Ƀơi hơdôm anih anom tuh tia pơkra ming Tân An, plơi prong Buôn Ma Thuột, lu kông ti glăk ĕp lu mơnuih mă bruă gah čoh sum ao, điện tử, pơkra blâo ging mơta. Mah hơmâo lu hơdră djru, prăk apah pơhrua kiăng pơhưč mơnuih mă bruă, kah hăng brơi pơdơi amăng bơyan yuă hơpuă, pơhrui gơnam đang hmua samơ̆ lu kông ti ăt aka ƀu ĕp djop mơnuih mă bruă. Ơi Trần Chí Vĩ, Khua kông ti čoh sum ao Lực Thiêm brơi thâo, kông ti glăk ĕp pơhrua dong 300 čô mơnuih mă bruă, samơ̆ phrâo pơmut giăm 50 čô đôč:

“Lơm truh bơyan pĕ pơhrui kơphê, tiu tơdah kông ñơn hơmâo đang hmua, ƀing gơñu dưi rơkâo pơdơi kiăng kơ glăi pĕ pơhrui gơnam đang hmua. Ăt čang rơmang găn rơgao bơyan pĕ pơhrui kơphê anai, bruă ĕp mơnuih mă bruă amra amuñ ƀiă".

Bơ ƀơi anih anom tuh tia pơkra ming Čư Kuin, bruă kơƀah mơnuih mă bruă, sit biă ñu lĕ mơnuih rơguăt bruă, ngă lu kông ti khŏm pơplih bruă pơkra pơjing kah hăng pơplih hrơi jao gơnam brơi arăng. Ơi Vũ Nguyễn Tường Linh, gơgrong gah bruă ĕp mơnuih mă bruă amăng kông ti kơphê Ngon brơi thâo, kông ti pơlir hơbit hăng hơdôm boh sang hră cao đẳng, sang hră gưl prong amăng tơring čar hăng amra pơtô brơi bruă mă soh sel, samơ̆ mrô mơnuih nô̆p hră pơ-ar rơkâo bruă aka ƀu lu tui tơlơi kiăng:

“Kông ti gơmơi kiăng giăm 50 čô mơnuih mă bruă gah tơkai tơngan laih dong mơnuih mă bruă thâo rơgơi. Tơlơi tơnap tap mơng ƀing gơmơi lĕ kơƀah mơnuih rơguăt bruă, sit biă ñu lĕ hơdôm bruă bơdjơ̆ nao apui lơtrik, ƀeñ tia pơsơi. Hăng tơlơi phara mơng kông ti gơmơi lĕ sa boh kông ti tač rơngiao tuh pơ alin, ƀing gơmơi kiăng thâo tơlơi tač rơngiao, tơlơi anai ngă tơnap lơm ĕp mơnuih mă bruă ƀơi Dak Lak”.

Bruă kơƀah kông ñơn glăk ƀuh lu biă mă amăng tơring čar Dak Lak. Yă Nguyễn Thùy Tâm, pô jao ĕp mơnuih mă bruă amăng kông ti Trung Nguyễn Franchising ƀơi Dak Lak brơi thâo, kông ti hơmâo đĭ tui prăk apah samơ̆ ăt tơnap ĕp mơnuih mă bruă:

“Lơm mut mă bruă, mơnuih mă bruă ăt dưi pơplông đĭ gưl, kĭ hră pơkôl mă bruă hăng djop hơdră djru tui tlôn tui tơlơi pơkă amăng tơlơi phiăn. Hrŏm hăng anun mơnuih mă bruă ăt ƀong prăk kiăo tui KPI, amra ƀơk brơi anung gơnam, apah prăk amăng pơdơi ƀong tết, hrơi tơkeng hăng sit niă ñu hăng ƀing mơnuih mă bruă sui thun. Mah ƀing gơmơi čih tơlơi pơhing ĕp mơnuih mă bruă amăng lu plang internet samơ̆ truh ră anai aka ƀu djŏp mơnuih mă bruă tui tơlơi kiăng”.

Tui lăi pơthâo mơng anom bruă hơduah ĕp mơnuih mă bruă tơring čar Dak Lak, amăng 6 blan akŏ thun, anom bruă hơmâo rơbêh 50 anih anom mut hrŏm amăng rơbêh 20 wŏt ĕp mơnuih mă bruă hăng glăk kiăng hơdôm hơpluh rơbâo čô mơnuih. Samơ̆, mrô mơnuih dưi pơmut mă bruă aka ƀu djop tui tơlơi kiăng. Ơi Nguyễn Hoàng Giang, Khua gơnong bruă mă, tơhan rơka hăng mơnuih mơnam tơring čar Dak Lak brơi thâo:

“Ĕp mơnuih hrăm bruă laih tơnap tap biă mă. Tal dua dong lĕ lơm pơmut mă bruă hơdôm anih anom khŏm pơtô glăi dong bruă mă, hơdôm tơlơi ƀing gơñu hrăm pơ sang hră aka ƀu pơhlôm djơ̆ hăng tơlơi sit nik ƀơi anih mă bruă, yua hơdôm boh sang hră aka ƀu thâo hơdôm anih anom mă bruă kiăng hơdôm tơlơi hơget”. 

Ăt tui ơi Nguyễn Hoàng Giang, thun 2024, tơring čar Dak Lak gir run ĕp bruă mă brơi rơbêh 30.000 čô mơnuih. Kiăng dưi ngă tui hơnong pơkă anai, hơdôm anih anom pơtô bruă mă kiăng hrưn đĭ klă dong amăng pơtô hrăm, djơ̆ hăng tơlơi kiăng mơng anom bơwih ƀong sĭ mơdrô, pơtô mơnuih mă bruă tui tơlơi rơkâo sit nik ƀơi anih anom mă bruă. Gah mơnuih mă bruă kiăng gir run hrăm brơi rơguăt bruă, thâo lu tơlơi, gơgrong amăng ĕp bruă mă./.