Ƀơi sang ia jrao să Čư̆ Êbur, plơi prong Ƀuôn Ma Thuôt, tơring čar Dak Lak, amai H’Đi Êñuôl lăi, ană ñu duăm ruă na nao đôč, tut nao đih pơ sang ia jrao anun yơh ană 3 thun laih aka ƀu tlâ̆o ia jrao pơgang djơ̆ hmơi kơ ană. Ră anai, ƀu amăng plơi hơmâo lu čơđai muai anet djơ̆ hmơi pơđeh amăng drơi jăn, ñu bơngơ̆t biă mă kơ tơlơi suaih pral anun yơh ba nao ană ñu tlâ̆o vaccin:

"Ƀuh tơlơi pơhing klin djơ̆ hmơi ră anai ƀă lu đơi. Hơmâo neh, wa nai ia jrao pơ sang ia jrao pơtô, iâu pơthưr djop mơnuih tlâ̆o ia jrao pơgang anun yơh thâo hluh ƀiă. Hăng kâo lĕ hŭi kơ ană pơ-ai buai anun yơh ƀu tlâ̆o pơgang hŭi bơbeč djơ̆ kơ tơlơi suaih prak kơ mô̆”.

Ơi Y Suôn Êñuôl, Kơ-iăng Khua sang ia jrao să Čư̆ Êbur, brơi thâo, 1 blan rơgao, să hơmâo čih pioh truh 31 čô mơnuih ƀă duăm djơ̆ hmơi. Mơnuih ruă blung a arăng ƀuh ƀơi sang hră gưl muai Hoàng Anh, ƀơi Ƀuôn Đŭng, tơdơi kơ anun ƀă truh pơ 7 boh plơi pla. Hơdôm čô mơnuih duăm blung a lêng kơ aka ƀu tlâ̆o vaccine. Sang ia jrao să hơmâo ĕp lăng, guang lui anih hơmâo mơnuih ƀă djơ̆ hmơi laih anun pơtrut bruă mă hyu pơtô pơblang kiăng mơnuih ƀôn sang thâo hluh tong ten bruă pơhlôm, pơgang klin duăm ruă. Ơi Y Suôn Êñuôl ră ruai:

"Mơ̆ng blan 8 truh ră anai hơmâo tlâ̆o pơhlôm abih bang amăng djop plơi pla hăng 363 čô čơđai amăng mrô 430 čô čơđai muai, ngă djop giăm 85%. Ră anai, ăt jŭ yap glăi hră čih anăn ƀing čơđai muai aka ƀu tlâ̆o pơgang djơ̆ hmơi. Dơ̆ng mơ̆ng hơmâo klin djơ̆ hmơi ƀă truh ră anai, ƀing gơmơi hơmâo yua Zalo, facebook hăng jơnum ƀing khua plơi brơi jơnum mơnuih ƀôn sang, tơki ƀing ngă bruă gah ia jrao nao pơtô lăi brơi ƀơi anăp mơta, laih anun pôr amăng brô̆ pơtui jua pơhiăp ƀơi să sa wơ̆t hrơi tơjuh sa wơ̆t, rim wơ̆t pôr tui anun amăng 10 mơnit”.

Plơi prong Ƀuôn Ma Thuôt ră anai hơmâo mrô mơnuih ƀă djơ̆ hmơi lu hloh ƀơi tơring čar Dak Lak, hăng 74 čô mơnuih. Anom bruă ia jrao khom pơsir tong ten djop anih hơmâo mơnuih duăm djơ̆ hmơi ƀlĕ pơđeh ƀơi čơđai muai anăm brơi ñu lar hyu prong. Laih dơ̆ng, kơtưn jŭ yap, ĕp lăng, kiăng ƀuh hơdôm mơnuih duăm hăng đing đăo hơmâo mơnuih duăm lu lơ̆m plơi pla, anih pơtum lu mơnuih ƀon sang. Hrŏm hrŏm hăng anun, pơphun hyu sem, pok pơhai brơi tlâ̆o pơhrua vaccine pơgang kơ abih bang ƀing čơđai aka ƀu tlâ̆o pơgang. Ơi Võ Minh Hùng, Khua anom bruă ia jrao plơi prong Ƀuôn Ma Thuột, Dak Lak brơi thâo:

“Hơdră tal sa lĕ ăt kơtưn bruă mă hyu pơtô pơblang brơi thâo hluh ba ană bă tlâ̆o ia jrao pơgang brơi djop. Dua lĕ sit ƀuh khom pơsir mơtam anih hơmâo mơnuih duăm. Klâo lĕ lơ̆m ƀut, nao tơña, ĕp lăng hăng brơi tlâ̆o vaccine pơgang ƀlĕ hmơi Rubela kơ čơđai muai djop 2 arăt jrum kơ čơđai gah yŭ 5 thun amăng plơi pla, ƀôn ƀut hăng djop plơi pla hơmâo mơnuih duăm ruă”.

Yap truh blan 9, tơring čar Dak Lak hơmâo čih pioh truh 136 čô mơnuih ƀă duăm djơ̆ hmơi ƀơi 14/15 boh tơring glông, plơi prong, plơi prong phun. Lăp đing nao lĕ duăm ƀă hmar biă mă amăng 1 blan đôč, truh 100 čô mơnuih ƀă. Abih bang ƀing djơ̆ hmơi čơđai mơ̆ng 1-4 thun, laih anun 2/3 mrô mơnuih aka ƀu tlâ̆o vaccine ôh. Ơi ia jrao Lê Phúc, Kơ-iăng Khua anom bruă ĕp lăng tơlơi duăm ruă tơring čar Dak Lak lăi pơtong, phun ñu hơmâo mơnuih ƀă duăm ƀlĕ hmơi pơđeh hmar hăng lu lĕ, yua tal tlâ̆o ia jrao pơgang vaccine tơ̆i đưn mơ̆ng Hơdră tlâ̆o pơgang pok pơhư tui, anun ngă kơ kman ƀu hŭi kơ ia jrao, hơmâo hĭ duăm ƀă hyu amăng plơi pla:

"Ƀing gơmơi ƀuh tlâ̆o pơgang pok pơhư prong lĕ yôm biă mă hăng ngă hiư̆m pă abih bang amăng anih ƀuh hơmâo mơnuih duăm lĕ brơi djop sang ia jrao pơ anun, anom bruă ia jrao tơring glông jĕ yap glăi mrô čơđai aka bu tlâ̆o pơgang brơi tlâ̆o pơhrua pơgang, pơđĭ tui mrô čơđai dưi tlâ̆o pơgang lu tui. Rơngiao kơ anun, ƀing gơmơi pơtum pơblang rơđah tong ten djop mơnuih duăm ƀlĕ hmơi anun kiăng thâo rơđah, hăng lăi lui hlâo hŭi hơđuh rai kơtang tañ hơmâo hơdră pơsir khut khăt mơtam”.

Ƀlĕ hmơi lĕ tơlơi duăm hơmâo kman ƀă hyu, kman ngă drơi jăn pô ruă tơdu tui, ƀu anăm gơgrong bong glăi hăng kman mơ̆ng rơngiao mut nao amăng drơi jăn, anun čơđai amuñ hơmâo tơlơi ruă yua kman ngă laih anun juăt ba truh tơlơi ruă kơtang kah hăng : Bơbrah rơka rơnah amăng tơngia, tơbiă tek pro, ruă tơsô̆; ruă dlô; ruă kian pơtah čroh; ruă rơnah mơta, čơđai khen pơ-ai buai….Yua kơ anun, kiăng prăp lui pơhlôm hlâo tơlơi duăm ƀlĕ pơđeh djơ̆ hmơi, hrŏm hăng tơlơi gir run mơ̆ng anom bruă ia jrao, mơnuih ƀôn sang ta ăt ba nao čơđai muai tlâ̆o pơgang djơ̆ hmơi djop arăt  jrum pơkă hăng djơ̆ hrơi blan iâu nao tlâ̆o. Sit ƀuh čơđai duăm khom bao nao pơ sang ia jrao mơtam pioh pơkă lăng hăng pơjrao djơ̆ hơdră, hơmâo hơdră pơjrao pơgang tong ten anăm lui ba truh ruă kraih kơtang tui.