VOV4.Jarai- Tlam lơ 22/7, tơring čar Dak Nông ƀuh mơnuih ƀă klin tal 19 yua lar hyu amăng mơnuih mơnam. Anai lĕ mơnuih ƀă klin aka ƀu thâo mơng pă. Mơnuih ƀă klin lĕ N.T.B. thun tơkeng 1975, dŏ ƀơi ƀut plơi 2, phường Nghĩa Tân, plơi prong Gia Nghiã, Dak Nông. Pô anai amra ƀuh ƀă klin lơ̆m pơčrang lăng ƀơi sang ia jrao prong tơring čar Dak Nông, pơčrang lăng tañ ƀuh ƀă virus Sars-Cov2, tŏ tui mă ia adung pơčrang lăng ƀơi anom bruă wai pơgang klin tơring čar hăng RT-PCR ăt ƀuh ƀă virus Sars-Cov2.

Tui hăng hơduah ĕp, pô anai lĕ mơnuih sĭ mơdrô gơnam tam, hơdip amăng plơi pla đôč, hlâo anun ñu bưp mơnuih mơgăt rơdêh pơgiăng gơnam tam mơng tơring čar hơmâo klin Covid-19 anun lĕ Bình Dương, Đồng Nai, Dak Lak. Tơdơi kơ pơčrang lăng ƀă virus Sars-Cov2, gơnong bruă ia jrao hơmâo ba pô anai nao pơ anih pơjrao brơi mơnuih ƀă klin Covid-19 amăng tơring čar. Hơdôm anom bruă bơdjơ̆ nao ječ ameč pel ĕp anih pô anai găn nao rai, tui hăng pel ĕp hơmâo 24 čô mơnuih jê̆ giăm hăng pô anai. Ră anai ling tơhan tŏ tui ĕp ƀing mơnuih pô anai bưp amăng 14 hrơi laih rơgao.

Siu Đoan: Pơblang