Jơlan nao pơ sang ơi Hồ Phình, thun anai ñu 47 thun, dŏ pơ plơi Kè, să Lâm Hóa, tơring glông Tuyên Hóa čun čue, đĭ kơdư trun đung găn rơgao hơdôm boh čư̆ kơdư. Hlâo adih, sang anŏ ơi Phình ư̆ rơya rơpa mơhao na nao đôč. Sang anŏ hơmâo 6 čô mơnuih samơ̆ kơnong 2 ar hmua đôč pioh pla pơjing hăng 1 ar ngă hmua pơdai, djơ̆ thun hơmâo, djơ̆ thun rơngiă soh sel, abih bang amăng sang anŏ ñu tơguan kơ tơlơi djru mơ̆ng kơnuk kơna.

Ƀu tŭ tơlơi tơnap tap ƀun rin na nao djơh hăng anun, ơi Hồ Phình hơduah ĕp lu hơbô̆ bră ngă tui pơđĭ kyar bơwih ƀong huă. Mơ̆ng rơnoh prăk arăng djru brơi čan hăng kơmlai ƀiă mơ̆ng Sang bruă prăk kơnuk kơna djru mơnuih mơnam tơnap, ñu blơi rơmo, un hăng pơjeh phun pla pioh pla kyâo amăng glai hăng kiă rơmô hlô mơnong. Rơgao hơdôm thun pơkom pioh, pok prong tui bruă ngă, sang anŏ ơi Hồ Phình dưi hơmâo 5 ha glai rưng, rông lu rơmô, kơbao, un mơnŭ.

Ñu dŏ ngă hmua pơdai, pla kơtor..., hơpuă yuă pơdai kơtor rĭm thun djop ƀong huă laih anun čem rông un bui mơnŭ, tơlơi bơwih ƀong sang anŏ ñu đĭ tui ƀơ ƀrư̆ ƀuh ba mơtam:

“Ăt dŏ mơ̆n tơlơi tơnap tap samơ̆ khom gir run baih lah, mă bruă kiăng đĭ kyar tui. Mah dŏ ƀun rin samơ̆ tă lĕ, pơkă hăng lu sang anŏ pơkŏn jing đĭ đăi gŏ amŏ. Čih hră rơkâo tơbiă anăn sang anŏ ƀun rin, ƀun rin ƀiă kiăng ping gah hăng kơnuk kơna ta djru ba kơ sang anŏ pơkŏn tơnap tap hloh. Hơdôm sang anŏ tơnap tap biă mă lĕ, ta djru ba, aka ƀu thâo bơwih ƀong huă ngă đang hmua ta pơtô brơi hơdră ngă hmua pla pơjing”.

Ơi Hồ Phình lĕ sa amăng hơdôm čô mơnuih djuai ania Mã Liềng blung a dưi mut ping gah laih anun ñu mơ̆n mơnuih blung a ƀơi să Lâm Hóa čih hră rơkâo tơbiă anăn sang anŏ ƀun rin. Hră ñu rơkâo anun, hơmâo anih arăng djru ba kơ mơnuih tơnap tap hloh laih anun sa tơlơi pơtrut pran jua mơnuih ƀôn sang Mã Liềng hla tui pioh gir run pơklaih mơ̆ng ƀun rin.

Yă Cao Thị Vân, Khua plơi Kè, să Lâm Hoá, tơring glông Tuyên Hóa brơi thâo, kiăng jak iâu mơnuih ƀôn sang Mã Liềng pơđĭ kyar bơwih ƀong huă lĕ, ƀing mơnuih ping gah yơh pô ngă hlâo, sang anŏ gơñu khom pơklaih mơ̆ng ư̆ rơpa, tơlơi gơñu pơhiăp nao hrom bruă mă hnun kah ană plơi pla đăo kơnang. Hrom hăng pơđĭ kyar bơwih ƀong huă sang anŏ, ơi Hồ Phình dŏ nao tơl sang amăng plơi, pơtô brơi hơdră čem rông hlô mơnong hăng pla kyâo glai, djru pơjeh phun pla, djuai hlô mơnong rông kơ ană plơi pla.

"Ayong Hồ Phình hơmâo nao tơl djop sang pơtô lăi, pơtrut ană plơi pla, tơdah hơmâo tơlơi hơgĕt kơƀah ñu djru brơi tui hăng anŏ gêh găl mơ̆ng ñu. Kiăng jak iâu ană plơi pla pơ anai lĕ amăng ta pơtô, tơngan ta pơčrâo bruă mơtam hnun kah arăng thâo hluh. Thun blan rơgao Ping gah hăng kơnuk kơna djru, đing nao lu kơ mơnuih ƀôn sang, anun yơh ră anai ƀrư̆ hrơi tơlơi hơdip mơda đĭ kyar, hơmâo sang dŏ klă, jơlan glông nao rai hiam, hơmâo apui lơtrik laih anun hơmâo sang hră amăng plơi mơtam”.

Să Lâm Hoá hơmâo 150 boh sang anŏ hăng 650 čô mơnuih lêng kơ djuai ania Mã Liềng, sa čơƀeng djuai ania Čưt. Ơi Đinh Văn Bắc, Kơ-iăng Khua git gai ping gah să Lâm Hoá, tơring glông Tuyên Hóa, tơring čar Quảng Bình brơi thâo, plơi Kè ră anai hơmâo 10 čô mơnuih ping gah, amăng anun 7 čô mơnuih djuai ania Mã Liềng. Jing sa čô mơnuih ngă kơ-iăng khua git gai ping gah plơi, ơi Hồ Phình hrom hăng mơnuih ping gah amăng plơi ba gru hlâo na nao amăng bruă mă pơtrut ană plơi pla, ngă tui djơ̆ jơlan hơdră mơ̆ng ping gah, tơlơi phiăn kơnuk kơna, pơtrut ană plơi pla bơwih ƀong huă pơđĭ kyar sang anŏ, kiăng lui rơmŏn kŏn rin.

Tui hăng ơi Đinh Văn Bắc, ơi Hồ Phình arăng jŭ yap sang anŏ mơnuih ngă hmua rơgơi gưl să 5 thun na nao mơtam. Thun hlâo, ñu lĕ mơnuih ping gah ngă giong bruă jao klă hloh.

“Hăng tơlơi gơgrong ba, ba jơlan hlâo, pơmin mă gir run tơgŭ mă bruă sa čô mơnuih ping gah hơmâo pơdah thâo djơ̆ lăp tơlơi gơgrong ba, jak iâu mơnuih ƀôn sang pơđĭ kyar bơwih ƀong huă, pơgang tơlơi rơnuk rơnua plơi pla dêh čar. Tơlơi hơdip mơda pơblih phrâo lu, biă mă ñu mơnuih ƀôn sang thâo hluh gir run mă bruă pran jua hrưn đĭ bơwih ƀong huă sang anŏ”.

Ơi Bùi Thanh Chuyên, Kơ-iăng Khua git gai ping gah tơring glông Tuyên Hóa, tơring čar Quảng Bình brơi thâo, đơ đam tơring glông hơmâo 44 čô mơnuih ping gah lĕ mơnuih djuai ƀiă. Anai lĕ ƀing ngă bruă phun amăng bruă pơtô lăi, pôr pơthâo brơi jơlan hơdră mơ̆ng ping gah, tơlơi phiăn kơnuk kơna ta, pơtrut bruă mă pơđĭ kyar bơwih ƀong huă mơnuih mơnam, djă pioh gru grua hiam djuai ania amăng djop plơi pla treng jơlan guai dêh čar. Tui hăng ơi Bùi Thanh Chuyên, thun blan pơ anăp, tơring glông ăt pơđĭ kyar dơ̆ng mơ̆n mrô mơnuih ping gah jing djuai ƀiă, akŏ pơjing khul ngă bruă mơnuih ba gru hlâo, hơmâo tơlơi bơngač prong hloh:

“Thun blan pơ anăp, Khua mua apăn bruă git gai ping gah tơring glông ăt đing nao djru ba kiăng pơđĭ kyar ping gah amăng kual plơi pla mơnuih djuai ƀiă jai hrơi lu hloh, kiăng ƀing anun jing phun aliăng, asar pơjeh ngă anih ưh kơnang, mơnuih ba gru hlâo kơsung nao pơ anăp pơtô lăi, pơtrut ană plơi pla ngă tui klă jơlan hơdră ping gah, tơlơi phiăn kơnuk kơna”.

Bruă pơmut mơnuih djuai ƀiă hur har mut ping gah ƀơi tơring glông kual čư̆ siăng Tuyên Hoá, tơring čar Quảng Bình lĕ bruă mă kơđi čar yôm phun. Mơ̆ng anun, kiăng pơđĭ tui boh tŭ yua phun amăng kual plơi pla mơnuih djuai ƀiă dŏ.