Hăng anŏ phara mơng tơring čar kual čư̆ siăng hơmâo lu mơnuih djuai ania ƀiă dŏ hơdip hăng mrô đah kơmơi tơkeng ană pơ sang dŏ lu pơhmu hăng đơ đam dêh čar. Pok pơhai akŏ bruă 8 kơ ngă tui bruă bơkơnar đah rơkơi đah kơmơi hăng pơsir hĭ hơdôm bruă kiăng hloh hăng ƀing đah kơmơi hăng čơđai muai, rơwang tal I (thun 2021-2025), tơring čar Gia Lai lĕ 1 amăng 10 boh tơring čar hơmâo đing nao pok pơhai 4 hơdră djru đah kơmơi djuai ania ƀiă tơkeng ană rơnuk rơnua hăng bơwih brơi tơlơi suaih pral kơ ƀing čơđai muai, hơmâo: bơwih brơi hlâo kơ tơkeng; djru brơi lơm tơkeng hăng tơdơi kơ tơkeng; bơwih brơi tơlơi suaih pral kơ ƀing čơđai.

Amăng hrơi blan rơgao, djop gưl amăng Khul hơmâo gum hrŏm hăng gơnong bruă ia jrao pơphun giăm 100 wŏt pơtô pơblang kiăng hluh rơđah hăng pơsur đah kơmơi pi kian nao tơkeng pơ sang ia jrao, pơhưč rơbêh 7.000 čô adơi amai amăng hnưr tơkeng ană bă mut hrŏm. Hrŏm hăng anun, hơmâo djru brơi 361 čô ding kơna đah kơmơi tơkeng pơ sang ia jrao hăng abih tih mrô prăk giăm 365 klăk prăk. Mơng hơdôm bruă djru anai, ƀu djơ̆ kơnong hrưn đĭ hluh rơđah, thâo bơwih brơi tơlơi suaih pral brơi kơ ƀing đah kơmơi, čơđai muai ăt kiăng pơgôp pơsur đah kơmơi pi kian nao pơ sang ia jrao tơkeng hăng gir run ngă tui djơ̆ hơdră tơkeng ană bă.

Amai Rčom Alênh, dŏ amăng plơi Amơng, să Ia Mơ Nông, tơring glông Chư Pah, tơring čar Gia Lai brơi thâo:

“Kâo hơmâo arăng djru brơi blơi akhăn bơnal pŏn brơi kơ ană nge. Mơng bruă anai kâo ăt hok mơ-ak biă mơn yua kơ hơmâo tơlơi gum djru, laih dong hơmâo arăng črâo brơi bruă bơwih brơi tơlơi suaih pral kơ ană nge dong. Nao tơkeng pơ sang ia jrao să ƀing gơmơi hơmâo arăng tlâ̆o brơi djop ia jrao pơgang, khăm brơi ană nge dong”.

Mơng pok pơhai ngă tui lu bruă mă tui hơdră djru đah kơmơi djuai ania ƀiă tơkeng ană rơnuk rơnua hăng bơwih brơi tơlơi suaih pral brơi čơđai muai hơmâo pơgôp ngă hluh rơđah dong kơ bruă tơkeng ană rơnuk rơnua; kơ bruă bơwih brơi tơlơi suaih pral brơi ƀing amĭ, ƀing čơđai muai; ƀing adơi amai dưi tŭ mă tơlơi bơwih bơwang gah ia jrao, hluh rơđah hăng bơwih brơi ană nge lăp djơ̆. Amai Đinh Ly Ơn, dŏ amăng plơi Hek, să Chư Athai, tơring glông Phú Thiện, tơring čar Gia Lai brơi thâo: “Ñu hơmâo tơkeng ană tơčua, prap tơkeng ană tal dua dong. Lơm ƀiă truh hrơi tơkeng amra nao đih pơ sang ia jrao kiăng pơhlôm rơnuk rơnua brơi kơ amĭ hăng ană. Ñu ăt amra gir run bơwih brơi klă kiăng ană nge suaih pral”.

Găn rơgao 3 thun pok pơhai akŏ bruă 8 amăng tơring čar Gia Lai hơmâo ba glăi boh tŭ yua sit nik kiăng kơ lui hĭ hơdôm tơlơi gun, tơlơi pơmĭn sat, ngă tui klă hloh hơnong pơkă bơkơnar đah rơkơi đah kơmơi hăng hrưn đĭ tơlơi hơdip mơda kơ ƀing amĭ hăng ană nge kual mơnuih djuai ania ƀiă. Lăi pơthâo kơ boh tŭ yua mơng pok pơhai akŏ bruă mrô 8 ƀơi tơring čar, yă Rčom H’Hồng, Khua khul pơlir hơbit đah kơmơi tơring čar Gia Lai brơi thâo:

“Hơdôm hơbô̆ bruă, bruă mă lơm pơphun pok pơhai tơl tơring čar truh ră anai hơmâo mơnuih ƀôn sang hăng Khul đah kơmơi ngă tui, hơmâo tơlơi dong yua, mut hrŏm mơng djop gưl, gong gai ƀon lan lăng yôm mơn. Pơ anăp anai djop gưl amăng Khul tŏ tui gơgrong ngă tui bruă jao kiăng pơphô bruă, pơphun, pok pơhai tŭ yua 16 bruă mă amăng 4 grup boh tơhnal phun mơng akŏ bruă 8, gir run ngă pơgiong hăng rơgao hơnong pơkă amăng rơwang tal I ba tơbiă. Akŏ phun lĕ pơphun hơdôm bruă ngă pơplih tơlơi pơmĭn, bruă mă, pơgôp lui hĭ hơdôm tơlơi pơmĭn sat bơdjơ̆ nao đah rơkơi đah kơmơi amăng sang anŏ hăng mơnuih mơnam; hơdôm tơlơi phiăn ƀu hiam hăng sa, dua bruă mơnuih mơnam kiăng ngă brơi đah kơmơi hăng čơđai muai”.

Ăt tui Khua Khul pơlir hơbit đah kơmơi tơring čar Gia Lai, Khul amra tŏ tui hơdôm hơbô̆ bruă klă, kiăng pơplih tơlơi pơmĭn, bruă mă, hrưn đĭ kơdrưh ang brơi đah kơmơi, pơtrut bơkơnar đah rơkơi đah kơmơi, pơsir hĭ hơdôm bruă kiăng hloh brơi đah kơmơi hăng čơđai mua, pơgang ba boh pơhiăp hăng mut hrŏm sit nik mơng đah kơmơi hăng čơđai mua amăng bruă pơđĭ kyar bơwih ƀong huă, mơnuih mơnam amăng ƀon lan. Krăo lăng hăng lăi glăi, djru brơi kiăng hrưn đĭ bruă mă mơng đah kơmơi lơm mut hrŏm git gai amăng anih anom kơđi čar. Pơphun hơdôm bruă pơtô hrăm brơi boh thâo bơkơnar đah rơkơi đah kơmơi, bruă ngă tui ha amăng plĕ bruă đah rơkơi đah kơmơi brơi ƀing apăn bruă amăng anih anom kơđi čar, ƀing tha plơi, khua plơi, mơnuih arăng đăo gơnang amăng mơnuih mơnam. Mơng anun amra pơtrut pơplih tong ten lơm ngă tui bruă bơkơnar đah rơkơi đah kơmơi hăng pơsir hĭ hơdôm bruă kiăng hloh brơi đah kơmơi hăng čơđai muai, pơgôp hrưn đĭ tơlơi hơdip mơda brơi đah kơmơi, čơđai muai djuai ania ƀiă amăng tơring čar Gia Lai.

Hăng hơdôm bruă sit nik hăng yôm phăn ngă laih hăng glăk ngă hơmâo djop gưl Khul pơlir hơbit đah kơmơi tơring čar Gia Lai gir run pok pơhai ngă tui, akŏ bruă 8 čang rơmang amra ngă atur brơi hơdôm bruă, hơbô̆ bruă dưi pok pơhai klă hloh hăng hơđong kjăp amăng kual mơnuih djuai ania ƀiă ƀơi tơring čar Gia Lai.