Ƀơi bon Bu Ndrung, să Đức An, tơring čar Lâm Đồng, mơnuih man pơdŏng sang glăk đing nao pơkra giong sang phrâo kơ ayong Điểu Phạm Dương (djuai ania Bơnông). Mơ̆ng tơlơi găn rơgao lu thun hyu man pơdŏng sang, ayong Dương “lăi pơthâo” kơ sang tâ̆o yâo mơ̆ng pô, dưi pơdŏng mơ̆ng tơlơi gum djru mơ̆ng Ding jum Kông ang hăng sang anô̆ pơgôp nao hrŏm:

“Sang anai dưi dăp hơdră tui tơlơi pơmin mơ̆ng kâo, hăng abih bang kual lŏn prong 77m2. Amăng krah sang apui hăng anih jum tuai hmâo pra dưm gơnam, tơdơi anai hmâo prăk dong thơ blơi tivi dưm ƀơi anun. Sang apui lĕ anih dưm gơnam mă yua kơ sang anô̆. Bơ̆ bah amăng gah tlôn anai lĕ, pioh pơkra sang juă glai gah rơngiao”.

Juăt ƀuh ƀô̆ ƀơi hơdôm ring bruă man pơdŏng lŏm lui sang dô̆ jăng jai ƀơi să kah hăng sa “mơnuih lăng tui”, Khua bon Điểu Khuy, bon Bu Ndrung, să Đức An, brơi thâo, neh wa ƀơi anai gum hrŏm hơbit biă.

“Dưi hmâo Ping gah, Kơnuk kơna đing nao djru gum lĕ, neh wa ƀing gơmơi hơđong pran jua hăng mơ-ak biă. Neh wa ƀing gơmơi amăng ƀon Bu Ndrung anai, lơm hmâo bruă prong leng kơ nao tơña bla hăng gum djru hur har pran jua biă. Bơhmutu ñu kah hăng pơdŏng sang dô̆; hlơi hmâo pran djru pran, hlơi hmâo gơnam djru gơnam”.

Ƀơi kual ngă hơkrŭ đưm să Nâm Nung, lu sang tơ̆i ăt glăk dưi pơdŏng pơ ala nao ƀơƀrư̆ hăng sang phrâo klă hiam kơjăp. Ayong Y Kram ƀơi bon Ja Rah pơsit “sa rơnuk kơnong kơ pơdŏng sang sa wot, dưi hmâo Kơnuk kơna djru anun khom gir run pơdŏng kơjăp”.

“Sit pơkra sang, khă tơnap tap dơ̆ hơpă samơ̆ ăt gir run pơkra kơjăp mơn, kơjăp kiăng pơhlôm kơ ană bă hơđong; yua kơ sit lăi pơkra sang laih khom dưi dô̆ sui thun. Kâo gir run čan dong tơdơi anai tla glăi kơ adơi ayong. Sang anô̆ tơnap tap, dưi hmâo Kơnuk kơna djru 60 klăk prăk; adơi ayong neh wa djru ba, mơ̆ng hmâo sang dô̆ tui anai. Thun phrâo rơgao kơphê ăt hmâo hmăi nua mơn, pơkrem hơdôm thun mơ̆ng pơdŏng sang tui anai”.

Bơ̆ amai H’ Monh ăt ƀu dưi tlaih mơn tơlơi mơ-ak lơm hmâo sang dô̆ phrâo.

“Hmâo sang dô̆ pơgang, pơ-iă, hơjan kâo mơ-ak biă hăng hơđong pran jua mă bruă ngă đang hmua pioh bơwih brơi ană bă hrăm hră, kâo gir run bơwih ƀong huă pơđĭ kyar pioh pơkrem hơdôm thun dong tla glăi kơ adơi ayong, amĭ ama hmâo djru pô hmâo sa bôh sang dô̆ kơjăp tui anai”.

Mơ̆ng anai ƀu ataih ôh, sang anô̆ ling tơhan hơđăp Y Choi glăk pơphun mông mơ-ak đĭ sang phrâo amăng tơlơi pơđao pran jua, hơk dơk. Amăng sang dô̆ klă hiam anăp nao dơnao ia Nâm Nung rơ-ơ̆ hyom, ling tơhan hơđăp Y Choi lăi pơthâo tơlơi mơ-ak.

“Hlâo kơ pơdŏng sang, kâo dô̆ amăng sang tơ̆i pơkra mơ̆ng thun 1989, giăm či tơglưh laih. Dưi hmâo Kơnuk kơna djru prăk pơdŏng hăng djru kâo čan prăk gah Sang prăk hơdră bruă gum djru anun kâo dưi hmâo sang dô̆ kơjăp klă hiam tui anai. Sang anô̆ kâo mơ-ak biă hăng hơk kơdơk kâo rơkâo bơni kơ Ping gah, kơnuk kơna lu biă”.

Thun 2025, kual guai dêh čar tơring čar Lâm Đồng (Dak Nông hlâo adih) djru lŏm lui sang dô̆ jăng jai, sang tơ̆i brơi 1.755 bôh sang anô̆. Ding jum Kông ang ăt hmâo djru mơn tơring čar prăk pơdŏng 500 bôh sang dô̆ kơ mơnuih ƀôn sang. Mơ̆ng bôh nik pok pơhai ƀơi să, yă H’ Thương - ƀơi să Nâm Nung, tơring čar Lâm Đồng, brơi thâo.

"Kâo ƀuh mơ̆ng Dêh čar truh pơ̆ să, Jơlan hơdră lŏm lui sang dô̆ jăng jai, sang tơ̆i ba glăi boh tơhnal biă. Ƀơi anai, ƀing gơmơi pel ĕp lăng tui, pơtrut djơ̆ hrơi pơkă, djơ̆ tơlơi pơkă. Khua dêh čar hmâo lăng ƀuh neh wa kơƀah sang dô̆, khom pơdŏng. Ră anai truh bơyan hơjan, bơngot brơi kơ mơnuih ƀôn sang, Khua dêh čar hmâo črâo ba ngă tui pơhlôm djơ̆ rơnoh, pioh neh wa mut dô̆, hmao tlôn biă”.

Mơ̆ng hơdôm hơdră pơtrun djơ̆ lăp hăng tơlơi gum tơngan hrŏm mơ̆ng abih bang glông bruă kơđi čar, hơdôm bôh sang phrâo klă hiam glăk pơ ala nao sang tơ̆i, djă ba tơlơi mơ-ak, čang rơmang kơ sa tơlơi hơdip hơđong, trơi pơđao kơ ha rơbâo bôh sang anô̆ mơnuih ƀôn sang ƀơi Lâm Đồng. Pran jua gum hrŏm hơbit, djru gum mơ̆ng plơi pla ăt dưi rŭ đĭ mơn tui rim ring bruă sang dô̆, djru bang hyu pran jua ană mơnuih, pơtŏng sit tơlơi mơ-ak mơ̆ng neh wa hăng Ping gah hăng Kơnuk kơna. “Tơlơi mơ-ak mơ̆ng ƀing mơnuih pŭ dŭ nao dô̆ pơ̆ sang phrâo" glăk bang hyu djop hơdôm bôh plơi pla./.