VOV4.Jarai - Bruă pơtrut hơmâo lu ƀiă dong mơnuih hơmâo hră pơhlôm nua mơnuih mơnam tui pran hor amăng tơring glông Lăk, tơring čar Daklak ba glăi lu tơlơi tŭ yua. Lu mơnuih ƀon sang hơmâo pơplih tơlơi pơmĭn hăng glăk pel ĕp, duh prăk amăng hră pơhlôm nua mơnuih mơnam tui pran hor.

Yă Đào Thị Vượng, 66 thun dŏ ƀơi ƀut plơi 1, tơring kual Liên Sơn, tơring glông Lăk, hlâo adih ngă nao pơtô, thun 2010 ñu pơdơi bruă samơ̆ dŏ kơƀah thun mă bruă kiăng kơ dưi ƀong prăk blan lơ̆m pơdơi bruă thun tha. Hơmâo ƀing apăn bruă gah hră pơhlôm nua mơnuih mơnam črâo brơi ñu tŏ tui duh prăk amăng hră pơhlôm nua mơnuih mơnam tui hluai pran hor kiăng kơ djop thun kiăng kơ dưi ƀong prăk blan lơ̆m pơdơi bruă laih anun ñu hơmâo ngă tui. Tơdơi kơ 5 thun duh tŏ tui dong amăng hră pơhlôm nua mơnuih mơnam tui pran hor, mơng thun 2016 truh ră anai, rĭm blan ñu hơmâo prăk apah rĭm blan, anai lĕ prăk pơhrui lơ̆m thun tha. Laih dong, lơ̆m dưi ƀong prăk blan lơ̆m pơdơi bruă thun tha ñu hơmâo wŏt thẻ hră pơhlôm nua ia jrao hăng rơnoh dưi duh brơi 95% lơ̆m nao khăm pơjrao tơlơi ruă. Yă Vượng brơi thâo:

Dong mơng hrơi dưi ƀong prăk blan lơ̆m pơdơi bruă thun tha  kâo ƀuh tơlơi hơdip hơđong tui, huăi bơngŏt đơi dong tah lơ̆m tha rơma, huăi gơnang nao ană tơčô, lơ̆m dju djuam duam ruă hơmâo hră pơhlôm nua ia jrao. Kơnuk kơna đing nao ƀing mơnuih thun tha hăng hơdôm hơdră djru tui anai kâo ƀuh klă biă mă.

Amai Lương Thị Tường Thi hơmâo ƀing apăn bruă hră pơhlôm nua mơnuih mơnam pơtô brơi bruă duh prăk blơi hră pơhlôm nua mơnuih mơnam

Amai Lương Thị Tường Thi, 34 thun, dŏ ƀơi să Dak Liêng brơi thâo: Hlâo adih ñu mă bruă ƀơi sa boh kông ti hăng hơmâo duh prăk amăng hră pơhlôm nua mơnuih mơnam tui tơlơi pơkă lơ̆m anun ñu pơmĭn kơnong ƀing mơnuih mă bruă amăng hơdôm anom bruă kơnuk kơna, anom bơwih ƀong sĭ mơdrô đôč dưi duh prăk amăng hră pơhlôm nua mơnuih mơnam kiăng kơ hơmâo prăk apah lơ̆m pơdơi bruă thun tha. Truh hrơi pơdơi bruă, hơmâo ƀing apăn bruă mơng hră pơhlôm nua mơnuih mơnam pơtô pơblang ñu tŭ ư duh prăk amăng hră pơhlôm nua mơnuih mơnam. Ñu brơi thâo, bruă kah mă ƀiă prăk duh amăng hră pơhlôm nua mơnuih mơnam tui pran hor ră anai, ngă kơ ñu lơ̆m tha rơma amra hơmâo prăk apah rĭm blan.

Ƀuh ƀing neh met wa nao mă bruă apah rĭm blan lơ̆m pơdơi bruă thun tha kâo ăt kiăng mơn lơ̆m tha drơi jăn ƀu găng añrăng, laih dong kiăn huăi gơnang nao ană bă đơi samơ̆ ăt hơmâo prăk apah rĭm blan. Samơ̆ kâo mă bruă tui hluai hor, ƀu mă bruă amăng anom bruă Kơnuk kơna samơ̆ ăt kiăng hơmâo prăk apah rĭm blan lơ̆m pơdơi bruă thun tha. Hơdư̆ ƀiă hlơi ƀong kâo kah mă ƀiă duh amăng hră pơhlôm nua mơnuih mơnam.

Ơi Vũ Văn Hải, Khua anom bruă hră pơhlôm nua mơnuih mơnam tơring glông Lak brơi thâo, mơng akŏ thun truh ră anai, tơring glông hơmâo 25 čô mơnuih duh prăk amăng hră pơhlôm nua mơnuih mơnam tui pran hor, đĭ tui mrô mơnuih duh prăk amăng hră pơhlôm nua mơnuih mơnam amăng tơring glông lĕ 530 čô. Mrô anai ăt dŏ aset pơhmu hăng tơlơi pơkă. Tui hăng ơi Hải kiăng kơ ngă klă hăng hơmâo lu dong mơnuih duh prăk amăng hră pơhlôm nua mơnuih mơnam, pơ anăp anai, hră pơhlôm nua mơnuih mơnam tơring glông tŏ tui pơtrut bruă pơtô pơblang tơl mơnuih ƀon sang thâo tơlơi dưi lơ̆m duh prăk amăng hră pơhlôm nua ia jrao tui pran hor. Laih dong, kơtưn amăng bruă lăi pơthâo kơ tơlơi dưi lơ̆m mut hrŏm amăng hră pơhlôm nua mơnuih mơnam ƀơi djop să, tơring kual hơmâo mrô mơnuih mut hrŏm dŏ aset; gum hrŏm kjăp hăng djop gơnong bruă, khul grup kơđi čar - mơnuih mơnam ƀơi ƀon lan pơphun lu dong jơnum pơƀut, tal hyu pơtô pơblang amăng plơi pla ….

Ƀing gơmơi amra pơtrut bruă pơtô pơblang tơl ană plơi pla hăng lu bruă mă sit nik, blung hlâo lĕ amăng plang pôr pơhing, dua dong lĕ ƀing gơmơi bưp ƀô̆ mơta mơnuih ƀon sang. Ƀing gơmơi ăt glăk hơmâo akŏ bruă jŭ yap glăi ƀing mơnuih amăng tơring glông dưi duh prăk amăng hră pơhlôm nua mơnuih mơnam tui pran hor laih anun ƀing gơmơi amra bưp lăi pơthâo, kah hăng pơtô pơblang ƀơi hơdôm anih anun lĕ sang čơ ƀudah ƀơi Jơnum min mơnuih ƀon sang djop să.

Hơdôm tơlơi gir run kiăng kơ hơmâo lu dong mơnuih mut hrŏm amăng hră pơhlôm nua mơnuih mơnam tui pran hor amăng tơring glông Lak amra ngă tŭ yua, pơgôp kiăng kơ anăp nao hơnong pơkă sui thun lĕ abih bang mơnuih lêng kơ hơmâo prăk apah rĭm blan lơ̆m pơdơi bruă thun tha hăng dưi bơwih brơi tơlơi suaih pral lơ̆m tha rơma.

Siu Đoan: Pơblang