VOV4.Jarai-Lơ 26/4, tơring čar Dak Nông pok pơhai bruă tlâ̆o ia jrao vaccine pơgang Covid 19 blung a kơ ƀing nai ia jrao, ơi ia jrao, mơnuih mă bruă amăng bruă pơhlôm pơgang klin pơ anăp. Sang ia jrao prong Dak Nông hăng anom bruă ia jrao plơi prong Gia Nghĩa lĕ dua boh sang bruă dưi brơi tlâ̆o pơgang ia jrao vaccine Cơvid 19 hlâo.

100 cô mơnuih blung a tlâ̆o pơgang mơguah lơ 26/4, truh ră anai ngă djơ̆ tơlơi pơtrun mơ̆ng Ding jum ia jrao. Djop mơnuih tơdơi kơ tlâ̆o krăp lăng hlâo mơ̆ng 30 mơnit truh 60 mơnit hŭi hơmâo tơlơi pơglăi sat, laih dơ̆ng brơi krăp lăng pơ sang anŏ amăng 7 hrơi dơ̆ng.

Tui hăng Gơnong bruă ia jrao Dak Nông, tal tlâ̆o vaccine anai, Dak Nông pơphun mơ̆ng lơ 26/4 truh lơ 12/5, pok pơhai ƀơi 8 boh anih. Ding jum ia jrao brơi kơ Dak Nông 9000 liêu vaccine tlâ̆o pơgang klin Cơvid 19 mơ̆ng anom bruă pơkra ia jrao AstraZenenca. Dak Nông amra tlâ̆o pơgang brơi kơ 2.844 čô dŏ mă bruă pơ anăp pơgang klin.

Nay Jek: Pơblang