VOV4.Jarai - Bruă dưi ngă hăng djă bong tơlơi rơnuk rơnua, hơđong kơjăp amăng bruă man pơdong plơi pla phrâo yôm biă mă, djru pơtrut đĭ hơdôm hơnong pơkă pơkŏn. Ƀơi Dăk Nông hơmâo akŏ pơjing hăng pok prong hơbô̆ bruă pơhlôm rơnuk rơnua ƀơi hơdôm plơi pla kah hăng grup hlăk ai pơgang, pơkơdong glăi ƀing ngă soh, plang pôr pơthâo, jua teng hăng camera rơnuk rơnua. Mơng anun djru ngă giong hơnong pơkă rơnuk rơnua amăng bruă man pơdong plơi pla phrâo.

Tui hăng tơlơi pơtŏng glăi mơng Anom git gai hơdôm hơdră bruă dêh čar tơring čar Dăk Nông, hơnong pơkă rơnuk rơnua plơi pla lĕ tơlơi tơnap ngă biă, yua ñu kiăo tui lu mơta tơlơi mơn, hơmâo lu mơnuih gum ngă laih anun amuñ rung răng. Samơ̆ pơsit anai lĕ tơlơi yôm phun, pơhlôm brơi kơ bruă dưi ngă hăng djă bong lu hơnong pơkă pơkŏn, hnun yơh amăng lu thun rơgao, djŏp gưl, gong gai lêng lăng ba git gai, črâo bruă.

Rim thun, djŏp ping gah, gong gai lêng hơmâo tơlơi pơtrun, akŏ bruă pơhlôm rơnuk rơnua hơđong kơjăp. Hơdôm plơi pla git gai ngă tŭ yua bruă Abih bang mơnuih gum pơgang rơnuk rơnua Lŏn ia. Tơhan kông an djŏp gưl čih pơkra hơdră pơhlôm rơnuk rơnua kơđi čar hăng hơđong kơjăp mơnuih mơnam, pơlir hăng tơlơi hơmâo sit nik ƀơi anih dŏ, pơsir hĭ djŏp bruă tơnap, ngă dŏ tơdu ƀơi tơring čar.

Hmư̆ hing hloh, tơring glông Dăk R’lấp, tơring čar Dak Nông hơmâo akŏ pơjing hăng pok prong hơbô̆ bruă pơhlôm rơnuk rơnua ƀơi hơdôm boh plơi pla kah hăng grup hlăk ai pơgang glăi ƀing ngă soh, anih wai lăng rơnuk rơnua, jua teng hăng camera lăng sŭ...Mơng anun, tơring glông ƀu kơnong pơtrut đĭ tơlơi gơgrong mơng ling tơhan wai lăng phun kah hăng kông an, tơhan ƀô̆ đô̆i, tơhan amăng plơi pla đôč ôh mơ̆, hơmâo pơhrui abih bang mơnuih ƀon sang gum wai lăng rơnuk ronwua. Yua hnun, 9/9 boh să ƀơi tơring glông lêng dưi ngă hơnong pơkă rơnuk rơnua plơi pla.

Ƀơi tơring glông Dăk Mil, djŏp ping gah, anom bruă, khul grup pơtrut ngă hrŏm, pơphun lu ruă kah hăng jak iâu Abih bang mơnuih ƀon sang pơgang rơnuk rơnua Lŏn ia; pôr pơthâo kơ ƀing khua mua, mơnuih mă bruă, mơnuih ƀon sang thâo hluh kơ tơlơi yôm phăn mơng bruă wai lăng rơnuk rơnua plơi pla. Mơng anun, tơlơi rơnuk rơnua mơnuih mơnam ƀơi hơdôm boh să hơmâo pơhlôm hơđong, ƀing ngă soh, ngă sat amăng plơi pla hơmâo hơdư̆ mơn. Hơdôm hơbô̆ bruă kơ grup pơgang, pơgăn tơlơi ataih amang amăng sang anŏ, grup sang anŏ wai lăng mă pô tơlơi rơnuk rơnua, sang hră rơnuk rơnua, pơtrut đĭ tơlơi tŭ yua.

Ƀơi tơring glông Dăk Song, hơbô̆ bruă “Jua teng rơnuk rơnua” gum djru ngă giong hơnong pơkă rơnuk rơnua hơđong kơjăp amăng bruă man pơdong plơi pla phrâo. Kơnong ƀơi thôn 7 hăng thôn 8 să giăm guai dêh čar Thuận Hà hơmâo dưm 5 boh teng hăng dưm ƀơi anih hơmâo lu mơnuih dŏ. Rim wơ̆t hmư̆ jua teng, jua ñu mơñi amăng rơwang 1,5km. Tơlơi kơ hmư̆ jua teng, amra hơmâo grup wai lăng rơnuk rơnua nao hlao pơ anih anun mơtăm kiăng thâo hăng pơsir bruă. Ơi Nguyễn Đình Lương, Khua kông an să Thuận Hà, tơring glông Dăk Song brơi thâo: pơhmu hăng hlâo adih, tơlơi rơnuk rơnua ƀơi thôn 7, thôn 8 hơmâo lu tơlơi pơplih laih, biă ñu mơng hrơi hơmâo hơbô̆ bruă taih teng lĕ aka ƀu hơmâo bruă arăng dŏp gơnam ôh. Tŭ yua sit nik mơng hơbô̆ bruă anai lĕ ngă mơdưh tơlơi thâo hluh mơng ană plơi pla, thâo ngă tui tơlơi phiăn, kơđiăng hloh, gum hrŏm hyu ĕp, pơƀuh pô ngă soh. Mơng anun, anom apăn bruă tañ ƀuh, pơgăn hĭ bruă arăng ngă soh hăng pơsir hĭ tơlơi truh gah rơnuk rơnua amăng plơi pla.

Tui hăng tơlơi pơtŏng lăng mơng Anom git gai hơdôm hơdră dêh čar pơtrun tơring čar Dăk Nông, tơdơi rơbêh 10 thun ngă Jơlan hơdră dêh čar pơtrun man pơdong plơi pla phrâo rơwang thun 2010-2020, bruă pơhlôm rơnuk rơnua amăng kual hơmâo lu tơlơi pơplih. Amăng anun, tơhan kông ang pơphô bruă, rơkâo kơ ping gah, gong gai ngă klă, pơsir tañ hơdôm anih hơmâo tơlơi bơrơdjơ̆, bơrơsua, ƀŏm nao rai, ngă hiam kơ bruă pok pơhai hơdôm kơčăo bruă ăt kah hăng bruă pơđĭ kyar bơwih ƀong - mơnuih mơnam.

Truh ră anai, tơring čar Dăk Nông hơmâo 45/60 boh să glăk dưi ngă hăng djă bong hơnong pơkă rơnuk rơnua plơi pla hăng 75%. Amăng rơnuk đĭ kyar, kiăng djă bong, pơđĭ tui tơlơi dưi ngă, khŏm kiăng tơlơi gir hloh mơng ping gah, gong gai hăng mơnuih ƀon sang amăng bruă man pơdong plơi pla phrâo. Tơring čar Dăk Nông glăk pơtrut man pơdong plơi pla phrâo kơtang hloh, khŏm kiăng hơmâo abih bang anom bruă čar, mơnuih ƀon sang, pran jua ngă bruă kơjăp mơng ling tơhan, ƀu dưi ngă amưng, khŏm kơđiăng, ƀu dưi pơ-ai ôh.