VOV4.Jarai - Bruă pơtô pơblang kiăng kơđiăng amăng pơgang klin Covid-19 ƀơi hơdôm plơi pla ala ƀon lăng yôm phăn biă mă, sit biă ñu amăng hơdôm hrơi hơmâo lu mơnuih glăi mơng kual hơmâo klin. Amai Nguyễn Thị Phương (djuai ania Tày) dŏ ƀơi să Čư̆ Mgar, tơring glông Čư̆ Mgar, tơring čar Daklak hơmâo bruă pơtô pơblang thâo pơčeh phrâo, anun lĕ pơčeh boh pia phrâo amăng yŭ adôh Then kiăng jak iâu pơgang klin Covid-19. Hăng tơlơi adôh jê̆ giăm, tañ hluh, hơmâo lu boh pia jê̆ giăm hăng tơlơi sit nik hơmâo adôh mơ-ak tui jua gông brô̆, ngă ol kơdol amăng pran jua. Hơdôm video mơng amai Phương lơm ba đĭ amăng facebook, youtube ngă lu mơnuih hmư̆ hing.

Anai lĕ hơdôm tơlơi adôh yua amai Nguyễn Thị Phương, djuai ania Tày, dŏ ƀơi ƀut plơi 5, să Čư̆ Mgar, tơring glông Čư̆ Mgar, tơring čar Daklak pơčeh mă boh pia tui tơlơi adôh Then mơng djuai ania Tày - Nùng hăng ăt ñu pô mơng adôh. Amăng tơlơi adôh yua amai Phương pơčeh hơmâo boh pia: “Pơgang klin kar hăng blah ayăt sua lŏn ia, ƀing ta gum tơngan hrŏm pơgang hĭ klin Covid …, abih bang mơnuih kar hăng tơhan, gum hrŏm abih pran jua găn rơgao tơlơi lông”…

Amai Nguyễn Thị Phương adôh Then amăng plang mơnuih mơnam

Hăng tơlơi adôh jê̆ giăm samơ̆ pơdah pran jua ngă tui tơlơi git gai “pơgang klin kar hăng blah ayăt” mơng Khua dêh čar ta, ngă tui tơlơi pơtrun 5K mơng Ding jum ia jrao amăng pơgang klin. Laih dong gum djru, pap mơñai hăng hơdôm tơlơi tơnap tap, tuh rơyuh pran jua mơng nai ia jrao, ơi ia jrao, kông ang, ling tơhan … glăk gơgrong pơgang hĭ klin. Mơng anun, pơ alum pran jua abih bang mơnuih khut khăt ngă tui hơdôm tơlơi pơkă amăng pơgang klin, hăng pran jua đăo gơnang, čang rơmang amra pơgang hĭ klin mơng anun amra ba glăi tơlơi hơdip rơnuk rơnua tui hơđăp.

Kơnong hơdôm hrơi đôč dưm tơlơi adôh amăng facebook hăng youtube, tơlơi adôh hơmâo hơdôm rơbâo čô mơnuih lăng, hơdôm rơtuh čô mơnuih čih tơlơi pơgôp hiăp hăng pơdah brơi lu mơnuih pơkŏn dong. Ayong Nguyễn Trung Hải, djuai ania Tày, dŏ ƀơi tơring kual Quảng Phú, tơring glông Čư̆ Mgar lĕ mơnuih kiăo tui lăng video pơdah amăng facebook brơi thâo:

“Lơ̆m kâo lăng video yua amai Phương adôh kâo ƀuh mơ-ak biă mă, mơng tơlơi adôh, yŭ adôh, pĕ gông brô̆. Tơlơi adôh anai amra pơ alum pran jua neh met wa djop djuai ania gum hrŏm pơgang klin, tơlơi adôh lăp djơ̆ hăng tơlơi sit nik ră anai. Bruă yua yŭ adôh kiăng pơtô pơblang kiăng neh met wa thâo rơđah hăng yŭ adôh đưm, gông brô̆ mơng djuai ania pô ngă kơ mơnuih ƀon sang tañ hluh. Kâo pô hăng ƀing mơnuih juăt hmư̆ amai Phương adôh lêng kơ hor soh mơng anun amra kơđiăng amăng bruă pơgang klin”.

Amai Nguyễn Thị Phương buh eng ao djuai ania pô adôh Then

Amai Nguyễn Thị Phương brơi thâo, hơdôm hrơi laih rơgao, ñu hăng grup pơgang klin amăng plơi pla, să glăk gir run hyu pơtô pơblang kơ bruă pơgang klin brơi neh met wa, kah hăng bruă djru brơi gơnam ƀong huă ƀơi hơdôm anih pơčlah pơƀut brơi ƀing mơnuih mă bruă glăi mơng hơdôm tơring čar hơmâo klin. Amăng hơdôm hrơi pơdơi, amai Phương hơmâo mut amăng internet ĕp hơdôm tơlơi adôh mơ-ak hơmâo boh pia lăi nao bruă pơgang klin Covid-19 kiăng kơ pơčeh jing tơlơi adôh Then laih anun amra adôh hăng wuai video glăi dưm amăng plang mơnuih mơnam. Tui hăng amai Phương, tơlơi adôh Then lĕ tơlơi ngă mơ-ak gah pran jua ƀu kơƀah amăng tơlơi hơdip djuai ania Tày - Nùng. Plơi gơñu hăng hơdôm plơi pla jum dar hơmâo lu mơnuih djuai ania Tày - Nùng dŏ hơdip yua anun bruă pơtô pơblang tui anai amra ngă kơ mơnuih ƀon sang tañ hluh ƀiă dong.

“Ƀuh mơnuih ƀon sang hmư̆ tañ hluh lơ̆m pơtô pơblang tui anai kâo ƀuh mơ-ak biă mă. Mah ră anai kâo lu bruă kiăng kơ djru amăng pơgang klin ƀơi să, samơ̆ pơ anăp anai amra gir run pioh lu hrơi mông dong pơčeh adôh Then hăng boh pia lăp djơ̆ kiăng kơ hơmâo lu dong tơlơi adôh Then pioh pơtô pơblang brơi ană plơi pla”.

Amai Phương jak iâu djru amăng keh prăk pơgang klin Covid-19

Yă Hồ Thị Thanh Hải, Khua Jơnum min djop djuai ania mơnuih mơnam Việt Nam să Čư̆ Mgar brơi thâo, mơnuih djuai ania Tày - Nùng dưm dưm rơbêh 16% mrô mơnuih amăng să. Abih bang mơnuih ƀon sang amăng thun mă bruă ƀơi să glăk hyu ngă kông nhơn pơi tơring čar Bình Dương, Đồng Nai hăng ƀôn prong Hồ Chí Minh. Hơdôm hrơi laih rơgao, lơ̆m hơdôm tơring čar anai ngă tui tơlơi črâo trun mrô 16, lu mơnuih mă bruă pot glăi pơ plơi pla pioh pơgang klin. Yua anun, hrŏm hăng bruă pơtrut pơsur, gum djru hăng čơkă mă gơnam tam măi mok pioh pơgang klin, bruă pơtô pơblang kiăng kơđiăng hăng hơdôm tơlơi gum djru mơng mơnuih ƀon sang lĕ yôm phăn biă mă. Lơ̆m ngă Khua khul djop djuai ania mơnuih mơnam amăng plơi, ngă rah Khua khul đah kơmơi, amai Nguyễn Thị Phương hơmâo lu bruă mă kiăng kơ hrŏm hăng ling tơhan pơgang klin. Amăng anun, yua tơlơi adôh Then kiăng pơtô pơblang lĕ bruă pơčeh phrâo, lăp djơ̆ hăng tơlơi hor hmư̆ adôh suang mơng mơnuih ƀon sang.

“Amai Phương lĕ sa amăng ƀing mơnuih apăn bruă hur har abih pran jua amăng bruă mă ƀơi ƀon lan, ñu lêng kơ hơmâo djop gưl đăo gơnang hăng mơnuih ƀon sang kiăng khăp. Amăng hrơi blan laih rơgao hrŏm hăng tơlơi adôh Then mơng djuai ania pô pioh pơtô pơblang brơi mơnuih ƀon sang pơgang klin. Anai lĕ tơlơi pơčeh phrâo, ba glăi tŭ yua ƀơi să Čư̆ Mgar lăi phara hăng đơ đam tơring glông Čư̆ Mgar hnun mơn”.

Adôh Then, pĕ gông tính lĕ tơlơi adôh mơ-ak ƀu kơƀah ôh mơng mơnuih djuai anai Tày - Nùng ƀơi anai. Djă pioh, lăi pơthâo anŏ hiam mơng tơlơi adôh đưm hăng gông brô̆ mơng djuai ania pô, amai Nguyễn Thị Phương hơmâo pơčeh rai lu tơlơi adôh lăp djơ̆ amăng bruă pơtô pơblang amăng pơgang klin kar hăng blah ayăt, laih dong tơlơi tơnap tap glêh glar mơng ƀing mơnuih glăk djru pơgang klin, mơng anun jak iâu mơnuih ƀon sang gum tơngan hrŏm kiăng pơgang hĭ klin Covid-19.

Siu Đoan: Pơblang