VOV4.Jarai-Phrâo hrơi tal 3 pơđut hĭ ngă tui hră pơčrâo mrô 16, laih anun brơi ngă tui dơ̆ng hră pơčrâo mrô 15, tom brơi, lơ 17/8, plơi prong Ƀuôn Ma Thuôt čih pioh hơmâo ƀut ƀă klin Covid 19 amăng plơi pla hăng 7 čô mơnuih ƀă aka ƀu thâo mơ̆ng pơpă ƀă.

Khuek mă ia khak mơnuih ƀôn sang dŏ giăm anih ƀă klin phrâo ƀơi Ƀuôn Ma Thuôt

Pô tal blung ƀă anăn T.Q.S, tơkeng thun 1968, dŏ pơ mrô sang 174 Thủ Khoa Huân, phường Thành Nhất, plơi prong Ƀuôn Ma Thuôt. Laih ĕp lăng, mơ̆ng lơ 1/8 truh lơ 15/8, ơi S anai đuăi hyu pơ lu sang anŏ kơnung djuai ƀơi ƀôn Kŏ Đŭng, să Ea Ñuôl, tơring glông Ƀuôn Đôn, weh nao pơ anih sĭ ia săng jơlan Nguyễn Thị Định, phường Thành Nhất, găn nao pơ jơlan weh mrô 139 Thủ Khoa Huân.

Ră anai, khua mua amăng phường hăng anom bruă ia jrao ăt hlăk tui kru ĕp mơnuih hơmâo jĕ giăm hăng pô anai hăng 6 čô mơnuih ƀă amăng plơi pla jing F0 anun. Hrơi mông, jơlan nao, sang gơñu weh, jĕ giăm hăng hlơi kiăng thâo tañ laih anun brơi dŏ phara pơčlah hĭ, djop pô anăm tơbiă hyu pơ rơngiao ôh tơdah ƀu hơmâo bruă kiăng ječ.

Nay Jek: Pơblang