VOV4.Jarai -  Lơ 27/10, tơring čar Lâm Đồng čih hmâo dong 15 čô mơnuih ƀă Covid-19, amăng anun hmâo lu mơnuih bơdjơ̆ nao truh anih klin ngă phrâo ƀơi anom plơi prong Đà Lạt. Amăng mrô 15 čô mơnuih ƀă Covid-19 phrâo dưi pơsit, hmâo 7 čô mơnuih čih pioh ƀơi Đà Lạt, 6 čô mơnuih ƀơi tơring glông Đức Trọng hăng 2 čô mơnuih ƀơi tơring glông Bảo Lâm.

Kơnong kơ hơdôm mơnuih phrâo ƀă ƀơi Đà Lạt leng kơ hmâo bôh than klin ngă bơdjơ̆ nao anih klin ngă phrâo ƀơi jơlan añep 31 Nguyễn Công Trứ, phường 8, plơi prong Đà Lạt. Ră anai bruă guang dar kual, ruah mă, hyu huĕt ĕp, dô̆ čơlah hơdôm čô mơnuih bưp giăm hăng ƀing ƀă kơman glăk dưi hmâo khul gơgrong bruă mơng tơring čar Lâm Đồng pok pơhai klă. Truh mông anai, Lâm Đồng čih hmâo abih bang mrô 505 čô mơnuih ƀă kơman Covid-19, amăng anun hmâo 323 čô mơnuih dưi pơjrao suaih hăng tơbiă mơng sang ia jrao./.

Siu H’ Prăk: Pô pơblang