăn thâo, brơi mơnuih ƀôn sang hơmâo tơlơi truh anun dưi čan tŭ”.

Kiăng djru ba lu sang anŏ mơnuih ƀôn sang rông akan hơdang, djop sang bruă, grup brơi čan prăk mơ̆ng kơnuk kơna ƀơi phường Sông Cầu, ngă gêh găl brơi rơbêh 600 čô mơnuih dưi čan prăk tuh pơ alin kơ bruă mă, sĭ mơdrô. Kơnong kơ sang bruă prăk gah đang hmua Agribank ƀơi Sông Cầu-Phú Yên hơmâo 300 čô mơnuih čan hăng abih tih 150 klai prăk. Ơi Hoàng Vũ Phi Phong, Khua sang bruă prăk pơ anai lăi, sang bruă gơñu hlăk ngă hrŏm lu sang bruă kơnuk kơna kiăng pok pơhai ngă tui lu hơdră djru ba ƀing čan prăk tañ rŭ glăi bruă mă. Ơi Phong ơi pơčrâo rơđah mơ̆n, jơlan hơdră či ngă tui djru kơ ƀing čan prăk, bưp tơlơi truh sat yua kơthel 13 ngă phrâo anai:

“Hăng hơdôm sang anŏ ƀu hơmâo anŏ či pơphun glăi bruă mă, ƀing gơmơi amra ngă tui hơdră pơhrơ̆i hĭ hnưh dŏ dong tui tơlơi phiăn sang bruă prăk kơnuk kơna pơkă. Hơdôm ƀing čan prăk aka djơ̆ anăn pơhrơ̆i hnưh, ƀing gơmơi brơi čan dơ̆ng, ƀudah jŭ yap glăi rơnoh prăk dong hnưh, brơi tla ƀơƀrư̆ prăk hăng kơmlai, kiăng gơñu hơmâo thun blan ƀiă rŭ glăi bruă mă, sĭ mơdrô. Hrŏm hăng anun, ƀing gơmơi ngă tui jơlan hơdră djru pơhrŏ hĭ prăk kơmlai čan kiăng mơnuih ƀôn sang plai ƀiă prăk kơmlai đah mơ̆ng rŭ glăi bruă rông akan hơdang”.

Bruă pok pơhai hmao kru tui jơlan hơdră kơnuk kơna djru ba rơnoh prăk kơmlai kah hăng tơlơi phiăn pơkă, phrơ̆i hnưh, pơhrŏ kơmlai čan prăk, kiăng pơtrut pran jua mơnuih ƀôn sang, dưi čan glăi dơ̆ng amăng kual mơ̆ kơthel pưh nao răm ƀăm kơtang đah mơ̆ng hrưn đĭ amăng tơlơi hơdip mơda. Bruă ngă hrŏm mơ̆ng gong gai kơnuk kơna hăng sang bruă prăk brơi čan ƀu kơnong djru mơnuih ƀôn sang plai ƀiă tơnap đôč ôh, dŏ ngă anŏ gêh găl, kah hăng pran kơtang djru brơi mơnuih ƀôn sang tuh pơ alin glăi, rŭ glăi bruă rông akan hơdang ƀing gơñu. Rĭm kơ čơnăng, gruh rông hơdang dưi pơkra glăi, pơsir dơ̆ng bruă rông hơdang, đah mơ̆ng ba glăi tơlơi čang rơmang phrâo amăng bơyan rông akan hơdang rơnuk rơnua hơđong hloh, kiăng mơnuih ƀôn sang trơi pơđao yâo mơak.