Akŏ bruă tuh pơ alin man pơkra jơlan rơdêh đuăi hmar Kơdư-Dơnung gah yŭ mơng Gia Nghĩa (Dak Nông)-Chơn Thành (Bình Phước) lĕ ară jơlan phun, tơkuh nao rai kual Dap kơdư hăng kual Ngŏ dơnung, kual Yŭ dơnung hăng ƀôn prong Hồ Chí Minh. Glông 128 km, tuh pơ alin amăng rơwang tal 1 prong 4 bơnah jơlan. Abih tih prăk tuh pơ alin jŭ yap jang jai lĕ 25 rơbâo 540 klai prăk. Ƀing khua mua rơkâo Kơnuk kơna pok pơhai ngă tui akŏ bruă brơi pơhlôm djơ̆ hrơi mông, kjăp hloh, ba glăi tŭ yua djơ̆ hăng tơlơi pơkă amăng tơlơi phiăn. Hrŏm hăng anun, bruă tuh pơ alin akŏ bruă anai tui jơlan gah gong gai hăng mơnuih ƀôn sang, kiăng pơhưč anom bruă tuh pơ alin, khul grup čan prăk mut hrŏm tuh pơ alin. Ơi Trình Lam Sinh, Khua pơ ala mơnuih ƀôn sang tơring čar An Giang lăi pơtong:

“Lơm jak iâu hơdôm anom bruă tuh pơ alin gum hrŏm akŏ bruă anai tui jơlan gah gum hrŏm kơnuk kơna hăng hơdôm anih anom, ƀing ta kiăng đing nao tơlơi dưi  ba glăi brơi djop bơnah kah hăng tơlơi glăm ba lơm hơmâo tơlơi tơnap hơget thơ, amăng anun Kơnuk kơna kiăng ngă gêh gal brơi anom bruă tuh pơ alin hơmâo akŏ bruă pơhrui prăk tuh pơ alin tŭ yua hloh. Tơlơi anai lăng yôm biă mă yua akŏ bruă ƀu pơhưč anom bruă tuh pơ alin, lơm ƀing gơmơi kiăng ba akŏ bruă hơdai nao tuh pơ alin man pơdong samơ̆ ngă kaih, ngă huăč ngăn drăp kơnuk kơna, bơdjơ̆ sat nao bruă jak iâu gum hrŏm amăng mơnuih mơnam kiăng man pơkra hơdôm arăng jơlan.

Hăng bruă mă čuah pơtâo lĕ gơnam pioh man pơkra tui tơlơi juăt ƀơi hơdôm ring bruă, ơi Nguyễn Trường Giang, Khua pơ ala mơnuih ƀôn sang tơring čar Dak Nông rơkâo Ƀirô Khua pơ ala mơnuih ƀôn sang dêh čar brơi ngă tui sa, dua hơdră yôm phara.

“Hăng hơdôm kual aka ƀu hơmâo hră pơ-ar pơsit brơi ĕp mă čuah pơtâo, hră pơ-ar dưi mă čuah pơtâo, anom bruă man pơkra dưi ruah mă hơdôm anih kiăng kơ mă čuah pơtâo. Anom bruă man pơkra kiăng nô̆p hră pơsit mă čuah pơtâo djơ̆ hăng tơhnal pơkă wai pơgang jum dar hăng jao Jơnum min mơnuih ƀôn sang tơring čar Bình Phước hăng Jơnum min mơnuih ƀôn sang tơring čar Dak Nông glăm ba bruă mă pơhlôm djơ̆ tơhnal wai pơgang jum dar hăng hơdôm bruă mă čuah pơtâo pioh kơ man pơkra hơdôm ring bruă”.

Hăng ngăn drăp Kơnuk kơna rơbêh 10 rơbâo klai prăk, ƀing khua mua rơkâo Kơnuk kơna lăi pơthâo rơđah bruă mă yua prăk ka lơm man pơkra amăng thun 2026.  Hăng ngăn drăp mơng ƀon lan giăm rơbêh 2 rơbâo klai prăk, rơkâo djop ƀon lan ƀuăn glăm ba lơm mă yua hăng Kơnuk kơna, Kơnuk kơna amra glăm ba ƀơi anăp Ƀirô Khua pơ ala mơnuih ƀôn sang dêh čar kơ bruă mă yua ngăn drăp gong gai ƀon lan brơi hơdôm akŏ bruă pơhlôm djơ̆ thun blan pơkă. Hăng mrô prăk mơng anom bruă tuh pơ alin giăm 12 rơbâo klai prăk, dưm dưm 50% mrô prăk tuh pơ alin, rơkâo Kơnuk kơna hơmâo tơlơi pơkôl hrŏm hăng anom bruă tuh pơ alin, kiăng huăi pơplih hơdră tuh pơ alin mơng akŏ bruă anai.

Lăi pơthâo amăng mông jơnum, Khua ding jum wai lăng jơlan glông ơi Nguyễn Văn Thắng lăi pơtong, bruă pok pơhai man pơkra, djop ƀon lan lêng kơ pơsit tong amra mă yua lăp djơ̆, kah pha klă hloh kiăng pok pơhai man pơkra hăng pơgiong amăng rơnuč thun 2026.

“Tơlơi yôm mơng akŏ bruă anai lĕ hơmâo djop čuah pơtâo man pơkra. Ră anai tui sem lăng mơng 2 boh tơring čar, ƀơi dua boh tơring čar anai lêng kơ prap lui anih mă. Ră anai dŏ kơnong hơdră bruă mơ̆ Ƀirô Khua pơ ala mơnuih ƀôn sang dêh čar prap pơtrun, ăt pơhlôm gêh gal mơn, hơmâo hơdră phara bơdjơ̆ nao pơhrui glăi lŏn mơnai, črâo brơi anom bruă man pơkra ƀơi hơdôm kual plơi pla phrâo. Anai lĕ hơdôm anih kiăng tañ ngă. Bơ hơdôm bruă bơdjơ̆ nao anih mă čuah pơtâo…hơdôm bruă anai lêng kơ gêh gal soh”.

 Khua pơ ala mơnuih ƀôn sang dêh čar hăng mơnuih ƀon lan đăo gơnang, bruă tuh pơ alin man pơkra jơlan rơdêh đuăi hmar Gia Nghĩa (Dak Nông)-Chơn Thành (Bình Phước) amra ƀơƀrư̆ pơgiong ară jơlan rơdêh đuăi hmar, pok jơlan pơđĭ kyar phrâo brơi kơ kual Dap kơdư. /.