VOV4.Jarai - Tlam lơ 2/8, ƀơi anih pơjrao mơnuih ƀă klin Covid-19 tơring čar Dak Nông, gơnong bruă ia jrao tơring čar hơmâo jao hră pơsit brơi glăi pơ sang kơ 2 čô mơnuih ƀă klin tơdơi kơ pơjrao suaih. Dua čô arăng brơi glăi tal anai lĕ mơnuih ƀă klin mrô 26.004 Đ.Q.N (thun tơkeng 1995, dŏ ƀơi tơring kual Krông Kmar, Krông Bông, Daklak) lĕ mơnuih mơgăt rơdêh mơng ƀôn prong Hồ Chí Minh glăi pơ Buôn Ma Thuột (Daklak) amăng lơ 8/7. Mơnuih tal dua lĕ đah kơmơi ƀă klin mrô 31.604 C.T.Q (thun tơkeng 1966, dŏ ƀơi ƀut plơi 7, să Đăk Wer, Dak R’Lấp, Dak Nông).

Tui hăng hơdră pơjrao mơng Ding jum ia jrao, ră anai dua čô pô anai suaih laih hăng dưi brơi glăi pơ sang. Hlâi anun, tơring čar Dak Nông hơmâo jao hră pơsit pơjrao suaih brơi mơnuih ƀă klin mrô 40.924 V.H.L.E (thun tơkeng 1991, dŏ ƀơi să Mỹ An, tơring glông Chợ Mới, An Giang). Truh tlam lơ 2/8, Dak Nông hơmâo 89 čô mơnuih ƀă klin Covid-19 ƀơi 7 tơring glông, plơi prong.

Siu Đoan: Pơblang