VOV4.Jarai - Hrŏm hăng bruă djru brơi tơlơi hơdip mơda kiăng kơ adơi amai dưi pơđĭ kyar bơwih ƀong huă, djop gưl khul grup đah kơmơi tơring čar Daklak ăt gơgrong pok pơhai hơdôm bruă gum pơgôp kiăng kơ blơi hră pơhlôm nua ia jrao ƀơk brơi ding kơna tơnap tap. Bruă anai hơmâo djru brơi lu adơi amai amuñ tŭ mă tơlơi djru gum gah ia jrao, dưi khăm pơjrao, plai ƀiă hrŏ prăk duh lơ̆m nao khăm pơjrao tơlơi ruă pơ sang ia jrao.  

Tŭ mă hră pơhlôm nua ia jrao yua kơ khul pơlir hơbit đah kơmơi să ƀơk, amai Đặng Thị Bình, dŏ ƀơi ƀut plơi 1, să Ea Kpam, tơring glông Čư̆ Mgar, tơring čar Daklak ol kơdol. Amai Bình brơi thâo, sang anŏ ƀu hơmâo lŏn ngă hmua ôh, dua rơkơi bơnai ñu lêng kơ mă bruă arăng apah kiăng kơ čem rông 2 čô ană glăk amăng thun nao sang hră, amăng anun hơmâo 1 čô drơi jăn ƀu klă ƀu hiam. Hlâo anun aka ƀu hơmâo hră pơhlôm nua ia jrao yua anun lơ̆m dju djuam duam ruă, ñu ƀu khin nao khăm pơ sang ia jrao ôh yua kơ hŭi duh lu prăk. Mơng blan 9 thun anai, hơmâo khul đah kơmơi să ƀơk brơi hră pơhlôm nua ia jrao mă yua amăng 1 thun, ñu hơđong amăng pran jua ƀiă yơh.

“Sang anŏ gơmơi tơnap tap biă mă, hơmâo khul đah kơmơi să ƀơk brơi 1 pok hră pơhlôm nua ia jrao kâo pơpŭ bơni biă mă, hơmâo hră pơhlôm nua ia jrao anai tơdah kâo nao khăm pơjrao amra plai ƀiă duh prăk kak yua anun kâo hơđong amăng pran jua lơ̆m nao khăm pơjrao tơlơi ruă kă, huăi hŭi duh lu prăk dong tah”.

Rĭm thun djop gưl khul grup đah kơmơi tơring čar Daklak ƀơk brơi hơdôm rơtuh hră pơhlôm nua ia jrao kơ adơi amai sang anŏ tơnap tap

Hrŏm hăng amai Bình, thun anai hơmâo 55 čô ding kơna đah kơmơi pơkŏn amăng tơring glông Čư̆ Mgar arăng ƀơk brơi hră pơhlôm nua ia jrao. Yă Lê Thị Thu Hiền, Khua khul pơlir hơbit đah kơmơi tơring glông Čư̆ Mgar brơi thâo, bruă ƀơk brơi hră pơhlôm nua ia jrao brơi kơ ƀing đah kơmơi hăng ƀing čơđai sang anŏ tơnap tap hơmâo pok pơhai ƀơi ƀon lan amăng hơdôm thun giăm anai. Yua anun amra djru brơi adơi amai hăng ƀing čơđai dưi tŭ mă hơdôm tơlơi djru gah ia jrao, nao khăm pơjrao huăi duh lu prăk kak lơ̆m dju djuam duam ruă. Kiăng kơ bruă anai pơphun na nao, djop khul grup hơmâo lu bruă ngă phara kiăng kơ pơgôp prăk, hơmâo lu adơi amai ding kơna mut hrŏm.

“Bruă pơtrut pơsur pơgôp prăk hơmâo pơphun mơng hơdôm bruă mơng đah kơmơi anun lĕ hơbô̆ bruă duñ pơƀut get kơsu, hla pơ-ar, khul grup pơkrem ƀudah adơi amai pơtrut pơsur ƀing ding kơna đah kơmơi gum pơgôp tui tơlơi hơmâo hăng bruă anai hơmâo adơi amai mut hrŏm abih pran jua”.

Ƀu djơ̆ kơnong ƀơi tơring glông Čư̆ Mgar đôč ôh, bruă ƀơk brơi hră pơhlôm nua ia jrao hơmâo djop gưl amăng tơring čar Daklak pok pơhai hăng pơhư prong. Anun lĕ ƀơi să Ea Kao, plơi prong Ƀuôn Ma Thuột, grup đah kơmơi să hơmâo pok pơhai pơgôp prăk mơng bruă duñ pơƀut get kơsu, hla pơ-ar pioh kơ sĭ. Tui hăng yă Nguyễn Thị Tuyết, Khua grup đah kơmơi să Ea Kao, mơng thun hlâo truh ră anai, mơng bruă pơtrut pơsur adơi amai hyu duñ pơƀut get kơsu, hla pơ-ar pioh sĭ, grup hơmâo pơhrui glăi giăm 6 klăk prăk, mă prăk anai blơi 9 pok hră pơhlôm nua ia jrao ƀơk brơi ding kơna sang anŏ tơnap tap, mơnuih dju djuam duam ruă amăng să.

“Anai ăt lĕ sa amăng hơdôm jơlan hơdră yua kơ djop khul grup pơtrut pơsur anun lĕ duñ pơƀut get kơsu, hla pơ-ar kiăng ngă agaih jum dar laih dong ƀing gơmơi pơmĭn anai ăt lĕ bruă yôm phăn kiăng kơ djru brơi ƀing adơi amai sang anŏ tơnap tap”.

Pok lu bruă kiăng kơ pơgôp prăk djru blơi hră pơhlôm nua ia jrao, ƀing adơi amai hơmâo akŏ pơjing hyu mă bruă apah hăng kah mă prăk arăng apah pơgôp amăng keh prăk

Yă Trần Thị Phong, Kơ-iăng khua khul pơlir hơbit đah kơmơi tơring čar Daklak brơi thâo, bruă ƀơk brơi hră pơhlôm nua ia jrao kơ ƀing đah kơmơi sang anŏ tơnap tap hơmâo sa, dua boh tơring glông hăng khul grup pơphun mơng thun 2018 laih. Mơng anun djru brơi hơdôm rơtuh čô adơi amai dưi khăm pơjrao rĭm thun. Ƀuh anŏ tŭ yua mơng bruă anai yua anun djop gưl khul grup ăt hrăm tui hăng pok pơhai ƀơi ƀon lan. Sa, dua khul grup ngă klă ƀơi tơring glông Čư̆ Mgar, plơi prong Ƀuôn Hồ hăng Ƀuôn Ma Thuột. Kiăng kơ pok pơhai tŭ yua hăng tŏ tui na nao, djop anom bruă hơmâo ba boh tơhnal ƀơk hră pơhlôm nua ia jrao brơi kơ ding kơna tơnap tap jing hơdôm bruă amăng jơlan hơdră bruă amăng thun kiăng pơtrut pơsur adơi amai mut hrŏm, laih dong hơmâo lu tơlơi pơčeh phrâo kiăng jak iâu pơgôp djru brơi lu adơi amai.

“Bruă ngă mơng djop khul grup lĕ pơjing hơbô̆ bruă klă biă mă, pơhmutu anun lĕ duñ pơƀut glăi get kơsu, hla pơ-ar, mă bruă arăng apah tui grup kiăng kơ adơi amai hơmâo bruă mă hăng hơmâo prăk pơčuih kiăng kơ blơi hrăm pơhlôm nua ia jrao. Bruă mă hơmâo djop mơta, yua anun pơdah pran thâo gum pơgôp hăng thâo pơčeh phrâo mơng djop gưl khul grup, ƀing gơmơi ƀuh bruă anai kiăng pơtrut pơsur na nao”.

Bruă ƀơk brơi hră pơhlôm nua ia jrao brơi ding kơna tơnap tap mơng grup đah kơmơi ƀơi Daklak lĕ bruă mă yôm phăn biă mă. Ƀu djơ̆ kơnong djru brơi adơi amai thâo rơđah dong kơ tơlơi dưi lơ̆m yua hră pơhlôm nua ia jrao, plai ƀiă duh prăk kak lơ̆m nao khăm pơjrao tơlơi ruă đôč ôh mơ̆ ăt pơgôp djru brơi lu adơi amai dưi tŭ mă tơlơi gum djru mơng bruă ia jrao hăng khăm pơjrao tơlơi ruă kă, mơng anun amra hơmâo lu dong mơnuih yua hră pơhlôm nua ia jrao ƀơi ƀon lan.

Siu Đoan: Pơblang