Tơlơi čih mrô 1: https://vov4.vov.vn/jarai/cran-hodra-konuk-kona-hang-hodip-moda-chinh-sach-va-cuoc-song/lom-lui-sang-do-toi-pho-nga-kjap-pran-dao-konang-boi-hodom-boh-ploi-pla-kual-dap-kodu-492299.vov4 

Tơlơi čih mrô 2: https://vov4.vov.vn/jarai/cran-hodra-konuk-kona-hang-hodip-moda-chinh-sach-va-cuoc-song/pohuc-kotang-toloi-khap-ano-kiang-hang-brua-djru-ba-mong-jolan-hodra-lom-lui-sang-toi-492454.vov4

Amăng sang phrâo prong 60 met karê, ayong Y Lô Ksor, djuai ania Êđê dŏ amăng ƀuôn Hiao, să Ea H’leo, tơring čar Dak Lak ƀu hơgŏ ôh tơlơi hok mơ-ak, Ayong Y Lô brơi thâo, sang anŏ hơmâo lu ană, amĭ ñu tha rơbêh 80 thun laih, hlâo adih sang anŏ ñu hơdip hrŏm amăng sa boh sang tơ̆i, hơjan ia tơdjoh, angĭn thut, amĭ ñu juăt dju djuam duam ruă. Sang anŏ kơnong gơnang nao đang hơbơi plum, pơhrui đa hơmâo đa ƀŭ. Phrâo anai, hơmâo kông ang tơring čar djru brơi 80 klăk prăk, ñu čan pơhrua dong 40 klăk prăk man pơdong sang phrâo. Mơng hrơi hơmâo sang sir kjăp, amĭ ñu plai ƀiă duam ruă, ană bă hơdip mơ-ak, bơ ñu hơđong pran yua bơwih ƀong. Ră anai ayong Y Lô čang rơmang dưi mut hrŏm grup wai pơgang plơi pla, kiăng gum hrŏm hyu tir amăng plơi pla, pơgôp wai pơgang rơnuk rơnua amăng mơmŏt mlăm.

“Sang anŏ tơnap tap, hơmâo 8 čô mơnuih dŏ hơdip amăng sang tơ̆i, kơniă dong, hơjan ia tơdjoh, pơ-iă uh hang. Lŏn ngă hmua anet đôč, hăng kơčong čư̆ yua anun ƀu dưi pla phun kyâo boh troh. Hơmâo Ping gah, Kơnuk kơna hăng Ding jum kông ang djru man pơdong sang phrâo, sang anŏ gơmơi hok mơ-ak biă. Ră anai dŏ kơnong gir run bơwih ƀong, čem rông ană bă hrăm hră, gum hrŏm djru pơđĭ kyar plơi pla”.

Ăt kar hăng hơdôm boh sang anŏ pơkŏn amăng plơi pla ƀơi kual Dap kơdư, amai H’Bui Đing, djuai ania Êđê dŏ amăng ƀuôn Zia, să Hòa Sơn, tơring čar Dak Lak, ƀu hơgŏm ôh pran ol kơdol lơm đĭ dŏ sang phrâo rơhaih giăm 40 met karê, nua ñu 80 klăk prăk. Ñu brơi thâo, sang anŏ ñu ƀun rin, čem rông 4 čô ană bă hăng amĭ ama tha dong, sang anŏ rĭm thun bơwih ƀong glêh glar hăng 1-2 ar hmua krô kreñ, ƀu dưi pla kơphê ƀudah tiu. Tơlơi hơdip tơnap tap, asơi huă añăm ƀong ƀiă ƀu hơmâo, bruă man pơdong sang ñu aka ƀu pơmĭn nao ôh. Amai H’Bui ol kơdol brơi thâo:

“Sang anŏ gơmơi tơnap tap biă mă, ăt ƀu dưi lăi nao abih tơlơi glêh glar, tơlơi hơdip rĭm hrơi gơnang nao mă bruă arăng apah. Sang dŏ hơjan ia tơdjoh, hơdip jang jai đôč. Hmua hăng kơčong čư̆, kơnong 1-2 ar lŏn krô kreñ. Ƀing apăn bruă hơmâo djru man pơdong sang, sang anŏ hok mơ-ak biă. Bơni kơ Ping gah, Kơnuk kơna hăng Ding jum kông ang, djop gưl, gơnong bruă ƀon lan. Hơmâo sang dŏ, ƀing gơmơi amra đing nao bơwih ƀong huă, čem rông ană bă hrăm hră”.

Anun ƀơi hơdôm boh tơring čar kual Dap kơdư, ră anai lĕ wŏt ƀơi kual Dơnung tong krah, bruă amăng ha mơkrah thun kiăng ngă tui bruă pơsir hĭ tơlơi gun ngă hră pơ-ar lŏn mơnai, jak iâu pơgôp prăk kak, mơnuih mă bruă kiăng man pơdong rơbêh 20 rơbâo boh sang, anai lĕ bruă jao aka ƀu hơmâo ôh hlâo anun. Samơ̆ bruă ngă truh kih jơlan hơdră, ăt ba glăi tơlơi găn rơgao yôm phăn amăng ƀon lan kiăng hơmâo pran đăo gơnang tŏ tui pok pơhai truh kih hơdôm bruă jao pơprong amăng rơwang phrâo.

Đại tá Nguyễn Văn Dũng, kơ-iăng Khua kông ang tơring čar Lâm Đồng brơi thâo kơ hơdôm tơlơi gir run mơng tơhan kông ang amăng bruă ngă tui “bruă jao hrŏm”-pơhlôm rơnuk rơnua amang ƀon lan rah, jak iâu abih bang mơnuih, rơdêh măi mok kiăng mut hrŏm djru mơnuih ƀôn sang man pơdong sang. Hăng pran jua khut khăt amăng tơlơi git gai hăng tơlơi mut hrŏm ha amăng plĕ mơng djop tơhan, mah bruă mă lu hiưm pă ăt hơmâo pơgiong amăng ƀiă hrơi.

“Bruă pok pơhai anai Khul git gai ngă tui khut khăt. Sit biă ñu, 5 čô khua mua hơmâo Khua phun hăng 4 kơ-iăng khua lêng lĕ khua grup, ƀing gơñu pơtrut pơsur tơhan amăng hơdôm grup kiăng djru pok pơhai man pơdong sang brơi mơnuih ƀôn sang. Laih dong, rơkâo tơlơi mut hrŏm mơng djop anih anom; amăng anun, git gai kông ang hơdôm boh să, phường pơphô bruă brơi Jơnum min mơnuih ƀôn sang hơdôm boh să jak iâu djop anih anom kơđi čar, djop plơi pla, ƀon lan hăng mơnuih amăng sang anŏ hăng kơnung djuai djru brơi, bruă gum tơngan hrŏm anai kiăng ruh pơkra glăi sang dŏ jang jai”.

Amăng hơdôm hrơi prap lui pơmut hrŏm tơring čar, să hăng prap lui bruă mă mơng gong gai dua gưl, kah hăng rơwang ngă bruă rơnuč amăng jơlan hơdră ruh pơkra glăi sang dŏ jang jai, Khua git gai Ping gah dêh čar ơi Tô Lâm hơmâo nao čuă hăng mă bruă tom sa, dua boh tơring čar ƀơi kual Dap kơdư. Khua git gai Ping gah dêh čar črâo ba hăng git gai tong ten: Pơjing Ping gah pơlir hăng bruă wai pơgang rơnuk rơnua-hơđong hăng pơđĭ kyar bơwih ƀong huă-mơnuih mơnam hơđong kjăp. Hăng jơlan hơdră ruh pơkra glăi sang dŏ jang jai, sang tơ̆i phŏ mơ̆ hơdôm boh tơring čar glăk ječ ameč ngă tui, Khua git gai Ping gah pơsit tong, anai lĕ hơdôm ring bruă djru mơnuih mơnam rah, hăng lĕ ring bruă ba glăi pran đăo gơnang, yua anun kual Dap kơdư kiăng gir run:

“Man pơdong sang brơi neh met wa dŏ, ƀing gơñu hok mơ-ak biă mă. Tơlơi hơdip kơ mơnuih ƀôn sang jai hrưn đĭ, tơlơi anai pơhlôm brơi bruă wai pơgang rơnuk rơnua. Mơnuih ƀôn sang jai đăo gơnang nao Ping gah, Kơnuk kơna, ha pran tui Ping gah, ba glăi tơlơi gum pơgôp djuai ania, pran gum pơgôp mơnuih ƀôn sang jai hrơi hrưn đĭ. Hơnong pơkă anun lĕ kiăng ngă tui klă”.

Blan tơjuh pioh hơdor tơngia, blan 8 hơdor tal ngă hơkrŭ truh kih, blan 9 hur har mơ-ak pioh hơdor glăi 80 thun akŏ pơjing kơnuk kơna…hăng djop plơi pla ƀơi kual Dap kơdư phrâo hơmâo rơbêh 2 rơbăn boh sang phrâo brơi hơdôm hrơi ngă yang prong anai. Amăng hơdôm boh sang phrâo mơng ƀing gơñu, neh met wa ƀơi kual Dap kơdư jai đăo gơnang hrŏm hăng đơ đam dêh čar yak nao rơwang dưm dăp glăi plơi pla lŏn ia, yak nao rơnuk hrưn đĭ mơng pô kiăng pơđĭ kyar. /.