Ƀơi anih man pơdong kual tuh tia pơkra ming Hòa Tâm hăng tơdrun Bãi Gốc, tơring čar Dak Lak, hơdôm hơpluh boh rơdêh pơdŭ pơgiăng, rơdêh čuk hrŏm hăng gơnam măi mok glăk ječ ameč čuk pơƀut lŏn brơi ñu dơng dơ̆, pok jơlan ngă bruă. Tơdơi kơ tal pơphun bruă pơhrui glăi lŏn mơnai, kual tuh tia pơkra ming Hòa Tâm hơmâo pơgiong bruă brơi yua apah rơbêh 215 ektar lŏn. Ơi Đỗ Văn Khánh, kơ-iăng Khua kông ti pơčruih ngăn tuh pơ alin hăng pơđĭ kyar anih anom kual tuh tia pơkra ming Hòa Tâm brơi thâo, kơnong tơdrun Bãi Gốc, đơ đam 64,9 ektar lŏn mơnai hơmâo jao, ngă gêh gal kiăng akŏ bruă pok pơhai hơdôm anih man pơkra phun amăng blan 9 pơ anăp. “Khua apăn akŏ ăt hơmâo git gai khua mua Jơnum min tơring čar hơmâo akŏ pơjing grup mă bruă hơdeč hmar brơi kơ bruă pơhrua glăi lŏn mơnai kar hăng phrâo anai ăt ngă khut khăt. Ƀuăn akŏ blan 9 amra pok pơhai, pơhlôm brơi djop tơlơi gal kơ tơhnal pơkă hăng lŏn mơnai kiăng anom bruă man pơdong pok pơhai ngă bruă”.

Sa ring bruă pơphun man pơkra lĕ hrơi mông ngăn rơnoh ba pơmut amăng tơlơi bơwih ƀong huă. Anai lĕ tơlơi pơkă yôm phăn lơm hơdôm boh ƀon lan ba tơbiă hơnong pơkă pơđĭ kyar dua mrô. Amăng Jơnum pơsur tuh pơ alin thun 2026, Gia Lai hơmâo abih tih prăk či yua hăng him lăng giăm 850.000 klai prăk mơng 273 akŏ bruă. Bơ tơring čar Dak Lak ăt hơmâo jao tơlơi pơsit tŭ yap tơlơi črâo trun tuh pơ alin brơi 25 akŏ bruă, abih tih prăk mă yua rơbêh 40.000 klai prăk. Hơdôm mrô jŭ yap anai brơi ƀuh tơlơi pơhưč mơng anih pơđĭ kyar phrâo. Samơ̆ mrô prăk čih anăn mă yua hăng ƀuăn anai lĕ tơlơi pok pơphun. Khua Jơnum min mơnuih ƀon sang tơring čar Dak Lak Đỗ Hữu Huy brơi thâo, tơring čar hơmâo akŏ pơjing grup kiăo tui lăng, djru ngă tui hơdôm akŏ bruă tơdơi kơ pơsur tuh pơ alin. “Kiăng ječ ameč pơgiong hơdôm akŏ bruă pok pơhai hơdôm tơlơi pơtrun, tơlơi črâo trun tuh pơ alin, hră pơsit tuh pơ alin hăng abih bang hră pơ-ar pioh hơdor ngă hrŏm hơmâo jao amăng mông jơnum. Grup kiăo tui lăng kiăng tŏ tui pok pơhai mơtăm akŏ bruă kiăng ngă tui bruă pơpha tơlơi pơsit akŏ pơjing Grup. Pơpha tong ten mơnuih, tong ten bruă, tong ten hrơi mông, tong ten tơlơi glăm ba hăng tong ten rĭm akŏ bruă truh hrơi akŏ bruă sit nik dưi ngă bruă. Anăm brơi anom bruă tuh pơ alin ngă hơjăn lơm ngă tui bruă anai”.

Samơ̆, ba ngăn rơnoh mut amăng ring bruă aka ƀu djơ̆ bruă rơnuč ôh. Pơđĭ kyar ăt gơnong nao bruă pơmut hăng mă yua klă ngăn rơnoh. Sa akŏ bruă mah hơmâo prăk tuh pơ alin lu samơ̆ kơƀah lŏn mơnai, ngă hră pơ-ar, gơnam yua ƀudah anih anom pơlir hơbit ăt aka ƀu ba glăi rơnoh yôm. Yua anun, hrŏm hăng bruă pơhưč tuh pơ alin, djop ƀon lan kiăng ječ ameč ngă tui tơlơi črâo trun tơl ring bruă, mơng ring bruă truh pơ bruă bơwih ƀong hăng sĭ mơdrô. Tui kơ-iăng Khua Jơnum min mơnuih ƀon sang tơring čar Lâm Đồng Nguyễn Ngọc Phúc, hơdôm ngăn rơnoh kiăng hơmâo tơlơi pơlir jing hơdôm glông rơnoh ngă hrŏm tong ten: “Lâm Đồng hơmâo lu tơlơi dưi kơ bruă ngă hmua mă yua boh thâo phrâo, pơkra gơnam đang hmua, apui lơtrik phrâo. Bruă yôm hloh lĕ kiăng pơlir hơdôm ngăn rơnoh jing hơdôm glông rơnoh ngă hrŏm tong ten, pơjing rai gơnam phrâo, măi mok phrâo, jơlan gah bơwih ƀong phrâo, ba glăi rơnoh yôm sit nik brơi mơnuih ƀôn sang, anom bruă sĭ mơdrô hăng tơlơi bơwih ƀong mơng tơring čar dưi pơđĭ kyar dua mrô, hrưn đĭ mrô bơkơtưn gưl tơring čar.”

Tui anun, bruă ngă pơhưč tuh pơ alin ƀu djơ̆ kơnong lĕ tơlơi pơplông kơ mrô prăk tuh pơ alin đôč ôh mơ̆ ăt lĕ bruă ruah mă yua prăk tuh pơ alin lăp djơ̆, ba glăi pơhrui đĭ tui hăng ngă lar hyu. Ƀơi Khánh Hòa, tơdơi kơ pơmut hrŏm hăng Ninh Thuận, tơring čar hơmâo hang ia rơsĭ glông giăm 500 km, hrŏm hăng tơdrun kompăn hăng hơdôm anih anom logistics hơmâo dưm dăp. Ơi Trương Văn Tiến, Khua anom bruă pơsur tuh pơ alin, sĭ mơdrô hăng tuai čuă ngui tơring čar Khánh Hòa brơi thâo, bruă kiăng ngă lĕ tơkuh nao rai jơlan glông kiăng pơdŭ pơgiăng gơnam mơng kual Dap kơdư hăng Dơnung tong krah. “Kiăng ngă hiưm pă dưi mă yua klă hloh hơdôm tơdrun kompăn hluai tui bruă tơkuh nao rai hăng kual hơmâo lu gơnam ƀơi Dơnung Dap kơdư. Ngă hiưm pă kiăng jak iâu hơdôm anom bruă tuh pơ alin ba nao rơdêh pơdŭ pơgiăng gơnam, logistics, ngă gêh gal hloh brơi hơdôm anom bruă sĭ mơdrô. Mơng anun, pơjing rai sa anih phun pơdŭ pơgiăng gơnam tam prong hloh.”

Hăng kual Dap kơdư-Dơnung tong krah, pok phư ngăn rơnoh yua anun ƀu djơ̆ kơnong lĕ bruă pơhưč tuh pơ alin. Anai lĕ tơlơi rơkâo ba tơlơi črâo trun, hơdră bruă jing ngăn rơnoh pơđĭ kyar, pơjing ngăn rơnoh jing bruă mă, gơnam tam, prăk pơhrui hăng pran bơkơtưn amăng tơlơi bơwih ƀong huă. Hăng anai ăt lĕ tơlơi mơ̆ mơnuih ƀôn sang čang rơmang kiăng ƀuh amăng rĭm tơlơi pơtrun: Hơdră bruă kiăng mut amăng tơlơi hơdip mơda, ngăn rơnoh kiăng pok phư, kiăng jing boh than pơđĭ kyar sit nik./.