VOV4.Jarai - Amăng hơdôm hrơi giăm anai hơmâo hơdôm pluh rơbâo čô mơnuih mơng hơdôm tơring čar kual Dơnung glăi pơ Daklak. Djop grup pơgang klin Covid-19 amăng ƀon lan hơmâo pơphun bruă tŭ yua soh, pơtô pơblang hăng kiăo tui lăng mơnuih ƀon sang ngă klă bruă pơgang klin mơng rĭm boh  sang anŏ.

Ƀuôn Hluk, să Ea Tiêu, tơring glông Čư̆ Kuin, tơring čar Daklak phrâo hơmâo giăm dua pluh čô mơnuih mơng hơdôm tơring čar kual Dơnung glăi pơ plơi pla, khŏm pơčlah mă pơ sang. Ơi Y Nguă Buôn Yă, khua grup pơgang klin Covid-19 ƀơi ƀuôn Hluk brơi thâo: grup ƀu djơ̆ kơnong pel ĕp, kiăo tui lăng mơnuih pơčlah pơ sang ƀudah pơčlah pơ tông thoa đang hmua đôč ôh mơ̆ ăt hyu pơtă pơtăn abih bang mơnuih amăng plơi pla anăm tơbiă hyu gah rơngiao, bưp pơ anai pơ adih ôh, ngă tui tơlơi pơkă 5K. Ơi Y Nguă hơmâo ană đah kơmơi hăng rơkơi ñu phrâo glăi mơng kual hơmâo klin ăt ngă tui anun mơn:

“Ană đah kơmơi hăng rơkơi ñu mă bruă pơ Bình Dương adih lơ̆m glăi truh pơ plơi pla hơmâo Jơnum min mơnuih ƀon sang să črâo brơi pơčlah 14 hrơi pơ sang, anai lĕ ƀu brơi tơbiă hyu gah rơngiao ôh, ƀu dưi pơbưp, jê̆ giăm hăng mơnuih jum dar. Dua rơkơi bơnai dŏ phara, pơčlah kơnong 2 rơkơi bơnai ñu đôč. Bơ braih, ia mơñum, gơnam ƀong tơdah kiăng amra iâu telephôn, ƀing gơmơi amra ba nao, samơ̆ ăt ƀu dưi jê̆ giăm hlơi”.

Grup pơgang klin Covid-19 amăng ƀuôn Hluk

Ƀuôn Hluk hơmâo giăm 150 boh sang anŏ samơ̆ hơmâo truh pơ 5 grup pơgang klin Covid-19 amăng plơi pla. Yua anun hơdôm tơlơi pơhing bơdjơ̆ nao klin hơmâo lăi pơthâo na nao mơng grup, neh met wa amăng plơi pla ăt kơđiăng ngă tui tơlơi pơkă 5k pioh pơgang klin. Sit biă ñu lơ̆m mơyut jôk, neh met wa pơphun tañ, aset mơnuih. Ơi Y Sách Bkrông, Khua ƀuôn Hluk brơi thâo:

“Tơdah hơmâo mơnuih ƀu hiam drơi jăn, djai hrơi anai pơgi amra ba nao dor mơnuih mơtăm. Neh met wa nao mơyut ƀiă đôč. Anai lĕ hơdôm tơlơi pơplih, kiăng kơ tañ, pơkrem, ƀu pioh amăng sui hrơi ôh. Yua kơ klin Covid-19 lar hyu laih dong bưp tơnap tap dong. Tơdah mơyut sui mơng 3-4 hrơi, amra mă yua lu prăk kak dong. Dua dong lĕ tơlơi pơmĭn kơ rĭm čô mơnuih, sang anŏ hơmâo hơdôm hơƀơ̆i yua hơdôm anun, adơi ayong rơnung djuai giăm dŏ glăi, ƀu pơƀut lu mơnuih dong tah”.

Tơring glông Čư̆ Kuin lĕ anih blung a amăng tơring čar Daklak hơđuh đĭ klin Covid-19 amăng plơi pla mơnuih djuai ania ƀiă. Tơring glông dưi ngă klă amăng bruă pơgang klin kman, hơkrŭ glăi tơlơi hơdip bơwih ƀong phrâo mơng rơnuč blan 8. Kiăng kơ mơnuih ƀon sang kơđiăng dong amăng bruă pơgang klin, hơdôm grup pơgang klin Covid-19 amăng plơi pla lĕ ƀing mơnuih jê̆ giăm, kiăo tui lăng, pơtô pơblang rĭm hrơi. Rĭm grup mơng 4-5 čô, hơmâo mơnuih arăng đăo gơnang amăng plơi pla, ƀing apăn bruă Ping gah, mơnuih mă bruă mơng hơdôm anom bruă, gong gai să: Ơi Y Min Êñuôl, Khua git gai Ping gah să Ea Tiêu, tơring glông Čư̆ Kuin brơi thâo:

“Pơpha rĭm čô mơnuih gơgrong wai amăng rĭm boh plơi pla. Hơdôm bruă mă hơmâo grup lăi pơthâo brơi Jơnum min mơnuih ƀon sang să, anom bruă Ping gah, plơi pla, tơdah plơi pla pơpă ƀu ngă tui kjăp kiăng kơ pơsir hĭ hmao tlôn. Grup pơgang klin amăng plơi pla mă bruă tơhrơi mlăm tlam mơguah mơtăm, yua anun bruă pơgang klin Covid-19 hơmâo ngă tui kjăp na nao”.

Akŏ pơdong grup wai pơgang klin amăng rĭm boh plơi pla mơtăm

Ơi Lê Thái Dũng, Khua git gai Ping gah tơring glông Čư̆ Kuin brơi thâo: Kơnong amăng ha wŏt hrơi tơjuh, tơring glông hơmâo rơbêh 1.000 čô mơnuih glăi mơng hơdôm tơring čar kual Dơnung. Amăng hrơi blan klin dŏ ngă tơnap tap, kiăng kiăo tui lăng kjăp dong, tơring glông hơmâo akŏ pơdong 547 grup pơgang klin Covid-19 amăng plơi pla. Ră anai grup pơgang klin Covid-19 amăng plơi pla glăk ngă klă hloh lơ̆m kiăo tui lăng, pơčlah mơnuih glăi pơ plơi pla.

“Akŏ pơdong 547 grup pơgang klin Covid-19 amăng plơi pla đơ đam tơring glông kiăng kơ pơpha mơnuih wai gak lu anih, rĭm grup pơgang klin Covid-19 amra wai mơng 20-30 boh sang anŏ đôč yua anun bruă pel ĕp, wai lăng, sit biă ñu mơnuih mă bruă glăi mơng hơdôm tơring čar kual Dơnung, mơnuih mơng kual hơmâo klin glăi amra gơnang nao hơdôm grup anai yơh. Tơring glông Čư̆ Kuin glăk pơpha mơnuih wai gak djop anih pioh pơgang klin, mơng plơi pla truh pơ să, tơdah tơnap kah mơng jao kơ tơring glông”.

Bruă akŏ pơdong grup pơgang klin mơng rĭm boh plơi pla, hăng hơdôm hơdră pơgang khut khăt, hơmâo pơgôp ngă kơ tơring glông Čư̆ Kuin amăng ha blan mơkrah laih rơgai ƀu hơmâo hlơi dong tah ƀă klin Covid-19 lar hyu amăng plơi pla.

Siu Đoan: Pơblang