Anăp nao dua boh să bưp tơlơi truh kơtang hloh amăng tal ia dăo phrâo rơgao ƀơi Ngŏ Dak Lăk (jing tơring čar Phú Yên hơđăp), abih bang khua, mơnuih mă bruă amăng Anom bruă kual Dap Kơdư (VOV Dap Kơdư) hrŏm hăng ƀing čơmah juăt djru mơnuih tơnap tap hơmâo pơčruh, brơi braih kơ neh met wa. 200 anung gơnam, rim anung hơmâo 10kg braih, hơmâo brơi kơ 200 boh sang anŏ ƀơi dua boh să Hòa Thịnh hăng Đông Hòa - hơdôm sang anŏ răm rai kơtang hloh yua ia dăo ngă. Ơi Lê Hải Sơn, Khua sang bruă VOV Dap Kơdư brơi thâo, tơdơi kơ hơdôm hrơi nao pơ hơdôm boh să ia dăo či pôr pơthâo tơlơi pơhing ia ling dăo, ƀuh neh met wa bưp tơlơi truh răm rai kơtang biă mă, ƀing khua, mơnuih mă bruă amăng anom bruă gum djru prăk kăk, djru braih kơ neh met wa.

Hơdôm hrơi rơgao, yua hơmâo mơnuih ƀôn sang đơ đam dêh čar ta gum djru, tơlơi hơdip neh met wa pơ kual ia dăo hơđong hloh, ƀu hơmâo sang anŏ ư̆ rơpa tơ-oa asơi dong tah. Khă hnun, tơdơi kơ lu hrơi ƀong mi tôm hăng mơñum ia đôč, hlơi mơ̆ng ƀu kiăng huă asơi kiăng trơi hlung. Bruă brơi braih tal anai jing pran jua thâo kah pơpha, tŏ tui gru hiam “hla hnil anung ba hla tơ̆i” mơ̆ng djuai ania Việt Nam ta.