VOV4.Jarai - Tui hăng tơlơi lăi glăi mơng Anom bruă wai lăng tơlơi duam ruă tơring čar Dak Lăk, ƀơi plơi prong Buôn Hồ phrâo čih pioh hơmâo 8 čô mơnuih ƀă kman SARS-CoV-2, amăng anun hơmâo klin bơƀă nao rai hăng 7 čô mơnuih. Amăng 8 čô mơnuih phrâo ƀuh ƀă klin, hơmâo 6 čô dŏ ƀơi jơlan 15 Âu Cơ, phường Đoàn Kết hăng1 čô dŏ ƀơi 110 Nguyễn Tất Thành, phường An Bình. Ƀing anai lêng bơbjơ̆ nao pô ruă ƀơi phường An Bình. Ha čô lĕ pô mơgat rơdêh prong, dŏ ƀơi phường Thiện An, aka ƀu thâo krăn ƀă mơng hlơi ôh.

Anih pơgăn nao rai ƀơi plơi prong Buôn Hồ yua hơmâo lu mơnuih ƀă klin

Tui hăng bruă hơduah ĕp anih ƀă klin, amăng 8 čô mơnuih, hơmâo ha čô nao pơ anih tum pơƀut lu mơnuih kah hăng sang čơ plơi prong Buôn Hồ, sang bruă prăk. Hơjăn pô mơgat rơdêh prong lĕ ba hyu gơnam pơ lu anih amăng plơi prong Buôn Hồ, hơmâo nao pơ lu tơring čar kah hăng Khánh Hòa, Bình Phước hăng Gia Lai.

Siu H’Mai: Pơblang