VOV4.Jarai-Ngă tui tơlơi jak iâu abih bang mơnuih ƀôn sang gir run pran jua pơkơdong glăi hăng klin Covid 19, hrom hăng amăng dêh čar ta, mơnuih ƀôn sang Dak Lak ăt hlăk hur har pơčruh prăk,  djru hrom Keh prăk blơi vaccine hăng ngă lu bruă pơgang klin.

Lu sang bruă, anom bruă sĭ mơdrô hăng mơnuih ƀôn sang, mah bưp tơlơi tơnap tap amăng bruă ngă hmua, sĭ mơdrô hăng tơlơi hơdip gleh glar ăt hur har djru hrom pran jua, prăk kăk, dram gơnam yua kơ abih bang ană plơi pla.

Thun tha rơma laih ăt aka ƀu hruaih bruă ôh, mă yua măi telephon phrâo rơgơi, ơi Y Tuaih Niê, djuai ania Êđê, dŏ pơ phường Ea Tam, plơi prong Ƀuôn Ma Thuôt, tơring čar Dak Lak hơmâo kơnang kơ ană đah kơmơi ñu pơtô brơi pơjing anăn pioh mơ-it prăk blơi vaccine pơgang Covid 19. Ơi Y Tuaih lăi, hmư̆ tơlơi pơhing, ñu hŭi biă mă anŏ ƀă hyu klin lar hyu tañ laih anun tơlơi tơnap tap mơ̆ng ƀing ơi ia jrao dŏ pơjrao pơ anih blung a, kơsung nao pơ anăp pơgang klin. Ñu ăt kiăng djru hrom sa črăn anet thơ hrom hănh dêh čar ta pơgang klin Covid 19:

"Djru hrom keh prăk blơi ia jrao vaccine pơgang klin Covid 19 kâo mơak biă mă hăng dong yua bruă anai. Yua dah amăng anun yôm hloh lĕ kiăng pơgang ba tơlơi suaih pral hăng pơgang khut khăt klin Covid”.

Lu mơnuih, anom bruă hăng ƀing ngă bruă sĭ mơdrô pơčruh prăk hăng gơnam tam pioh blơi vaccine laih anun gơnam yua mă bruă pơhlôm pơgang klin tơring čar Dak Lak

Ƀu kơnong mơ-it tơlơi pơhing telephôn đôč ôh, ơi Phan Quang Vũ, Kơ-iăng Khua kông ty pơčruh ngăn sang măi drai apui lơtrrik Ƀuôn Đôn, brơi thâo, ngă tui tơlơi jak iâu mơ̆ng Jơnum min wai lăng djop djuai ania mơnuih mơnam Việt Nam tơring čar Dak Lak, kông ty hơmâo jak iâu abih bang ƀing mă bruă, djru, pơčruh hăng jak iâu pơčruh hơmâo 50 klăk prăk hrom bruă pơgang klin:

“Ngă tui tơlơi jak iâu amăng dêh čar ta gum tơngan hrom, pran jua pơgang klin Covid 19 lĕ kông ty hơmâo jak iâu rĭm čô mơnuih mă bruă djru boh ƀiă sa hrơi prăk blan, kơnong kông ty hơmâo mă yua prăk răk pioh hăng prăk mơ̆ng kông ty pơčruh hrom.

Bruă ngă anun mơ̆ng ƀing adơi ayong adơi amai mă bruă amăng kông ty dong yua biă mă tơlơi anai, lu mơnuih rong rơkâo pơcruh dơ̆ng gah rơngiao tơlơi pơtrun mơ̆ng kông ty. Ăt čang rơmang klin tañ abih, rĭm čô thâo hluh bruă pô ngă kiăng tañ tơbiă đuăi mơ̆ng bơyan klin ră anai"”

Bơ tui hăng ơi Vũ Đình Tân, Khua kông ty pơčruh ngăn apui lơtrik dar hăng jua angin Trung Nam Dak Lak, ƀu kơnong pơčruh hrom amăng keh prăk blơi vaccine đôč ôh, khua mua Group anom bruă sĭ mơdrô hơmâo git gai djop sang bruă gah group hur har ngă hrom bruă pơgang klin ƀơi anih, plơi pla gơñu dŏ hăng pok pơhai kơčăo bruă. Kơnong ƀơi Dak Lak, Group hơmâo pơčruh 1 klai prăk pioh dong yua rơnoh prăk blơi vaccine hăng gơnam yua pơgang klin.

“Hăng Kơnuk kơna lĕ phrâo anai Group Trung Nam ăt djru kơ kơnuk kơna 1 klăk dolar Mi kơ bruă blơi vaccine pơgang Covid 19. Bơ hăng tơring čar Dak Lak lĕ ră anai Group ăt git gai brơi hơdôm kông ty ngă ding kơna ăt khom hơmâo tơlơi glăm ba, rơngiao kơ djru prăk blơi vaccine kông ty ăt jak iâu djru dơ̆ng mơ̆n”.

Ƀu kơnong pơčruh prăk đôč ôh či blơi vaccine, lu anom bruă dŏ djru hrom amăng bruă mă pơhlôm pơgang klin ƀơi tơring čar

Tui hăng ơi Lê Xuân Sương, Kơ-iăng Khua Jơnum min djop djuai ania mơnuih mơnam Việt Nam tơring čar Dak Lak, kơnong 1 wơ̆t hrơi tơjuh đôč, mơ-it hră jak iâu, tal pơphun prong kơ bruă pơgang Covid 19, anom bruă anai tŭ mă 5 klai 100 klăk prăk mơ̆ng djop sang bruă, mơnuih ƀôn sang hăng ƀing sĭ mơdrô pơčruh prăk. Mơ̆ng rơnoh prăk anai, tơring čar amra hơmâo akŏ bruă pơpha prăk blơi vaccine, gơnam yua mă bruă djru kơ mơnuih dŏ mă bruă pơhlôm pơgang klin, pơjrao duăm ruă pơ anih hŭi rơhyưt:

“Lơ̆m hmư̆ tơlơi jak iâu ƀuh abih bang hur har ngă hrom. Mă amăng mông klin kheng tơlơi sĭ mơdrô tơnap tap samơ̆ hăng pran jua yua kơ ană plơi pla, ƀing ngă bruă sĭ mơdrô, sang bruă prăk, ƀing mơnuih pơdrong hơmâo pran jua čơmah hăng hơdôm sang anŏ sĭ mơdrô hơmâo pơčruh prăk, gơnam tam hrom soh.

Rơngiao kơ anun, djop gưl mơnuih ƀôn sang, lu mơnuih tơnap tap samơ̆ ăt kleč mă prăk amăng sang anŏ pioh mơ-it nao pơ kual hơmâo klin, tăp năng ƀu hơmâo prăk ôh gơñu nao mơ-it hăng gơnam"”

Amăng tal klin anai, tơring čar Dak Lak hơmâo čih pioh 4 čô mơnuih ƀă Covid 19. Mah hlăk dong ƀơi anăp tơlơi tơnap tap yua bơbeč mơ̆ng klin kheng, samơ̆ mơnuih ƀôn sang, ană plơi djop anih hăng ƀing ngă bruă sĭ mơdrô amăng tơring čar anai hlăk gum sa pran jua djru pơtrut đuăi klin kheng duăm ruă.

Nay Jek: Pơblang