![Khoa Điềm/Siu Đoan Pơblang](/themes/custom/vov_4/images/avatar.png)
Việt Nam hăng Lao hơmâo jơlan guai glông giăm 2.340 km găn nao 10 boh tơring čar ƀơi Việt Nam hăng 10 boh tơring čar dêh čar Lao. Dua bơnah hơmâo 8 boh amăng jang jar kmar, 7 boh amăng jang dêh čar, 18 glông mut nao rai hăng kual bơwih ƀong yôm phara.
Amăng mông jơnum bơkơtuai ƀing tơhan hlăk ai anom bruă git gai tơhan wai pơgang guai Việt Nam hăng tơhan hlăk ai mơng Anom bruă wai pơgang rơnuk rơnua, tơhan pôlih-Ding jum kông ang Lao lăng glăi boh than gum hrŏm mă bruă amăng thun blan rơgao. Pơsit tong tơlơi gơgrong mơng ling tơhan hlăk ai amăng pơphô bruă, tŏ tui bruă gum hrŏm pok pơhai ngă tui hơdôm bruă jao. Thượng úy Nguyễn Văn Quang, khua djru bruă mơnuih mơnam, anom pơtô bruă ling tơhan, anom bruă kơđi čar, anom bruă ling tơhan wai pơgang guai tơring čar Kon Tum brơi thâo:
“Dưi pơbưp nao rai tui anai lĕ hrơi mông kiăng kâo hăng tơhan hlăk ai pơbưp nao rai, pơlăi nao rai hăng dưi hrăm tui, kjăp dong amăng bruă wai pơgang guai lŏn ia. Kâo pô ăt hơmâo tơlơi găn rơgao kiăng gơgrong amăng bruă gum hrŏm hăng tơhan hlăk ai dêh čar Lao, mơng anun hmao tlôn ĕp ƀuh hơdôm tơlơi ngă soh kiăng hmao tlôn pơphô bruă brơi anom git gai ba tơbiă tơlơi črâo trun amăng pơgang, pơgăn ƀing ngă soh”.
![Khua grup tơhan hlăk ai anom bruă pơgang rơnuk rơnua, tơhan pôlih-Ding jum kông ang dêh čar Lao hăng Khua grup tơhan hlăk ai anom bruă git gai ling tơhan pơgang guai dêh čar Việt Nam nao jơnum bơkơtuai](https://vov4-media.solidtech.vn/sites/default/files/styles/large/public/2024-07/sy_quan_tre_bien_phong_lao_viet_1_20240709172851_3.jpg)
Mơng akŏ thun 2023 truh ră anai, ƀing tơhan hlăk ai Anom bruă git gai tơhan wai pơgang guai Việt Nam hăng tơhan hlăk ai anom bruă pơgang rơnuk rơnua, tơhan pôlih-Ding jum kông ang Lao hơmâo ngă hră pơ-ar brơi 499 grup mơnuih apăn bruă dua boh dêh čar dưi găn nao rai mă bruă; gum hrŏm hyu tir 264 wŏt hăng hơdôm rơbâo čô mơnuih apăn bruă, ling tơhan mut hrŏm; gum hrŏm mă pơkŏng, pơsir hĭ 1.500 bruă ngă soh hăng rơbêh 2.400 čô mơnuih ngă soh…
![Ƀing pơ ala brơi anom bruă git gai ling tơhan pơgang guai tơring čar Kon Tum ƀơk rup sang drông gru grua brơi grup tơhan hlăk ai anom bruă pơgang rơnuk rơnua, tơhan pôlih-Ding jum kông ang dêh čar Lao](https://vov4-media.solidtech.vn/sites/default/files/styles/large/public/2024-07/sy_quan_tre_bien_phong_lao_viet_2_20240709172851_3.jpg)
Tui Đại tá Nguyễn Thanh Hải, kơ-iăng khua anom bruă kơđi čar, Anom bruă git gai ling tơhan wai pơgang guai Việt Nam, ƀing tơhan hlăk ai lĕ rơnuk tŏ tui mơng khul ling tơhan dua bơnah, djop bruă pơbưp nao rai lêng kơ yôm biă mă amăng djă pioh, pơtrut tơlơi rô nao rai giang mah gru grua, gum pơgôp yôm phăn Việt Nam-Lao:
“Bruă pơbưp nao rai tơhan hlăk ai Anom bruă git gai ling tơhan pơgang guai Việt Nam, tơhan hlăk ai Anom bruă pơgang rơnuk rơnua, tơhan pôlih dêh čar Lao hrơi anai kiăng pơdah tong ten jơlan hơdră gum hrŏm kơplah wah anom bruă git gai ling tơhan pơgang guai hăng anom bruă pơgang rơnuk rơnua, tơhan pôlih dêh čar Lao. Pơdah tơlơi đing nao, tơlơi đăo gơnang prong hloh mơng khua mua dua anom bruă hăng rơnuk hlăk ai, ngă gêh gal kiăng ƀing tơhan hlăk ai dua bơnah pơbưp, pơlăi nao rai tơlơi thâo thăi, laih dong hơdor glăi gru grua hing ang, gru grua giang mah amăng tơlơi rô nao rai Việt Nam - Lao”.
![Ngui adôh suang amăng mông jơnum](https://vov4-media.solidtech.vn/sites/default/files/styles/large/public/2024-07/sy_quan_tre_bien_phong_lao_viet_3_3.jpg)
Khua mua dua bơnah hơmâo tŭ ư sa, dua boh tơhnal hăng jơlan gah ngă tui hơdôm bruă jao akŏ phun pơ anăp hăng ƀing tơhan hlăk ai Anom bruă git gai tơhan pơgang guai Việt Nam hăng tơhan hlăk ai anom bruă pơgang rơnuk rơnua, tơhan pôlih dêh čar Lao. Amăng anun, đing nao kơtưn pơlăi nao rai tơlơi pơhing bơdjơ̆ nao dua bơnah, gum hrŏm, tŏ ngă tui khut khăt, kjăp phik tơlơi pơkôl kơ bruă wai lăng guai lŏn ia hăng amăng jang kơplah wah dua boh dêh čar Việt Nam hăng Lao; wai lăng mơnuih mut nao rai, mut nao dŏ, găn nao rai mơng mơnuih ƀôn sang dua bơnah; gum hrŏm pơgang, pơgăn klă hloh ƀing ngă soh, pơhlôm rơnuk rơnua hăng gêh gal hloh brơi mơnuih ƀôn sang hăng hơdôm anom bơwih ƀong sĭ mơdrô dua bơnah găn nao rai amăng jang, guai lŏn ia, ngă hrŏm pơđĭ kyar bơwih ƀong huă, pơbưp hăng čuă jơmư nao rai.
Hlâo anun, ƀing tơhan hlăk ai dua bơnah hơmâo pơphun lu bruă mă hơmâo pla kyâo pioh hơdor; jao prăk djru hrăm hră brơi ƀing čơđai tơnap tap; pơtô pơblang tơlơi phiăn brơi mơnuih ƀôn sang dua bơnah ƀơi kual giăm guai tơring čar Kon Tum (Việt Nam) hăng tơring čar Attapư (Lao); pơphun ngui adôh suang, bơrơguăt drơi jăn, hyu čuă ngui ƀơi sa, dua anih pel ĕp gru grua djuai ania amăng plơi prong Kon Tum. /.
Viết bình luận