Blung hlâo, lăi nao tuh pơ alin pơđĭ kyar bruă pơtô hrăm pơ kual tơnap tap, ơi Nguyễn Đại Thắng, grup khua pơ ala mơ̆ng Hưng Yên rơkâo tui anai:“Kâo kiăng pơhrua tui tơlơi pơkă phrâo amăng Črăn tơlơi 19 “Kơnuk kơna kiăng prăp rơmet brơi bruă tuh pơ alin ƀơ̆i hlâo, laih anun hơmâo hơdră djru kơ hodôm boh sang hră pơ kual tơnap, plơi pla ataih yaih, amăng asuek, guai dêh čar, bul pơtâo ia rơsĭ hăng plơi pla djuai ania ƀiă amăng mông pơplih boh thâo mrô; pơhlôm bơkơnar hoduah ĕp, mă yua boh thâo mrô gah pơtô pơjuăt”. Tui anun amra pơtrut tui boh tŭ yua amăng bruă ngă, ăt kah hăng bơkơnar amăng bruă mă yua boh thâo ia rơgơi amăng hơdôm boh sang hră”.

Kơ tơlơi phiăn čih pơkra glăi, pơhrua tui hơdôm tơlơi mơ̆ng Tơlơi phiăn pơtô hrăm, tơlơi lăp đing nao lĕ tơlơi pơkă čih pơkra glăi, pơhrua tui kiăo tui Kơnuk kơna brơi sa hơdrôm hră pơtô hrăm mă yua hrŏm amăng đơ đam dêh čar mơtăm. Yă Nguyễn Thị Mai Thoa, Grup pơ ala mơ̆ng Hưng Yên lăi:“Grup čih pơkra hơdrôm hră khŏm ruah mă tơlơi klă hloh tŭ yua hloh amăng hơdôm hơdrôm hră či dưm dăp pơkra jing hơdrôm hră pơtô hrăm phrâo hơmâo tơlơi pơplih, dăp glăi lăp djơ̆, hnun kah hơdrôm hră mơ̆ng klă, tŭ yua hloh, huăi hơmâo tơlơi soh glăi, aka ƀu djơ̆ đơi mơ̆ng hơdôm hơdrôm hră hlâo adih, mă yua hơdrôm hră anai či pok pơhai boh tơhnal hơmâo amăng jơlan hơdră pơtô hrăm”.

Lơ̆m anun, hơdôm čô khua dŏ pơmin nao mơn tơlơi kiăng mơ̆ng thun 2026 hơmâo 1 hơdrôm hră mă yua hrŏm jing bruă hăt đơi mơn. Hăng tơlơi pơgôp hiăp mơ̆ng ƀing khua pơ ala, Khua ding jum pơtô hăng pơjuăt ơi Nguyễn Kim Sơn brơi thâo:“Bruă anai Ding jum čih pơkra akŏ bruă laih. Amăng akŏ bruă hơmâo hơdră ngă bruă, laih anun amra tơña kơ Khua git gai Ping gah, pơdah pơ Khua dêh čar kĭ brơi. Ding jum gir tañ hloh lĕ blan 11 amra hơmâo hơdră ngă bruă sit nik hăng lăi pơthâo glăi. Kâo pơmin hmao mơn”.

Tơlơi yom phun amăng tơlơi phiăn pơtô hrăm čih pơkra glăi lĕ akŏ pơjing anih pơtô hrăm dêh čar pok, hrăm đĭ tui amăng ƀrư̆, pơhrua tui hơbô̆ bruă hrăm bruă mă, brơi čơđai ƀrô hrăm giong gưl 3, ƀrô hơmâo pơtô hrăm bruă hlao mơtăm, ngă hră pơ-ar amuñ ƀiă hăng bruă lui hĭ ƀang gưl 2 laih anun jao tơlơi dưi kĭ brơi ƀang 12 mơ̆ng Khua gơnong bruă pơtô hăng pơjuăt jao glăi kơ Khua sang hră dong...

Yă Nguyễn Thị Việt Nga, khua mơ̆ng Hải Phòng lăi pơthâo tơlơi hơmâo sit amăng jơlan hơdră pơtô hrăm ră anai kơtang đơi, anun yơh jing hrăm apah, yua dah nai pơtô ƀu dưi pơtô brơi djŏp tơlơi hrăm pơ sang hră ôh, yua ƀu djŏp mông. Lơ̆m anun, čơđai ñu ƀu thâo đơi ôh tơlơi hơdip hơmâo gah rơngiao:“Rơngiao kơ hơdrôm hră pơtô lĕ tơlơi hơmâo amăng jơlan hơdră pơtô ăt yom biă. Ƀing nai pơtô toán lăi čơđai ñu dưi pơkra ƀai phương trình, bất phương trình, samơ̆ nao pơ sang čơ kiăng gơñu jŭ yap prăk či blơi añăm, blơi akan lĕ sư̆ rơbư̆. Tơlơi thâo amăng tơlơi hơdip mơda gah rơngiao mơ̆ng ƀing čơđai tơdu biă. Anun kiăng lơ̆m dăp glăi jơlan hơdră pơtô, pơkra sa hơdrôm hră khŏm lăp đing nao kơ tơlơi anai”.

Bơkơtuai ƀơi grup, ƀing khua ăt tŭ ư hăng ư lui brơi ƀang hrăm gưl 2, kơnong pơsit brơi amăng hră čih anăn hrăm giong laih gưl 2, yua khua sang hră kĭ. Tơlơi pơkă anai lăp djơ̆ hăng hrơi mông kơnuk kơna kiăng abih bang mơnuih hrăm hră đoi đom ñu truh gưl 2, ngă hră pơ-ar amuñ, plai ƀiă ngă tơnap brơi čơđai pơplông lu./.