VOV4.Jarai - Mơguah lơ 3/8, tơring čar Dak Nông hơmâo dong 7 čô mơnuih ƀă virus Sars-Cov2. Amăng anun hơmâo 6 čô lĕ mơnuih mă bruă glăi mơng hơdôm tơring čar kual Dơnung, 1 čô mơnuih F1 yua jê̆ giăm hăng mơnuih ƀă klin lĕ đah kơmơi anăn H.L.T, thun tơkeng 2004, dŏ ƀơi tơring glông Dak Glong glăi mơng ƀôn prong Hồ Chí Minh. Abih bang mơnuih ƀă klin anai hơmâo pơčlah pơƀut tơdơi kơ glăi mơng kual hơmâo klin.

Tơdơi pơčrang lăng ƀă virus Sars-Cov2, gơnong bruă ia jrao hrŏm hăng hơdôm anom bruă bơdjơ̆ nao hơmâo ba ƀing pô anai nao pơ anih pơčlah pơƀut amăng tơring čar. Gơnong bruă ia jrao hơmâo ječ ameč kiăo tui ĕp 25 čô mơnuih F1yua  jê̆ giăm hăng glăk ječ ameč pel ĕp anih ƀing pô anai găn nao laih dong ƀing mơnuih jê̆ giăm hăng ƀing gơñu amăng 14 hrơi hlâo anun. Truh ră anai, tơring čar Dak Nông hơmâo abih bang 96 čô mơnuih ƀă klin Covid-19 ƀơi djop tơring glông, plơi prong amăng tơring čar. Amăng anun hơmâo 3 čô pơjrao suaih laih hăng dưi glăi pơ sang.  

Siu Đoan: Poblang