“Ngă tui tơlơi bơkơnar bơnai hăng rơkơi hăng pơsir hơdôm tơlơi kiăng hloh pioh kơ đah kơmơi hăng čơđai muai” gah rơwang bruă 8, Khul pơlir hơbit đah kơmơi tơring čar Tuyên Quang hmâo đing nao pok pơhai ƀơi 570 bôh plơi gah 121 bôh să kual neh wa djuai ania ƀiă ƀơi tơring čar. Kiăng ngă tui ba glăi bôh tơhnal truh kih Rơwang bruă, hơdôm gưl khul đah kơmơi tơring čar Tuyên Quang hmâo pơjing giăm truh 340 hơdră grŭp lăi pơhing hyu hmâo tơlơi gum hrŏm wot bơnai hăng rơkơi. Mơ̆ng hrơi hmâo grŭp hyu lăi pơhing plơi pla mă yua lăi pơhing kơ tơlơi bơkơnar bơnai hăng rơkơi, pơjing anih anom hơdip pơhlôm klă kơ đah kơmơi hăng čơđai muai dưi pơtrut kơtang. Yă Hoàng Thị Lan Anh, Kơ-iăng Khua Khul pơlir hơbit đah kơmơi să Hùng Đức, tơring glông Hàm Yên lăi lĕ, bruă pơjing Grŭp hyu lăi pơhing plơi pla jing lăi pơhing, pơsur mơnuih ƀôn sang pơplih tơlơi pơmin, hơdră ngă, djru tlaih lui hơdôm tơlơi kah akô̆, tơlơi ƀu mơ-ak gah rơkơi hăng bơnai amăng sang anô̆ hăng plơi pla:

“Bruă pơjing grŭp hyu lăi pơhing plơi pla anai lĕ amra djru bruă lăi pơhing hyu kơ mơnuih amăng grŭp hăng mơnuih ƀôn sang thâo hluh hloh kơ bơkơnar bơnai hăng rơkơi hăng lăi pơthâo djru gum tơdruă pơjing tơlơi dưm kơnar amăng tơlơi hơdip mơda amăng sang anô̆ pơjing sa bôh sang anô̆ trơi pơđao, yâo mơ-ak”.

Ƀơi să Hùng Đức, tơring glông Hàm Yên, Khul pơlir hơbit đah kơmơi tơring čar ruah plơi Khuôn Then ngă pơphô hlâo Grŭp hyu lăi pơhing plơi pla. Grŭp hmâo 8 čô mơnuih lĕ khul ba jơlan hlâo hăng hmâo bruă lăi pơhing hyu pơsur. Amai Vi Thị Xuân – sa ding kơna amăng grŭp lăi pơhing hyu plơi pla ƀơi anai brơi thâo:

“Hluai tui mông lăi pơhing hyu djru drơi pô kâo ăt kah hăng thâo hluh tơlơi bơkơnar bơnai hăng rơkơi hăng pơgang, pơgăn taih amang amăng sang anô̆, pơgang đah kơmơi hăng čơđai muai lĕ kơnong kơ drơi pô kâo ăt amra lăi pơhing hyu mơn kơ abih bang neh wa mơnuih ƀôn sang amăng plơi pla lĕ thâo hluh tơlơi bơkơnar bơnai hăng rơkơi hăng pơgang tơlơi dưi čơđai muai hăng đah kơmơi kiăng pơgang pơgăn taih amang amăng sang anô̆ ƀơi plơi pla”.

Rơngiao kơ hơdră Grŭp lăi pơhing hyu mơ̆ng plơi pla, hơdôm gưl khul đah kơmơi tơring čar Tuyên Quang dô̆ pơjing phrâo giăm truh 30 hơdră pơphô hlâo anăn păn đăo kơnang pioh lăi pơthâo pơsir tơlơi ƀu mơ-ak tơduă, djru mơnuih hmâo tơlơi amăng sang anô̆ taih amang. Hrŏm hăng anun, Khul pơlir hơbit đah kơmơi tơring čar Tuyên Quang hmâo gum hrŏm laih hăng hơdôm bôh sang hră pơjing hơdôm khul, grŭp “Pô mơ̆ng tơlơi pơplih”. Anai amra lĕ sa tơlơi tŭ yua kơ ƀing čơđai amăng bruă ngă tui tơlơi dưm kơnar bơnai hăng rưklưi, djru pơsir hơdôm tơlơi kiăng hloh kơ čơđai muai, kual neh wa djuai ania ƀiă. 

Adơi Hoàng Thị Khánh Huyền, čơđai sang hră hrăm ƀơi Sang hră rông čơđai djuai ania ƀiă ATK tơring glông Sơn Dương lăi lĕ: gum hrŏm jơnum khul, ñu hăng ƀing gŏp dưi bơkơtuai ngui ngor, lăi pơthâo tơlơi pơhing kơ tơlơi pơmin pran jua hnưr thun bơnai hăng rơkơi. Rơngiao kơ anun drơi pô dô̆ hmâo bôh thâo, tơlơi pơhrăm pơgang pô pioh kơjăp yak nao pơgi kơdih anai:

“Gum hrŏm khul djru kâo thâo hluh kơ tơlơi rơkơi bơnai, tơlơi taih amang amăng sang hră anih hrăm, tơlơi taih amang amăng sang anô̆; djru kâo lăi pơthâo kơ ƀing gơyut amăng sang hră, sang anô̆ bĕ tơlơi taih amang amăng sang anô̆”.

Khul “Pô mơ̆ng tơlơi pơplih” jing sa amăng 4 hơdră phun mơ̆ng Rơwang bruă hăng “Ngă tui dưm kơnar bơnai hăng rơkơi, hăng pơsir hơdôm tơlơi kiăng hloh hăng bơnai hăng čơđai muai”.

Nai Lý Hải Vân, Khua Sang hră rông čơđai djuai ania ƀiă hrăm hră ATK tơring glông Sơn Dương brơi thâo:

“Amra pơhrăm dong bôh thâo kơ ƀing gơyut amăng khul kiăng ƀing gơyut dưi lăi pơhing hăng ƀing gơyut amăng sang hră ăt kah hăng lăi pơthâo hyu djop bôh thâo pioh kơ mơnuih amăng sang anô̆ gơyut ăt kah hăng lơm glăi pơ̆ plơi pla thơ ăt amra hmâo mơn hơdôm bruă ngă pơsur pran jua klă pioh djru kơ plơi pla”.

Bruă pơjing khul hmâo prăp lui kơ čơđai sang hră djuai ania ƀiă lu bôh thâo, hơdră tŭ yua pơtrut ƀing čơđai truh pơhiăp, pơplih tơlơi pơmin, hơdră hrăm, hơdră ngă hăng djru lŏm lui tơlơi among, phiăn sô hơđăp ƀơi kual čư̆ siăng. Ră anai, hơdôm khul anai hmâo djru ngă klă laih hơdôm jơlan hơdră, hơdră bruă, pơsir hơdôm tơlơi bơdjơ̆ nao truh čơđai muai; djru ƀing nai hăng amĭ ama čơđai ngă klă bruă pơtô pơhrăm čơđai hăng pơgang pơgăn tơlơi taih amang, kơtư̆ jua, sĭ mơdrô, dop mă mơnuih, pơdô̆ rơkơi bơnai mơ̆ng muai gah čơđai muai..../.