VOV4.Jarai - Giăm dua thun rơgao, lu čơđai sang hră sang anŏ tơnap tap pơ hơdôm boh sang hră kual ataih yaih ƀơi tơring glông Čư̆ M’gar hơmâo tơlơi djru yôm biă hăng anăn “Sang bruă bê ngă djuai”. Anai lĕ kơčăo bruă yua grup Yua kơ ƀing čơđai khăp ƀu-eng (gah Khul čơđai anet tơring glông Čư̆ M’gar)pơtruh nao rai laih anun djru ba ƀing čơđai sang anŏ rin rơpa, đah mơng plai ƀiă tơnap tap, hrưn đĭ bơwih ƀong dưi dăi ƀiă.

Rim yang hrơi mơguah, adơi Đặng Viết Mạnh, hrăm anih 7A, Sang hră gưl 2 Ngô Mây, să Ea M’Droh djru amĭ ama ñu nao pơ hmua pĕ hla, yuă rok brơi giăm ha pluh drơi bê. Adơi Mạnh lăi, pŭ bê hơmâo hrôh mơng dua drơi bê tơnô ania, yua Grup wai lăng bruă čơđai muai tơring glông Čư̆ M’gar brơi amăng blan 5 thun 2020. Giăm 2 thun rông bê, sang anŏ ñu hơmâo sĭ tui laih, mă prăk anun blơi añăm ƀong, pơplih tui tơlơi hơdip, pioh nô̆p prăk hrăm hră kơ 4 adơi amai amăng thun hrăm phrâo dong.

“Mơng anai truh hrơi Tê̆t, bê hơmâo tuh thim 2, 3 drơi dong, abih tih bê sang anŏ gơmơi hơmâo 10 drơi laih. Amĭ ama mă sĭ hơdôm drơi či blơi braih, blơi hră hrăm, laih anun nô̆p prăk hrăm hră kơ 4 adơi amai gơmơi”.

Tui anun mơn, adơi Bàn Minh Kiệt, hrăm anih 7C, sang hră gưl 2 Ngô Mây, să Ea M’Droh ăt hơmâo Grup wai lăng bruă čơđai muai tơring glông Čư̆ M’gar hơmâo brơi 3 drơi bê rông tuh ană amăng akŏ blan 3 thun 2020. Truh ră anai, sang anŏ adơi Kiệt hơmâo 13 drơi bê laih, nua ñu giăm 100 klăk prăk.

Tui hăng ơi Lý Văn Chòi, ama adơi Kiệt lăi, hơmâo mă bê mơng grup brơi, rơngiao kơ djru sang anŏ rông bê pơđĭ kyar tơlơi bơwih ƀong, lŏm lui tơlơi rin rơpa lĕ ăt djru ană bă thâo hluh hloh kiăng gir mă bruă, triang kơtang.

“Ană bă ƀu hơmâo bruă mă, lơ̆m hơmâo bê arăng brơi lĕ gơñu nao mă hla keo, yuă rok brơi bê ƀong. Thâo djru ngă bruă tui anun lĕ gơñu thâo pơmin ƀiă, gơñu thâo mông ƀơi hrăm hră, mông ƀơi ngă bruă. Tơdơi anai jing mơnuih hơdip klă, thâo djru kơ mơnuih mơnam”.

Nai Mai Văn Chuyền, Khua gơgrong bruă grup čơđai sang hră gưl dua Ngô Mây (să Ea M’droh, tơring glông Čư̆ M’gar) thun hrăm 2019-2020, kơčăo bruă “Sang bruă bê ngă djuai” hơmâo pơphun ngă. Hơdôm grup hlăk ai čơđai muai hơmâo jak iâu ƀing juăt djru mơnuih tơnap tap mơng bon prong Hà Nội, Hồ Chí Minh, Đà Nẵng hăng hơdôm boh tơring čar kual Dap Kơdư djru blơi bê brơi ƀing čơđai rông. Laih dong, grup ăt ngă hrŏm hăng hơdôm khul grup pơkŏn, ƀing apăn bruă pơjrao hlô rông...djru pơkra brơi drông bê, tlâ̆o pơgang klin ƀudah pơtô ba hơdră rông bê.

Iâu lĕ “sang bruă” yua dah bê ƀu djơ̆ brơi hlao ôh mơ̆ arăng brơi mưn mă dơ dăng đôč, lăng bê pioh ngă djuai anai kah hăng mrô prăk blung a či djru nao djru rai. Tui anun, rim boh sang anŏ ƀing čơđai tơnap tap amra hơmâo djru mơng 2 truh 3 drơi bê, hơmâo nua mơng 8 truh 10 klăk prăk. Amăng 3 thun, lơ̆m pŭ bê hrôh ană baih, sang anŏ amra brơi glăi mrô drơi bê arăng brơi, djơ̆ hăng kĭ blung a arăng brơi mơn đah mơng brơi kơ čơđai pơkŏn dong.

Rim čô čơđai rin ƀơi tơring Čư̆ M’gar hơmâo brơi 2, 3 drơi bê, hơmâo nua 8 - 10 klăk prăk.

Lăng ƀuh anŏ tŭ yua mơng kơčăo bruă, Grup yua kơ ƀing čơđai khăp ƀu-eng gir hyu jak iâu tơlơi gum djru mơng ƀing juăt djru mơnuih tơnap tap amăng tơring čar hăng tơring čar pơkŏn, mơng anun ba bruă anai djru kơ čơđai sang hră rin ƀu kơnong ƀơi să Ea M’droh đôč ôh mơ̆ hơmâo ba djru kơ hơdôm plơi pla pơkŏn dong amăng tơring glông Čư̆ M’gar kah hăng: să Ea Kpam, tơring kual Ea Pôk...Yua hnun, giăm 2 thun rơgao, hơmâo laih 8 pŭ bê hăng 20 drơi mơng “Sang bruă bê ngă djuai” hơmâo brơi kơ ƀing čơđai sang anŏ rin ƀơi tơring glông.

“Ră anai ƀing čơđai hơmâo tơlơi djru anai lu biă ñu ƀơi să Ea M’droh, Ea K’pam hăng Ea Pôk. Samơ̆ mơng tơlơi jŭ yap, sem lăng mơng Grup wai lăng bruă čơđai muai tơring glông Čư̆ M’gar lĕ ră anai dŏ hơmâo lu čơđai drit druai, ƀudah sang anŏ tơnap tap ƀơi hơdôm boh să pơkŏn amăng tơring glông Čư̆ M’gar kiăng djru ba. Anai lĕ hơbô̆ bruă klă hăng djơ̆ biă mă, djru ba ƀing čơđai ƀrô dưi pơđĭ kyar rông gơnam ƀrô pơtô ba ƀing čơđai thâo hluh kơ tơlơi mă bruă, yua hnun ƀing gơmơi amra pok prong hơbô̆ bruă anai kiăng abih bang plơi pla amăng tơring glông hmư̆ hing”.

Tơdơi giăm 2,3 thun rông, hơbô̆ bruă rông bê hơmâo hrôh mơng 10 truh 15 drơi.

Tơdơi kơ anun, ƀing čơđai hơmâo djru bê kơ ƀing čơđai pơkŏn dong amăng tơring glông Čư̆ M’gar.

Bruă jak iâu djru brơi bê rông ngă djuai mơng Grup wai lăng bruă čơđai muai tơring glông Čư̆ M’gar brơi thâo, čơđai sang hră rin ƀơi hơdôm boh să kual ataih yaih tơring glông Čư̆ M’gar lĕ hơdră ngă bruă klă hiam, tŭ yua. Hơdră ngă bruă anai lăp djơ̆ hăng kual plơi pla, čư̆ siăng. Mơng anun, djru ba sang anŏ ƀing čơđai dưi rông gơnam, hơmâo prăk kăk, pơđĭ tui tơlơi hơdip; biă ñu pơtô brơi ƀing čơđai thâo pơmin, triang ngă bruă hăng hrăm hră.

Tuấn Long: Čih - Siu H’Mai: Pơblang