VOV4.Jarai-Tom brơi, lơ 30/7, ƀơi anih pơjrao mơnuih duăm ƀă Covid 19, Gơnong bruă ia jrao tơring čar Dak Nông hơmâo jao hră pơsit kơ mơnuih duăm tal 40924. Pô ruă anai đah rơkơi anăn V.H.L.E ngă bruă mơgăt rơdêh, thun tơkeng 1991, dŏ pơ plơi Mỹ Long, să Mỹ An, tơring glông Chợ Mới, tơring čar An Giang.

Tơdơi kơ sa rơwư̆ pơjrao, boh tơhnal ĕp glăi kman sars-cov-2 mơ̆ng pô ruă anai hơdôm hrơi, lơ 19/7, lơ 26/7 hăng lơ 28/7 lêng kơ ƀu ƀuh kman dơ̆ng tah. Truh lơ 29/7, pô ruă anai arăng brơi dŏ pơčlah abih 15 hrơi laih, laih anun dua wơ̆t pơčrang kman hăng RT-PCR lêng kơ ƀu ƀuh kman ôh, pơkă lăng drơi jăn pran jua suaih pral sit nik laih hăng djop tơlơi gêh găl tơbiă mơ̆ng sang ia jrao.

Ră anai, anih pơjrao mơnuih ƀă Covid 19 tơring čar Dak Nông mơ̆ng lơ 9/7 truh ră anai tŭ jum hăng hlăk pơjrao brơi 30 čô mơnuih ruă. Ră anai tơlơi suaih pral mơ̆ng ƀing ruă anai hơđong ƀiă laih, lu mơnuih pơčrang kman 1-2 wơ̆t ƀu ƀuh kman dơ̆ng tah. Amăng hrơi anun mơ̆n, tơring čar Dak Nông čih pioh dơ̆ng hơmâo 4 čô mơnuih ƀă Covid 19, pơđĭ tui mrô ƀă amăng tơring čar anai 54 čô.

Nay Jek: Pơblang