VOV4.Jarai- Ayuh hyiăng glai klô le\ rơnoh pơkă [u tơnap ôh c\i ngă tui [ơi lu boh plơi pla amăng tơring ]ar Daklak lơ\m man pơdong plơi pla phrâo.

Khă hnun hai, [ơi tơring glông Krông Ana, rơnoh pơkă anai glăk jing tơlơi gun tơnap biă c\i yak pơgao h^ hăng sa, dua boh să, yua hơmâo lu sang pơkra [rik ngă mă hơjăn.

Kiăng pơsir h^, gong gai kơnuk kơna [ơi anai pơtrut kơtang laih bruă wai lăng, kho\m pơplih hơdră mă bruă mơng hơdôm anom bruă anai, kiăng ngă giong rơnoh pơkă ayuh hyiăng lo\n adai amăng jơlan hơdră kơnuk kơna man pơdong plơi pla phrâo.

Mơng guah bơyan không, ayuh hyiăng rơđah bơngac\, samơ\ [ơi [uôn Mblớt, să Ea Bông, tơring glông Krông Ana, Daklak ăt do\ gơnăm gơnot yua amruih mơng sang pơkra [rik.

Amai H’Loa Bkrông (djuai ania Êđê) [ơi [uôn Mblớt brơi thâo, giăm hơdôm pluh thun anai, ri\m hrơi sang ano\ gơ`u hri\p mă amruih, asăp mơng anih pơkra [rik, bơngot yua biă mă.

Phun kyâo jum dar sang ăt bơbec\ djơ\ mơ\n, phun pơtơi [u thâo bluh đ^ tah.

Jơlan nao rai amăng plơi amruih yua asăp ]uh [rik ngă

‘’Asăp mơng hơdăng pơtâo pưh rai tlep [ơi phun kơphê [u thâo c\uh pơnga dong tah, tap năng phun pơtơi [u anăm bluh đ^ lơi.

Bơ ayuh hyiăng hơ[ak jrak kơtang biă mă, neh met wa duăm ruă mơ-ai, ruă bơbrah kơsô| lu biă’’.

Bruă mă mơng hơdôm sang pơkra [rik ngă mă hơjăn [ơi tơring glông Krông Ana [u kơnong bơbec\ truh kơ phun pla đôc\ ôh mơ\, ngă bơbec\ kơ tơlơi suaih pral, hrơi hơdip mơda ri\m hrơi dong.

Hri\m hrơi, rơdêh pơgiăng lo\n [^ mơng hmua ba glăi pơ sang c\uh pơkra [rik, giong mơng anun dong pơdu\ nao [rik ba hyu s^ dong, ngă amruih kơthul kơtoai arăt jơlan Tơring ]ar 2, gah jơlan đuăi nao pơ să Ea Bông.

Amai Lê Thị Loan, pô s^ gơnam tam [ơi [uôn Mlớt, să Ea Bông, brơi thâo:

‘’Kâo s^ gơnam [ơi anai amăng lu thun laih, ri\m wơ\t amăng bơyan phang, rơdêh [ing gơ`u pơgiăng lo\n, [rik đuăi nao rai ngă kơthul, amruih soh tle\p amăng gơnam tam mơtăm.

Sang ano\ gơmơi kho\m krư\ bah amăng ri\m hrơi samơ\ ăt [u dưi pơgang glăi lơi, ha hrơi kơsot sang lu wơ\t gleh biă mă, bơ asăp mơng sang pơkra [rik dong pưh nao amăng sang, ngă sang ano\ gơmơi ruă brah rơkông đok na nao.

C|ang rơmang djo\p gưl ta` [iă djru brơi ană plơi [ing gơmơi pơsir h^ bruă [ơi sang pơkra [rik anai, tơdah [u pơsir bruă le\ [ing gơmơi gleh biă’’.

Sang ]uh pơkra [rik do\ giăm sang mơnuih [on sang do\ mơtam

Tui hăng tơlơi ju\ yap mơng anom bruă bơdjơ\ nao, [ơi tơring glông Krông Ana, Daklak hơmâo giăm 100 anih pơkra [rik, hăng rơbêh 250 boh sang c\uh [rik, ri\m thun hơmâo năng ai `u 250 klăk tơlo\ [rik.

Hơdôm boh sang c\uh [rik pơ[ut [ơi 3 boh să, kah hăng Ea Bông, Bình Hòa laih anun tơring kual Buôn Trấp.

Abih bang sang c\uh [rik [ơi anai lêng kơ c\uh mă hăng hơdăng [udah djuh, yua anun asăp, amruih kơtang biă, ngă hơ[ak jrak ayuh hyiăng kơtang, bơbec\ truh kơ tơlơi suaih pral, tơlơi hơdip mơda hăng bơwih [ong s^ mdrô.

Ơi Nguyễn Xuân Khu, Khoa jơnum mơnuih [on sang să Ea Bông, tơring glông Krông Ana brơi thâo, yua bruă ngă hơ[ak jrak ayuh hyiăng mơng hơdôm anih pơkra [rik.

Truh kơ ră anai, să ngă pơgiong laih 12/19 rơnoh pơkă, amăng 7 rơnoh pơkă do\ glăi le\ ayuh hyiăng lo\n dai le\ bruă tơnap hloh.

‘’Kơ bruă ayuh hyiăng lo\n adai le\ tơring glông glăk bưp tơnap tap biă mă yua dah [ơi anai hơmâo 41 boh anom bruă pơkra [rik hăng ai `u 165 anih pơkra glăk do\ mă bruă.

Amăng hrơi mông laih rơgao, Jơnum min mơnuih [on sang tơring ]ar hơmâo ngă hră git gai brơi pơdơi jăng jai mă yua lo\n ngă [rik, hơdôm anom bruă anai kơnong c\uh [rik mă mơng hlâo đôc\, abih le\ kho\m pơdơi yơh tui hăng hơdră phrâo mơng Kơnuk kơna’’.

Khă Jơnum min mơnuih [on sang Daklak hơmâo hră pơsit mơng blan 12 thun 2014 laih, pơdơi abih pơkra [rik hăng sang c\uh mă hơjăn [ơi tơring ]ar, samơ\ bruă anai ăt do\ hơmâo mơ\n.

Laih anun tui hăng tơlơi git gai mơng Jơnum min mơnuih [on sang Daklak, truh thun 2020 kah hơdôm boh sang c\uh pơkra [rik ngă hơ[ak jrak ayuh hyiăng mơng ngă giong bruă pơplih pơkra [rik man sang [u c\uh hăng apui dong tah.

Tui anun, [iă biă mă le\ 3 thun dong, hơdôm sang pơkra [rik c\uh hăng apui, c\uh amăng sang pơdong glông laih anun mă yua gơnam c\uh apui hăng khăng kah pơtâo ăt do\ hơmâo mơ\n, laih anun ngă hơ[ak jrak ayuh hyiăng dong mơ\n.

Tơlơi anai [u kơnong ngă bơbec\ sat kơ rơnoh pơkă man pơdong plơi pla phrâo đôc\ ôh mơ\, ngă bơbec\ kơ ayuh hyiăng, anih anom hơdip mơda hăng pơpla pơjing kơ mơnuih [on sang dong.

            Siu H’Mai: Pô ]ih hăng pôr