VOV4.Jarai - Ƀơi anăp tơlơi hŭi rơhyưt mơng klin Covid-19, tơring čar Dak Lăk pơsit tlâ̆o tañ hloh vaccine arăt 3 laih anun gir ngă giong amăng 3 blan tal 1 thun 2022. Tui hăng ơi Trịnh Quang Trí, Khua anom bruă wai lăng tơlơi duam ruă tơring čar Dak Lăk, ră anai tơring čar phrâo hơmâo Ding jum ia jrao brơi năng ai 300 rơbâo liêu vaccine pơgang Covid-19. Kiăng pơhlôm kơ abih bang mơnuih mơng 18 thun dưi tlâ̆o arăt tal 3, tơring čar Dak Lăk kiăng hơmâo rơbêh 1 klăk 200 rơbâo liêu vaccine. Tui hăng mrô vaccine hơmâo mă, tơring čar amra tlâ̆o brơi hlâo kơ ƀing glăk mă bruă pơgang klin, ƀing tha rơbêh 50 thun, ƀing hơmâo tơlơi ruă hơđăp, anun kah mơng tlâ̆o kơ pô pơkŏn dong. Vaccine hơmâo tlâ̆o pơhrua lĕ vaccine djơ̆ hăng 2 arăt hơmâo tlâ̆o hlâo kơ anun mơn.

Siu H’Mai: Pơblang