VOV4.Jarai - Kơ bruă man pơdong plơi pla phrâo dong mơng thun 2018, samơ̆ ƀơi să Čư̆ Ni, tơring glông Ea Kar (Daklak), ră anai ăt hơmâo giăm 200 boh sang anŏ glăk yua gơnam dưm truă dăng hyu apui lơtrik sô hơđăp sui 15 thun anai laih. Yua kơ hrĕ dăng hyu - gong apui lơtrik sô hơđăp, yua anun apui lơtrik mă yua ƀu hơđong hăng ƀu pơhlôm rơnuk rơnua. Gơnam dưm truă sô ngă kơ apui lơtrik yua ƀu pơhlôm lăp ƀrô ngă kơ lu sang anŏ duh prăk apuih lơtrik lu mơng 2-3 wŏt pơhmu tơlơi hăng nua ră anai.

Hrĕ apui lơtrik tô mơng să Čư̆ Ni glăk pơ ƀut plơi mrô 4 plơi Quảng Cư 2 ataih giăm 2 km, hơmâo lu anih dăng hrĕ añĕ, griă; lu anih hrĕ pơklŏn ñing ñăng ƀơi hơdôm gong wĕ wŏ ƀudah kă mă hăng hơdôm phun kyâo. Ơi Bế Văn Viện, mơnuih ƀon sang ƀơi ƀut plơi mrô 4 plơi Quảng Cư 2, să Čư̆ Ni brơi thâo, hrĕ hăng gong apui lơtrik ƀơi anai lêng kơ yua hơdôm sang anŏ amăng plơi pla blơi, kă mă mơng thun 2005. Truh ră anai, gong phŏ laih, hrĕ ăt bring mơn ngă kơ apui lơtrik ba hyu ƀu kơtang. Amăng mông mă yua lu, măi pưh ngĭn ăt ƀu dưi đuăi, tivi ƀu thâo lăng, tơnă asơi ăt ƀu tơsă lơi…Yua anun bruă mă yua apui lơtrik aka ƀu pơhlôm hơđong, samơ̆ sang anŏ ñu hăng neh met wa amăng plơi lêng kơ duh prăk lu mơng 2-3 wŏt pơhmu hăng nua duh ră anai.

“Sang anŏ gơmơi hơmâo 5 čô mơnuih, rĭm blan kơnong yua apui kơđen hăng tơnă asơi đôč samơ̆ duh mơng 400.000 -500.000 prăk amăng ha blan. Hơdôm sang anŏ amăng să arăng duh rơbêh 2.000 prăk/1kw, ƀơi anai ƀing gơmơi duh mơng 4.000 truh pơ 5.000 prăk/1 kw, đa truh pơ 6.000 prăk. Neh met wa rơkâo gơnong bruă apui lơtrik tuh pơ alin djru pơkra ming dưm truă glăi mơng anun djru brơi neh met wa dưi mă hơđong hăng duh prăk gap ƀrô”.

Hrĕ apui lơtrik mơnuih ƀon sang kă mă hăng phun kyâo

Ơi Lê Văn Thưởng - Dŏ ƀơi plơi Quảng Cư 2, să Čư̆ Ni brơi thâo, plơi Quảng Cư 2 hơmâo 142 boh sang anŏ samơ̆ ha mơkrah amăng anun glăk yua hrĕ apui lơtrik sô hơđăp amăng hơdôm thun laih rơgao, lu hloh ƀơi hơdôm ƀut plơi 2 hăng 4. Ơi Thưởng brơi thâo, hrŏm hăng bruă duh prăk lu hơdôm anih dăng hyu hrĕ sô hơđăp lăng hŭi rơhyưt biă mă.

“Mơng thun 2005 -2006 neh met wa ƀơi but plơi 2 hăng 4 dưm truă hăng dăng hyu hrĕ mă pô hơmâo 4 ară kiăng kơ ba nao apui lơtrik truh pơ 15 -16 boh sang anŏ mă yua. Hrĕ apui lơtrik dăng mă pô ƀơi să glông mơng 1,7 -1,8 km ră anai ƀu pơhlôm kjăp dong tah. Amăng bơyan hơjan ƀing čơđai nao sang hră, neh met wa nao ngă hmua hŭi rơhyưt biă mă yua kơ hŭi apui lơtrik dưk, apui lơtrik mă yua ƀu hơđong”.

Tơdơi kơ sui thun, hrĕ apui lơtrik sô abih laih, apui lơtrik đuăi ƀu hơđong ngă kw neh met wa duh prăk lu ƀiă mơng 2-3 wŏt

Đơ đam să Čư̆ Ni tơring glông Ea Kar ră anai hơmâo 4.300 boh sang anŏ, đing nao ƀơi 23 ƀut plơi pla. Ơi Nhữ Minh Tuyến - Khua Jơnum min mơnuih ƀon sang să brơi thâo, ră anai dŏ 193 boh sang anŏ ƀơi ƀut plơi mrô 4, 8, Ea Sing 1 hăng Quảng Cư 2 khŏm duh prăk lu ƀiă pơhmu hăng nua duh ră anai mơng gơnong bruă apui lơtrik. Ba truh tơlơi anai anih pơđuăi apui lơtrik sô hơđăp laih. Kiăng kơ pơsir hĭ bruă anai kiăng kơ tuh pơ alin mơng ngăn drăp Kơnuk kơna.

“Kơ bruă 4 ƀut plơi pla khŏm duh prăk lu mơng gơnong bruă ƀing gơmơi aka ƀu hơmâo rơnoh prăk kiăng kơ tuh pơ alin yua kơ kiăng lu ngăn drăp ƀơi ƀon lan aka ƀu djop. Pơ anăp anai, ƀing gơmơi pơtô pơblang brơi neh met wa mă yua pơkrem, hơđong, ƀơƀrư̆  plih hĭ gong apui lơtrik. Sui thun pơ anăp ƀing gơmơi rơkâo djop gưl hăng dŏ tơguăn tuh pơ alin mơng gơnong bruă apui lơtrik kăng pơkra ming djơ̆ hăng tơlơi rơkâo mơng neh met wa”.

Siu Đoan: Pơblang