Ơi Nguyễn Đức Lực, mơnuih man pơdong sang ƀơi să Ia Ko, tơring čar Gia Lai hlăk man pơdong brơi 10 boh sang kơ sang anŏ ƀun rin hăng rơnoh 60 klăk prăk sa boh sang. Lu sang ñu hlăk man pơdong ƀiă či giong yơh samơ̆ ñu tŭ mă prăk tla kơ ñu aset đôč, tŭ kơ hơmâo jăng jai. Ơi Nguyễn Đức Lực kah pơpha, bruă pơsir sang tơ̆i kơ mơnuih ƀôn sang lĕ jơlan hơdră prong, anun ñu ƀu pơmin nao ôh, hơmâo kơmlai ƀiădah lup, ƀiă ƀudah lu:

“Abih bang ană plơi pla gum tơngan hrŏm pơdong sang, lui sang tơ̆i, sang răm kơ mơnuih ƀun rin, ƀuh tui anun ta ăt gum hrŏm đôč. Ta mă yua ƀiă prăk tuh pơ alin man pơdong hlâo, pioh blơi gơnam yua man pơdong sang laih anun tla tui ƀơƀrư̆. Ta amra pơjing bruă mă, ngă gêh găl kơ mơnuih ƀôn sang pô mơtam ngă hrŏm lŭk simăng, čuah, pơdŭ pơtâo, ƀrik; apah gơñu mă bruă ta pơ sang pĕ kơphê, jah rơ̆k kiăng pơhlưh hĭ hnưh prăk apah tui hơdôm thun blan. Gơñu tla tui ƀơƀrư̆ amra abih yơh”.

Jĕ giăm hăng plơi pla, gum hrŏm lu mơnuih tơnap tap, Viettel Kon Tum lu thun laih rơgao hur har biă mă ngă hrŏm bruă bơwih bơwăng brơi tơlơi hơdip mơda mơnuih mơnam, biă mă ñu tơlơi jak iâu ngă hrŏm lŏm lui sang tơ̆i, sang phŏ sa jơlan hơdră prong pơdah rai tơlơi khăp pap dơlăm biă mă yua Khua dêh čar pô pơphun. Ơi Diệp Trung Kiên, Kơ-iăng khua anom bruă Viettel Kon Tum hơđăp kah pơpha:

“Ngă tui tơlơi jak iâu, amăng thun 2025, Viettel Kon Tum hơmâo rơkâo hăng anom bruă pơdlông Group Viettel kiăng djru 5 klai prăk ngă tui jơlan hơdră lŏm lui sang tơ̆i, sang phŏ laih anun pơsir sang dŏ hiam klă ƀiă kơ mơnuih ƀôn sang tơnap tap ƀun rin amăng tơring čar”.

Hơdôm sang bruă mơdrô ngă hrŏm glăm ba tong ten hăng jơlan hơdră lŏm lui sang tơ̆i, sang phŏ, anŏ pơtrut pran jua kiăng gơgrong ba hrŏm amăng glông bruă kơđi čar djop tơring čar amăng kual Dap Kơdư jai hrơi kơtang tui. Mah kiăng jŭ yap pơsir akŏ klôn tơlơi  dŏ pơmin lăng, kơƀah prăk hăng bruă ngă hră pơar yua lŏn tơnah či pơdong sang dŏ phrâo, lui sang tơ̆i, samơ̆ tơring čar Gia Lai hăng Dak Lak lêng kơ jŭ yap glăi tong ten laih anun rim boh tơring čar lêng kơ hơmâo akŏ bruă brơi lŏm lui sang tơ̆i rơbêh 8.100 boh sang. Mrô rơnoh ƀu aset ôh, bruă mă ăt prong mơ̆n, djơ̆ amăng hrơi mông pơblih sang bruă, pơmut nao rai lu sang bruă kơnuk kơna, djop sang tơring čar ăt gir run khut khăt pok pơhai ngă tui jơlan hơdră anai, pơhrui ngăn rơnoh mơ̆ng dêh čar truh pơ kual plơi pla djru hrŏm. Siu Trung, Kơ-iăng khua  Jơnum min djop djuai ania mơnuih mơnam Việt Nam, tơring čar Gia Lai brơi thâo:

“Khul git gai ngă tui bruă lŏm lui sang tơ̆i tơring čar hơmâo čih hră mơ-it iâu pơthưr djop sang bruă sĭ mơdrô, mơnuih ƀôn sang amăng tơring čar hăng gah rơngiao tơring čar ngă hrŏm pơčruh ngăn rơnoh mơ̆ng dêh čar djru ba. Mơ̆ng anun, kiăng ngă giong tơhnal pơkă laih anun hơmâo thim rơnoh prăk ngă giong jơlan hơdră. Hơdôm tơring kual plơi pla hơmâo ĕp mă prăk, hmao man pơdong sang kơ mơnuih tơnap tap. Hrŏm hăng anun, ƀing tơhan blah ngă ăt dưi iâu pơhrui, pơčruh hrŏm kiăng pơhlom brơi bruă man pơdong hmao hrơi blan pơkă”.

Yap mơ̆ng lơ 1/7, gong gai kơnuk kơna 2 gưl mă bruă sit nik laih, djop tơring čar Dak Lak, Gia Lai, lâm Đồng lêng kơ jŭ yap glăi abih jơlan hơdră lŏm lui sang tơ̆i, pơdong sang phrâo, pơtong rơđah hơmâo anăn giăm 20 rơbâo boh sang hăng rơbêh 1.900 boh sang dŏ gun hĭ hră pơar. Djop să, phường phrâo arăng jao ngă bruă khut khăt, pơkă hrơi blan tum teč kiăng man pơdong, ngă giong sang jao brơi kơ mơnuih ƀôn sang tŭ mă tui jơlan hơdră djru lŏm lui sang tơ̆i, sang phŏ djơ̆ thun blan pơčah.

Yă Nguyễn Thị Hồng Hạnh, Khua anom bruă bơwih ƀong huă să Čuôr Dăng, tơring čar Dak Lak brơi thâo, amăng thun 2025, đơ đam sang hơmâo 31 boh sang kiăng djru ba man pơdong sang phrâo, samơ̆ lêng kơ gun hĭ bruă ngă hră pơar, hră yua lŏn hăng hră man pơdong. Lơ̆m pơblih jing gong gai kơnuk kơna 2 gưl laih anun dưi jao brơi bruă glăm ba tum teč, rơđah rơđong kơ Jơlan jơlan hơdră lŏm lui sang tơ̆i, sang phŏ hơmâo pơphun ngă tui dik dăk djop črăn bruă jao kơ ta ngă:

“Tơlơi tơnap prong hloh ră anai mơ̆ng mơnuih ƀôn sang lĕ yua amĭ ama, adơi ayong brơi lŏn sang ƀudah tŭ mă kông ngăn pioh glăi samơ̆ aka ƀu čih anăn, pơčlah hĭ lŏn sang anun jing glông pioh pơdong sang; đơ đa hơmâo mơ̆n lŏn, jing lŏn ngă hmua aka pơblih jing lŏn pơdong sang ôh anun aka ƀu dưi pơdong brơi sang. Yua kơ anun, ƀing gơmơi djru ngă brơi hră pơblih hơdră yua lŏn hlâo, giong anun pơčlah brơi anăn pô yua lŏn kah hăng tŭ mă tơlơi jao glăi, blơi glăi hnun kah čih anăn găl kơ pô tŭ mă pơblih hơdră yua lŏn dưi pơdong sang dŏ. Hăng hơdră ngă hră pơar man pơdong lĕ, ƀing apăn bruă amăng să, ngă brơi hră pơar, čih rơnoh duh jia pơdjơ̆ nao man pơdong sang mơnuih ƀôn sang jăng jai aka ƀu mă jia ôh”.

Hơdôm tơlơi gir run mơ̆ng gong gai kơnuk kơna, mơnuih ƀôn sang hăng sang bruă mơdrô, jơlan hơdră lŏm lui sang tơ̆i, sang phŏ ƀơi kual Dap Kơdư hơmâo pok pơhai sa amăng plĕ. Khua git gai ping gah djop tơring čar pô ngă khua khul pơčrâo bruă, kiăng pơhlom brơi bruă mă pơtum sa pran jua, pơsir abih tơlơi dŏ gun, tơnap tap, pơtrut bruă ngă hmar hloh, djơ̆ hrơi blan pơkă kơ jơlan hơdră hơmâo pơkă. Ơi Nguyễn Đình Trung, ding kơna apăn bruă ping gah dêh čar, Khua git gai ping gah tơring čar Dak Lak lăi, ƀơi anŏ ñu hơmâo lŏn đang samơ̆ djơ̆ lŏn ngă hmua ƀudah lŏn pô pơkŏn čih anăn amăng kơnung djuai. Hăng tơlơi tŭ ư hrŏm mơ̆ng dlông trun pơyŭ laih anun tơlơi pơčrâo ba hmao kru, hơdôm tơlơi gun ăt hơmâo pơsir hĭ laih mơ̆n:

“Khul git gai ping gah tơring čar đing nao biă mă kơ tơlơi anai. Lăng nao kơ tơlơi hơmâo sit nik amăng plơi pla, ping gah tơring čar hơmâo akŏ pơjing khul grup pơčrâo bruă man pơdong sang kơ mơnuih ƀun rin hăng hơdôm sang anŏ hơmâo anăn kơnuk kơna djru. Tơring čar hơmâo pơčrâo bruă Jơnum min mơnuih ƀôn sang tơring čar, djop sang bruă ngă tui khut khăt jơlan hơdră anai, ngă hiư̆m pă ba glăi boh tŭ yua, pơhlom djơ̆ hrơi blan, djơ̆ pô tŭ mă”.

Rim bơbung sang phrâo lăng kơjăp hơđong hlăk tơbiă đĭ amăng plơi pla ala ƀôn amăng kual Dap Kơdư, ƀu kơnong djru ba mơnuih ƀôn sang hơđong anih dŏ đôč ôh, dŏ pơbŭ đĭ tơlơi đăo kơnang kơtang hloh amăng jơlan hơdră tơpă hơnơ̆ng mơ̆ng kơnuk kơna hăng tơring čar, jing pran jua mơ̆ng tơhan kông an, ling tơhan, gong gai kơnuk kơna plơi pla, sang bruă mơdrô hăng mơnuih ƀôn sang pơdjru hrŏm man pơdong brơi.