VOV4.Jarai - Tui hăng tơlơi pơhing mơng Anom git gai pơgang klin Covid-19 tơring čar Dăk Lăk, pô ƀă klin phrâo anai lĕ ayong T.V.X (tơkeng thun 1976, dŏ ƀơi thôn 5, să Čư̆ Mốt, tơring glông Ea H’Leo, Dăk Lăk). Ayong T.V.X lĕ mơnuih mă bruă pơ kual sang čơ Bình Điền (ƀon prong Hồ Chí Minh) phrâo glăi pơ plơi pla ñu. Lơ 4/7 ayong T.V.X găn rơdêh glăi pơ Dăk Lăk, amăng mông đĭ rơdêh, ayong T.V.X hơmâo gôm ƀô̆ laih anun ƀu hiăp hơbit hrŏm pô hlơi hăng rơdêh ôh. Mơguah lơ 5/7, tơdơi kơ trun pơ km92 Jơlan 14, ayong T.V.X đĭ rơdêh thut glăi pơ Sang ia jrao să Čư̆ Mốt pơhaih, laih anun glăi pơ sang ñu pơ hmua ƀơi thôn 5, să Čư̆ Mốt, dŏ pơčlah mă pơ sang laih anun ƀu jê̆ giăm hrŏm pô hlơi ôh. Truh lơ 6/7, ayong T.V.X pơ-iă drơi, pơhañ, hơdrap, giong anun ñu lăi pơthâo pơ Sang ia jrao să laih anun hơmâo arăng kiăng nao pơ Sang ia jrao tơring glông Ea H’Leo khăm lăng. Lơ̆m pơčrang kman tañ, brơi ƀuh ñu ƀă kman Sars-CoV-2. Tơdơi kơ anun, mă ia dung pơčrang hăng RT-PCR brơi ƀuh ñu ƀă kman Sars-CoV-2.

Siu H’Mai: Pơblang