VOV4.Jarai -  Amăng 2 hrơi lơ 4 hăng lơ 5/10, plơi prong Buôn Ma Thuột tơring čar Daklak čih hmâo 9 čô mơnuih dong ƀă Covid-19 akă rơđah mơng hơpă. Amăng mrô 9 čô mơnuih ƀă kơman Sars-CoV-2, hmâo 3 čô mơnuih ƀơi phường Tân An, mrô dô̆ glăi bơdjơ̆ nao pô ruă ƀơi să Hòa Thuận. Lăp đing nao lĕ 3 čô mơnuih amăng sa bôh sang anô̆ ƀơi thôn 4, să Hòa Thuận, rim hrơi bưp hăng lu mơnuih hăng hyu pơ̆ lu anih anom. Mơng hơdôm mơnuih ruă anai, khul apăn bruă hmâo thâo laih 3 čô mơnuih F1 test tañ ƀă kơman klin. Bơdjơ̆ nao anih klin ngă pơ̆ să Ea Kao dưi thâo lơ 28/9 phrâo rơgao, khul apăn bruă hmâo mă ia adung test tañ tal 3 kơ mơnuih ƀôn sang ƀôn Tơng Jŭ, hăng ƀuh hmâo dong 22 čô mơnuih ƀă kơman Sars-CoV-2./.

Siu H’ Prăk: Pô pơblang