VOV4.Jarai -  Lơ 29/9, tơdơi kơ hmâo 2 čô mơnuih ƀă klin ƀơi să Ea Kao, plơi prong Buôn Ma Thuột test tañ ƀă kơman Sars-CoV-2, Gơnong bruă ia jrao tơring čar Daklak hmâo pơphun tañ guang dar laih kual, hyu huĕt ĕp, mă ia khak, ia adung pơčrang lăng hơdôm mơnuih bơdjơ̆ nao. Truh mơmot hrơi tom brơi mơn, hmâo dong 17 čô mơnuih test tañ, djơ̆ kơman klin.

Mơnuih mă bruă ia jrao test tañ kơ mơnuih ƀôn sang ƀơi plơi Cao Thắng

Rơđah biă ñu, amăng mơguah lơ 29/9, ơi Q.V.T hăng bơnai ñu B.T.T dô̆ ƀơi plơi Cao Thắng, să Ea Kao, plơi prong Buôn Ma Thuột nao pơ̆ Sang ia jrao Đaị học Tây Nguyên pel ĕp tơlơi ruă. Ƀơi anai, tơdơi kơ test lăng tañ, wot dua gơñu leng kơ ƀă kơman Sars-CoV-2 sôh. Tui hăng mông hrơi rô hyu, mơng lơ 17/9 truh lơ 29/9, yă B.T.T hăng ơi Q.V.T nao hmua ƀơi ƀôn Tơng Jŭ, rô hyu hăng bưp lu mơnuih hăng lu anih anom, amăng anun hmâo sa dua anih anom ia jrao hăng anih sĭ mlia kơ phê... Pok pơhai hơdôm bruă pơgang, pơgăn klin ruă, khul apăn bruă hmâo guang dar kual sang dô̆ hăng hmua mơng sang anô̆ ơi Q.V.T hrom hăng hơdôm anih anom mơ̆ 2 rơkơi bơnah gơñu nao rai amăng hơdôm hrơi rơgao./.

Siu H’ Prăk: Pô pơblang