VOV4.Jarai-Găn rơgao hơdôm bruă mă sư̆ rơbư̆ blung a, tơdơi kơ sa blan ngă tui hơdră guang dar hĭ plơi pla kiăng pơgăn klin Covid 19, mơnuih ƀôn sang lu plơi pla pơ să Čư̆ Nĕ, tơring glông Krông Ƀŭk, tơring čar Dak Lak hơmâo pơblih bruă ngă kiăng lăp djơ̆ gêh găl hơđong tơlơi hơdip mơda, tañ pơphun glăi bruă ngă hmua. Dŏ hơđong amăng sang, samơ̆ hmua pơdai ăt hiam klă, hlô mơnong rông ăt djop mơnong ƀong mơ̆n yua kơ hơmâo tơlơi djru mơ̆ng grup mă bruă pơhlôm, pơgang klin Covid plơi pla hăng hlăk ai tơdăm dra pơyơr pran jua gum hrom.

Dưi glăi pơ sang tơdơi kơ 1 blan dŏ pơjrao tơlơi ruă yua klin Covid 19, amai H’Trâm Kpă, dŏ pơ ƀôn Đrao, să Čư̆ Nĕ, tơring glông Krông Ƀŭk ƀu pơdŏp ôh tơlơi mơak yua dưi hlao laih duăm ruă hăng dưi bưp glăi ană đah kơmơi ñu dŏ muai anet. Amai H’Trâm ră ruai, abih ha blan rơgao, dơ̆ng mơ̆ng abih 4 čô mơnuih amăng sang anŏ ƀă klin Covid, ñu hŭi biă mă, bơngơ̆t djop mơta.

Ƀing pơyơr pran jua djru wai lăng ba čơđai mua amĭ gơñu dŏ pơjrao Covid 19

Amăng hrơi blan dŏ pơjrao, mah hơmâo ƀing ơi ia jrao, ƀing mă bruă gah ia jrao hăng tơhan djru pơyơr pran jua wai lăng, djru ba klă hiam biă mă, samơ̆ amai H’Trâm ăt ƀu abih bơngơ̆t ôh kơ mơnuih amăng sang anŏ ñu hăng hlô mơnong rông pơ sang lơ̆m abih sang anŏ khom nao dŏ pơčlah phara, pơjrao tơlơi ruă, bơ plơi pla lĕ khom guang dar hĭ khŏp baih.

“Juăt ñu mơnuih ƀôn sang khom nao pưk hmua ia djuh, ĕp ƀong huă kơ sang anŏ, samơ̆ klin kheng djơh hăng anai ƀu thâo tơbiă pơ rơngiao ôh. Dơ̆ng mơ̆ng hơmâo klin kâo ĕp lăng na nao tơlơi pơhing amăng facebook ăt kah hăng hmư̆ tơlơi pơhing mơ̆ng tơring glông, hơmâo lu mơnuih hiam klă pran jua čơmah djru ană plơi pla, ƀu kơnong hơdôm sang anŏ tơnap tap đôč ôh, abih bang sang anŏ F0, F1 lêng kơ dưi djru ba soh".

Rơbêh 1 blan guang dar, tơlơi hơdip mơda mơnuih ƀôn sang să Čư̆ Nĕ lŭk pŭk mơtam. Ƀuôn Đrao hăng Ƀuôn Ktơ̆ng Drun, 440 boh sang anŏ, hơmâo 439 boh sang anŏ djuai ania Êđê, dŏ kơnang kơ bruă ngă hmua pla kơphê hăng phun pla pơkŏn. Ră anai truh bơyan hơpuă yuă lu phun pla boh troh, pơdai kơtor, boh sầu riêng hăng jĭ rơ̆k kơphê. Samơ̆ yua kơ khom ngă djơ̆ tơlơi pơtrun pơgang klin, djop mơnuih khom dŏ pơ sang abih.

Ƀing pơyơr pran jua djru yuă rơ̆k čem rơmô hăng hlô mơnong rông lơ̆m adai hlăk hơjan angin laih anun jơlan nao rai dơlut tơbor tơnap tap

Bruă mă ngă hmua, rông hlô mơnong, pĕ boh troh lêng kơ hơmâo ƀing tơdăm dra pơyơr pran jua soh djru ngă bruă brơi. Ayong Y Bih Êban, ding kơna nao djru Ƀuôn Đrao lăi:

“Hơdôm bruă mă djru mơnuih ƀôn sang amăng anih guang dar lĕ khom djru ĕp mơnong ƀong čem un mơnŭ, yuă rơ̆k čem rơmô, čem asâo eo brơi kơ pô sang, yua sang anŏ arăng nao dŏ pơ anih pơčlah abih ƀu hơmâo pô dŏ pơ sang ôh. Djru mơnuih ƀôn sang blơi mơnong ƀong huă, ƀing tơdăm dra pơyơr pran jua soh yơh hyu blơi hăng ba nao tơl sang mơnuih ƀôn sang. Sit hơmâo ƀing mơnuih čơmah djru gơnam ƀong huă, kah hăng djru hơbơi pơtơi, boh troh, añăm pơtam hla rơ̆k, mah adai hơjan, tlam mơmŏt hai ƀing adơi ayong mă bruă đĭ rơdêh kai, rơdêh thut nao tơl rĭm boh sang amăng plơi pla ƀơk mơnong ƀong huă kơ mơnuih ƀôn sang dŏ amăng sang anŏ ƀu thâo tơbiă hyu hŭi kơ klin kheng”.

Čư̆ Nĕ lĕ anih ƀă klin prong, giăm 300 čô mơnuih ƀă kman Covid 19, amăng anun lu hloh lĕ 2 boh plơi, ƀôn Đrao hăng ƀôn Ktơ̆ng Drun truh 240 čô mơnuih ƀă. Mơ̆ng lơ 22/8 truh ră anai, đơ đam să hơmâo 17 boh plơi arăng brơi guang dar hĭ, 4 boh plơi pơkŏn ngă tui hră pơčrâo mrô 16. Să akŏ pơjing 21 grup hyu djru gum ba laih anun grup ngă bruă pơgang Covid amăng plơi pla, anai yơh ƀing ngă bruă phun dưi đuăi hyu djru ană plơi hăng krăp pơtruh brơi tơlơi kiăng kơplah wah mơnuih ƀôn sang hăng khua mua gong gai kơnuk kơna.

Djru mơnuih ƀôn sang pĕ boh troh hơpuă yuă gơnam đang hmua

Ding kơna amăng grup amra jao bruă hyu blơi mơnong ƀong huă, añăm pơtam, kơ djop sang anŏ, arăng mơ-it prăk hyu blơi, ƀudah tŭ mă gơnam djru kah hăng ia jrao, mơnong ƀong huă, akhăn gôm ƀô̆; ĕp anih sĭ mơdrô boh troh mơ\ng ană plơi hăng anih hyu blơi samơ̆ ƀing anai huăi ƀă klin ôh, anun dưi đuăi hyu hăng hơmâo hơdră pơhlôm tong ten, sum ao hrôm drơi jăn hăng pruih ia jrao pơdjai mač kman laih. Ƀing hyu djru anun hăng grup pơgang Covid amăng plơi, glăm ba bruă wai lăng čem rông ană bă čơđai muai hơdôm sang anŏ hơmâo mơnuih ƀă klin samơ̆ čơđai huăi ƀă klin arăng brơi dŏ pơ sang, truh ră anai  hơmâo 6 čô čơđai khom pơčlah hăng amĭ ama sang anŏ. Să djru ba ia tơsâo, mơnong ƀong huă, ƀing nao djru anun yơh pơblih nao rai tơnă asơi hơbai añăm brơi kơ čơđai muai dŏ glăi pơ sang anŏ. Ơi Hoàng Văn Thịnh, Khua Jơnum min djop djuai ania mơnuih mơnam să Čư̆ Nĕ brơi thâo:

“Tơdơi kơ să Čư̆ Nĕ phrâo guang dar 2-3 hrơi lĕ  ƀing mơnuih čơmah amăng tơring čar Dak Lak lêng kơ nao djru ba soh kơ Čư̆ Nĕ, biă mă ñu djru gơnam yua gah ia jrao, pơgang brơi kơ ƀing adơi ayong mă bruă hyu pơgang klin rơnuk rơnua hăng ƀơk pha gơnam kơ mơnuih ƀôn sang kiăng huăi ư̆ rơpa ƀudah lui raih hĭ amăng mông tơnap tap truh. Grup ngă bruă Covid plơi pla lĕ hrom hăng tơdăm dra djru bruă hur har biă mă laih anun gum pơgôp nao rai ngă hrom pơgang klin khut khăt.

 Lu khul grup tơdăm dra nao pơyơr pran jua djru ană plơi, grup Covid amăng plơi la mah hơmâo ană bă dŏ anet pơ sang anŏ ƀudah jơlan nao rai tơnap tap biă mă amăng plơi hơjan hlim tơbor, dơlut ăt khom nao mơ̆n djru kơ mơnuih ƀôn sang amăng anih dŏ pơčlah ƀu thâo tơbiă hyu pơ rơngiao”.

Djru mơnuih ƀôn sang wai lăng čem rông hlô mơnong rông

Tơdơi kơ 1 blan pơčlah, guang dar hĭ laih anun ngă tui hơdră ƀu brơi mơnuih mơnam tơbiă hyu kiăng pơgang klin, truh ră anai, tơlơi pơhingklin kheng pơ Čư̆ Nĕ dưi pơgăn laih, ƀu hơmâo mơnuih ƀă kman amăng plơi pla dơ̆ng tah. Gong gai kơnuk kơna hăng mơnuih ƀôn sang hlăk run ran pran jua kiăng pơblih jing anih pơkă ia iom kual klin, tañ pơpuh đuăi klin duăm ruă djai mơnuih anai, kiăng ba glăi tơlơi hơdip mơda, bruă mă kah hăng tơđar.

Nay Jek: Pơblang