VOV4.Jarai -  Tom brơi (19/8), tơring čar Daklak hmâo mrô mơnuih ƀă kơman Covid-19 lu hlol yap mơng hrơi hmâo klin ngă ƀơi tơring čar. Amăng mrô 56 čô mơnuih čih djă pioh hmâo 47 čô mơnuih amăng hơdôm mơnuih ƀă amăng plơi pla. Tui hăng Gơnong bruă ia jrao tơring čar Daklak, hơdôm mơnuih ƀă phrâo hloh mơng tơring čar, pơphun ƀơi ƀôn Kwang A, să Čư̆ Bao, plơi prong Buôn Hồ. Yap truh čơtlăm tom brơi, mrô mơnuih ƀă kơman Covid-19 amăng hơdôm mơnuih ƀă anai hmâo 46 čô mơnuih F0.

Ơi Nay Phi La, Khua Gơnong bruă ia jrao tơring čar Daklak lăi lĕ, bôh than klin ngă anai lĕ akă rơđah ôh. Kiăng pơsit djơ̆, khom hmâo dong tơlơi pơhing kơ ƀing mơgăt rơdêh nao pơ̆ Plah Tơsiong Čư̆ Bao. Yap truh akô̆ blan 7 truh ră anai, hmâo laih 6 bôh tơring glông, plơi ƀơi tơring čar hmâo hơdôm mơnuih ƀă kơman hơbit anai mơng 10 čô mơnuih hăng lu hloh. Amăng anun, plơi prong Buôn Ma Thuột hmâo 2 čô mơnuih lar tưp, abih bang 30 čô mơnuih. Plơi prong Buôn Hồ hăng hơdôm bôh tơring glông: Čư̆ Kuiñ, Krông Bông, Krông Pač, Mdrak, rim anih anom hmâo sa ƀut mơnuih ƀă, abih bang 155 čô mơnuih. Gơnang kơ hmao guang dar kual, hyu huĕt ĕp, pơčrang lăng, lu ƀut mơnuih ƀă ƀơi Daklak dưi pơgăn tơdơi kơ 14 hrơi guang dar./.

Siu H’ Prăk: Pô pơblang