Tui Akô̆ bruă lŏm lui sang tơ̆i mơ̆ng Gong gai dêh čar, tơring čar Dak Lak amra djru sang dô̆ brơi kơ 4.285 bôh sang anô̆, hăng abih bang prăk mă yua giăm truh 343 klai prăk. Rơngiao kơ anun, tơring čar Dak Lak ăt amra djru mơn pơkra glăi sang dô̆ brơi rơbêh kơ 1.120 bôh sang anô̆. Akô̆ bruă yua kơ Kông ang tơring čar Dak Lak git gai, gum hrŏm hăng gong gai hơdôm anih anom amăng tơring čar ngă tui mơ̆ng akô̆ blan 3 hăng pơdŏng giong amăng krah blan 8/2025.

Tơdơi rơbêh kơ 2 rơwang hrơi tơjuh pok pơhai Akô̆ bruă lŏm lui sang tơ̆i tơring čar Dak Lak hmâo pơphun pơdŏng rơbêh 1.000 bôh sang dô̆, pơkă hlâo pơdŏng giong amăng blan 4 pơ̆ anăp. Hơdôm ring bruă dô̆ glăi amra pơtrut kơtang hăng pơdŏng giong hlâo kơ lơ 15/8/2025. Krông Bông lĕ sa amăng hơdôm bôh tơring glông kual asuek, kual ataih ƀun rin hloh tơring čar Dak Lak. Tal anai tơring glông hmâo 513 bôh sang anô̆ tơnap tap kơ sang dô̆ dưi djru pơdŏng phrâo, hăng abih bang prăk mă yua rơbêh kơ 41 klai prăk; hăng 96 bôh sang anô̆ pơkon dưi djru 2 klai 880 klăk prăk pioh pơkra glăi sang dô̆./.