VOV4.Jarai - Lơ 16/11, ơi ia jrao Trần Thuận - Khua sang ia jrao tơring glông Krông Ƀuk, tơring čar Daklak brơi thâo amăng tơring glông phrâo hơmâo 6 čô mơnuih apăn bruă amăng Jơnum min mơnuih ƀon sang tơring glông Krông Ƀuk phrâo pơčrang lăng ƀă virus Sars-Cov2, amăng anun hơmâo 5 čô mă bruă ƀơi Anom bruă wai lăng lŏn mơnai glai rưng tơring glông Krông Ƀuk ƀă virus Sars-Cov2. Tơdơi kơ hmư̆ hing, Sang ia jrao tơring glông Krông Ƀuk hơmâo kiăo tui ĕp  pơčrang lăng ƀing mơnuih jê̆ giăm.

Kiăng kơ pơhlôm amăng bruă pơgang klin, anom bruă bơdjơ̆ nao hơmâo guang dar sa boh sang ƀơi anom bruă Jơnum min mơnuih ƀon sang tơring glông Krông Ƀuk yua bơdjơ̆ nao ƀing mơnuih ƀă virus Sars-Cov2. Ƀing mơnuih F1 hơmâo pơčlah tui tơlơi pơkă. Truh yang hrơi dong lơ 16/11, đơ đam tơring čar Daklak hơmâo 6.154 čô mơnuih ƀă klin Covid-19, amăng anun hơmâo 3.493 čô mơnuih pơjrao suaih hăng dưi glăi pơ sang.

Siu Đoan: Pơblang