VOV4.Jarai - Tlam lơ 14/7, tơring čar Dăk Nông hơmâo mơnuih tal 4 ƀă virus SARS-CoV-2. Pô ruă anai lĕ đah kơmơi anăn ñu N.T.L, tơkeng thun 1972, ñu lĕ F1 mơng pô ruă 28474, glăk hơmâo pơčlah hrŏm pơ Sang ia jrao tơring glông Krông Nô mơng lơ 11/7. Tơdơi kơ hmư̆ hơmâo mơnuih ruă, anom bruă ia jrao hrŏm hăng ƀing apăn bruă hơmâo nao pơčlah hăng ba pô ruă đĭ hăng rơdêh ia jrao mơng Sang ia jrao tơring glông Krông Nô nao pơ anih pơjrao mơnuih ƀă klin Covid-19 tơring čar Dăk Nông, laih dong pơphun pruih jrao pơdjai kman abih bang anih pô anai dŏ hlâo kơ anun. Ƀing apăn bruă hơmâo hyu ĕp, hơduah tơña ƀing dŏ jê̆ giăm, blung a ĕp ƀuh 3 čô dŏ jê̆ hăng pô ruă anun lĕ: rơkơi ñu dŏ hrŏm ha anih pơčlah, pô pơkă hyuh drơi jăn hăng pô mă ia dung pơčrang kman. Ră anai, anom bruă ia jrao ăt glăk hyu ĕp dong mơn ƀing jê̆ giăm hăng pô ruă anai.

Siu H’Mai: Pơblang