VOV4.Jarai - Tui hăng Gơnong bruă ia jrao tơring čar Dăk Nông, truh ră anai, hơdôm boh tơring glông, plơi prong hơmâo tlâ̆o giong laih vaccine pơgang Covid-19 tal 1. Tal 1 tơring čar Dăk Nông hơmâo Ding jum ia jrao kah pơpha rơbêh 9.000 liêu vaccine pơgang Covid-19. Kiăng bruă tlâ̆o pơgang tŭ yua, anom bruă ia jrao Dăk Nông hơmâo pơphun tlâ̆o ƀơi 8 anih anun lĕ: Sang ia jrao prong tơring čar hăng 7 Anom bruă ia jrao tơring glông.

Ƀing dưi tlâ̆o hlâo amăng tal anai lĕ: ƀing khua, mơnuih mă bruă gah ia jrao, khua mua mơng Anom git gai, mơnuih pơgang klin phun...tui Tơlơi pơtrun mrô 21 mơng Kơnuk kơna. Gơnong bruă ia jrao Dăk Nông brơi thâo, tar ƀar tơring čar hơmâo rơbêh 10.200 čô mơnuih hơmâo tlâ̆o vaccine pơgang Covid-19 tal 1. Tơdơi hrơi tlâ̆o hơmâo rơbêh 1.700 čô mơnuih ƀuh nam ruă kah hăng duam, kơtal, ruă ƀơi anih tlâ̆o, pơtah, laih huăi hơmâo pô kơtuă kơ ia jrao kơtang ôh. Ră anai ƀing hơmâo tlâ̆o suaih pral mơn.

Siu H’Mai: Pơblang