VOV4.Jarai - Tơlơi pơhing mơng Grŭp črâo ba pơgang, pơgăn klin Covid-19 tơring čar Daklak, amăng lơ 2/8, đơ đam tơring čar čih hmâo dong 25 čô mơnuih ƀă kơman Sars-CoV-2. 18 amăng mrô 25 čô mơnuih ƀă Covid-19 ƀơi Daklak čih pioh amăng sa hrơi hmâo bơbeč mơng ƀôn prong Hồ Chí Minh hăng tơring čar Bình Dương.

6 čô mơnuih dưi thâo amăng hơdôm kual dô̆ čơlah. Anai lĕ hơdôm mơnuih F1 mơng hơdôm mơnuih ruă hmâo pơsit hlâo kơ anun ƀơi tơring glông Ƀuôn Đôn, plơi prong Buôn Hồ hăng plơi prong Buôn Ma Thuột. Ăt amăng hrơi anun mơn, Daklak čih hmâo 1 čô mơnuih ruă ƀơi ƀut mrô 3, thôn 12, să Ea Kmut, tơring glông Ea Kar, pô mơgăt rơdêh mơng Sang bruă Dăng kông Con Đường Xanh. Pô anai akă rơđah tưp mơng hơpă ôh hăng hmâo gru nam đuăi hyu ƀơi lu anih anom hmâo klin ngă kah hăng Ninh Thuận, Bình Thuận, Phan Thiết, ƀôn prong Hồ Chí Minh, Đà Nẵng, Gialai. Tui anun, yap truh 5 mông čơtlăm lơ 2/8, tơring čar Daklak hmâo laih 265 čô mơnuih ƀă kơman Sars-CoV-2, amăng anun glăk dô̆ pơjrao 258 čô mơnuih, 7 čô suaih ruă laih hăng ƀu hmâo hlơi djai ôh./.

Siu H’ Prăk: Pô pơblang