Khua git gai pơ ala mơnuih ƀôn sang dêh čar ơi Trần Thanh Mẫn lăi rơđah: anai lĕ mông jơnum blung a amăng thun 2025, pơphun amăng tơlơi đơ đam dêh čar mơ-ak Ping gah, mơ-ak Bơyan bơnga hăng pơphun hơdôm bruă mă mơ-ak Tết tui phiăn juăt Ất Tỵ, hơdor glăi 95 thun Hrơi pơdŏng Ping gah Cộng sản Việt Nam. Hrŏm hăng anun, Khua pơ ala mơnuih ƀôn sang hăng Khul pơ ala mơnuih ƀôn sang hơdôm gưl pơphun hơdôm bruă mă hơdor glăi 79 thun Hrơi ruah khua blung a Khua pơ ala mơnuih ƀôn sang dêh čar Việt Nam. Lăi rơđah bruă mă amăng thun 2025 lĕ prong biă, Khua git gai pơ ala mơnuih ƀôn sang dêh čar lăi rơđah, amăng 3 blan akô̆ thun anai đing nao pơphun Tal jơnum ƀu hmâo pơkă hlâo lok 9:

“Ƀing ta khom đing nao, run pran kơ Tal jơnum ƀu hmâo pơkă hlâo amăng rơnuč blan 2. Tal jơnum anai Khua pơ ala amra jơnum ƀu yap hrơi mông mơ̆ pơmin ngă hiưm hơpă ngă giong kiăng pel ĕp pơkra hơdôm tơlơi phiăn, tơlơi pơtrun pơsit mơ̆ng Khua pơ ala mơnuih ƀôn sang djru kơ bruă Klah čun Tơlơi pơtrun pơsit 18 kơ ngă rơguăt glông bruă, djơ̆ bruă, tŭ yua, ba glăi bôh tơhnal amăng hơdôm hrơi pơ̆ anăp”.

Jơnum min apăn bruă Khua pơ ala mơnuih ƀôn sang dêh čar hmâo pel ĕp lăi pơthâo glăi bruă mơnuih ƀôn sang kiăng mơ̆ng Khua pơ ala mơnuih ƀôn sang blan 12/2024. Khua Grŭp wai lăng bruă čang rơmang mơ̆ng mơnuih ƀôn sang Dương Thanh Bình brơi thâo: Mơnuih pơ ala kơ mơnuih ƀôn sang hăng mơnuih ƀôn sang tŭ ư hrŏm črâo ba ngă tui dong Tơlơi pơtrun pơsit mrô 18 kơ dưm dăp ngă rơbô̆t bruă mă amăng glông bruă kơđi čar. Mơnuih pơ ala mơnuih ƀôn sang hăng mơnuih ƀôn sang čang rơmang tañ hmâo sa glông bruă mă hơdôm bôh ƀirô Ping gah, Kơnuk kơna, hơdôm khul grŭp mơ̆ng dêh čar truh pơ̆ plơi pla ngă rơbô̆t, phrâo rơnuk anai, bruă mă djơ̆ bruă, ba glăi bôh tơhnal.

Jơnum min apăn bruă Khua pơ ala mơnuih ƀôn sang dêh čar hmâo gum pơhiăp amăng hră čih Tơlơi pơtrun pơsit pơkă rơđah bruă pơphun bưp mơnuih ƀôn sang mơ̆ng Khua pơ ala kơ Khua pơ ala mơnuih ƀôn sang hăng khua pơ ala kơ Khul khua pơ ala mơnuih ƀôn sang. Lu tơlơi gum pơhiăp ding kơna Jơnum min apăn bruă Khua pơ ala mơnuih ƀôn sang dêh čar dô̆ pơmin kơ Grŭp apăn bruă Jơnum min djop djuai ania mơnuih mơnam dêh čar Việt Nam gưl să pơphun Jơnum bưp mơnuih pơ ala kơ mơnuih ƀôn sang. Khua Jơnum min tơlơi phiăn Hoàng Thanh Tùng lăi rơđah bôh nik:

“Grŭp apăn bruă Jơnum min djop djuai ania mơnuih mơnam dêh čar Việt Nam gưl să ƀu djơ̆ anih anom hơpă leng kơ mă bruă ba glăi bôh tơhnal hăng hơhrŭp ôh, biă ñu hơdôm anih anom kual asuek, ataih, kual dô̆ lu tơlơi tơnap. Yua anun pơkă kơjăp pơphun bruă Jơnum bưp mơnuih ƀôn sang ƀơi să mơ̆ jai kơjăp amăng tơlơi pơtrun pơsit kơ Grŭp apăn bruă Jơnum min djop djuai ania mơnuih mơnam dêh čar Việt Nam gưl să jing ƀirô git gai, gum hrŏm hăng Jơnum min djop djuai ania mơnuih mơnam gưl tơring glông hăng hơdôm ƀirô, pơphun bưp mơnuih pơ ala kơ mơnuih ƀôn sang amra hmâo sa dua čô mơnuih ƀu pơhlôm tơlơi rơkâo, bơdjơ̆ nao truh anô̆ klă bruă bưp mơnuih pơ ala kơ mơnuih ƀôn sang”.

Amăng mông jơnum, abih bang ding kơna amăng Jơnum min apăn bruă Khua pơ ala mơnuih ƀôn sang dêh čar hmâo pel ĕp Tơlơi pơtrun pơsit pơkă rơđah bruă pơphun bưp mơnuih pơ ala kơ mơnuih ƀôn sang mơ̆ng Khua pơ ala kơ Khua pơ ala mơnuih ƀôn sang dêh čar hăng Khua pơ ala kơ Khul khua pơ ala mơnuih ƀôn sang. Tơlơi pơtrun pơsit pơkă kơ tơlơi dưi hăng bruă gơgrong mơ̆ng hơdôm ƀirô, khul grŭp, amăng bruă bưp mơnuih ƀôn sang; Bruă mă, hơdră, bôh yôm bưp mơnuih pơ ala kơ mơnuih ƀôn sang; Tum pơƀut, ruah mă tơlơi gum pơhiăp, rơkâo đĭ mơ̆ng mơnuih pơ ala; biă ñu lĕ tơlơi pơkă bruă gơgrong mơ̆ng ƀirô, khul grŭp, anom bruă pơsir tơlơi rơkâo đĭ mơ̆ng mơnuih ƀôn sang, pơdah rơđah bôh tơhnal pơsir rơkâo đĭ mơ̆ng mơnuih pơ ala hăng lăng tui bruă pơsir tơlơi rơkâo đĭ mơ̆ng mơnuih pơ ala.

Ƀing ding kơna Jơnum min apăn bruă Khua pơ ala mơnuih ƀôn sang dêh čar ăt lăi mơn hơdôm tơlơi akă gal kiăng dưi hmâo hơdôm bôh ƀirô apăn bruă hmâo jơlan pơsir tŭ yua pơ̆ anăp anai kah hăng gơnam sĭ mơdrô đĭ nua; tơlơi gun, tơlơi pơjrom nao rai ƀơi jơlan glông; tơlơi sĭ mơdrô, dŭ pơgiăng, răk pioh, mă yua mlăi ƀu djơ̆ phiăn... Kơ-iăng Khua git gai pơ ala mơnuih ƀôn sang dêh čar ta ơi Nguyễn Đức Hải rơkâo tañ ba Tơlơi phiăn Lŏn drŏn 2024 mut amăng tơlơi hơdip mơda:

“Ƀing ta glăk pok pơhai ngă tui Tơlơi phiăn lŏn drŏn mut amăng tơlơi hơdip mơda mơnuih ƀôn sang mơ-ak. Samơ̆ tơlơi lĕ bơdjơ̆ nao bruă pơplih pơkra nua lŏn; bơdjơ̆ nao pơsit pô mă yua lŏn hơdôm anih anom... ră anai dô̆ mơn lu hră pơ-ar. Ƀing ta pơtrut bruă pơsit hră pơ-ar tŭ yap pô mă yua lŏn, tơlơi anai khom hmâo tơlơi đing nao gum hrŏm mơ̆ng hơdôm gưl. Hluai tui sa tơlơi phiăn phrâo, hơdră bruă phrâo mă yua hăng mơnuih ƀôn sang glăk dô̆ tơguan".

Jơnum min apăn bruă Khua pơ ala mơnuih ƀôn sang dêh čar rơkâo Gong gai dêh čar git gai hơdôm ding jum, gơnong bruă hmâo bơdjơ̆ nao, gong gai hơdôm anih anom đing nao bruă prăp lui gơnam tam pioh kơ Tết tui phiăn juăt; Ding jum jơlan nao rai hăng dŭ pơgiăng kơtưn hyu pel ĕp, hơduah tơña bruă ngă tui jŭ yap nua apah nao rai, phuă nua apah pơgiăng. Ding jum Kông ang wai lăng kơjăp, hơdư̆ ƀiă hmâo tơlơi truh ƀơi jơlan nao rai, biă ñu lơm hơdôm bruă pơgiăng mơnuih nao rai, gơnam tam amra đĭ lu pioh hmao tlôn djru kơ Tết tui phiăn juăt./.