VOV4.Jarai - Tui hăng Anom wai lăng tơlơi duam ruă tơring čar Daklak, yap truh lơ 18/11, đơ đam tơring čar hmâo tlâ̆o brơi laih rơbêh kơ 1 klăk 300 rơbâo liều vaccine pơgang Covid-19 amăng mrô 1 klăk 335 rơbâo čô mơnuih rơbêh kơ 18 thun. Kiăo tui anun, truh lơ 18/11, tơring čar Daklak dưi hmâo Ding jum ia jrao pơphra brơi 12 tal vaccine pơgang Covid-19, hăng 1.262.048 liều vaccine kiăng tlâ̆o pơgang brơi kơ mơnuih mơng 18 thun hăng luh hloh kơ anun.

Daklak hmâo laih 88,82% mrô mơnuih mơng 18 thun dưi tlâ̆o vaccine ară tal sa, mrô ară tlâ̆o tal 2 hmâo 10%. Tui hăng ơi Nay Phi La, Khua Gơnong bruă ia jrao tơring čar Daklak, kiăng pơhlôm tlâ̆o djop 2 ară vaccine pơgang Covid-19 kơ abih bang mrô mơnuih mơng 18 thun, hăng anăp nao tlâ̆o pơgang 80% mrô mơnuih ƀôn sang mơng 12 thun hăng luh hloh, pơ̆ anăp anai, tơring čar kiăng hmâo năng ai ñu 1 klăk 800 rơbâo liều vaccine. Ră anai đơ đam tơring čar hmâo 236 bôh anih anom tlâ̆o pơgang, amăng tơlơi kiăng hloh amra pơphun truh kơ 500 grŭp mơnuih tlâ̆o pơgang brơi năng ai ñu 200.000 čô mơnuih sa hrơi. Gơnong bruă ia jrao Daklak hmâo ba tơbiă laih kơčăo bruă rơđah kơ rim mơnuih kiăng lom vaccine glăi truh amra pok pơhai tlâ̆o pơgang hmao tlôn./.

Siu H’ Prăk: Pô pơblang