VOV4.Jarai-Yang hrơi dơ̆ng, lơ 5/8, sa čô đah kơmơi pi kian ƀă klin Covid 19 ƀơi Gia Lai hơmâo ƀing ơi ia jrao brơi tơkeng breh mă ană amăng kian rơnuk rơnua. Ơi ia jrao Nguyễn Tuấn Phúc, Khua sang ia jrao pơjrao mơnuih duăm djơ̆ kman Covid 19 tơring čar Gia Lai brơi thâo, mơnuih duăm ƀă kman hơmâo anăn BN109113 glăi mơ̆ng kual hơmâo klin, arăng ƀuh ñu ƀă kman Covid 19 laih anun ba nao pơ sang ia jrao mơ̆ng lơ 31/7.

Đah kơmơi pi kian ƀă covid 19 tơkeng ană rơnuk rơnua

Rơbêh sa wơ̆t hrơi tơjuh rơgao, arăng krăo lăng pran jua ñu tong ten biă mă yua kơ truh blan đih apui laih. Mơguah lơ 5/8, pô ruă anai ruă tơkeng, sang ia jrao jak iâu ƀing ơi ia jrao ĕp lăng hăng brơi tơkeng breh hlung ƀơi sang ia jrao prong Gia Lai djru hrom.

Ƀing ơi ia jrao breh mă ană nge kơtrâ̆o 3,8 kg. Ră anai, sang ia jrao mơ-it nao ƀing đah kơmơi mă ƀuai wai lăng tong ten  amĭ hăng ană nge phrâo tơkeng kiăng huăi ƀă kman klin.

Nay Jek: Pơblang