Tal 2 anai, Tơhan kual 5 jao glăi 435 boh sang phrâo, tơdơi kơ hơmâo jao glăi laih 175 boh sang amăng akŏ blan 1, sit nik ngă giong “Bruă mă Quang Trung”, ngă bruă truh kih čơkă hrơi Jơnum ruah khua ping gah dêh čar tal 14. Man pơdong giong abih 610 boh sang phrâo hăng 314 boh sang hơmâo pơkra glăi, Tơhan kual 5 pơjưh hĭ “Bruă mă Quang Trung” hăng pran jua hok mơak mơ̆ng neh met wa plơi ia dăo, pioh glăi tơlơi hơdor prong biă kơ rup “Ling tơhan Wa Hồ”.

Ƀing khua, ling tơhan nao djru amăng hrơi tơnap tap hloh, nao hrŏm hăng mơnuih ƀôn sang găn rơgao tơlơi truh lŏn adai ngă, hơđong glăi tơlơi hơdip. Hăng pran jua “ngă bruă tơhrơi ƀu giong, ta ngă mlăm dong”, “hơjan ƀu lui, bruă ƀu pơdơi”, ƀing khua, ling tơhan Tơhan kual 5 lăng bruă djru Mơnuih ƀôn sang pơdong sang anŏ tơdơi kơ ia dăo jing tơlơi jao bruă mơ̆ng sit hơtai boh ƀing ñu. Hơdôm boh sang hơmâo man pơkra giong hrơi anai ƀu kơnong jing bruă man pơdong đôč ôh, ăt jing pran đăo kơnang, tơlơi khăp ƀu-eng tơhan - mơnuih ƀôn sang pơbôr đĭ amăng mông tơnap tap./.