VOV4.Jarai - Tlam lơ 26/5, ơi Nay Phi La, Khua gơnong bruă ia jrao tơring čar Daklak brơi thâo, mơnuih ƀă klin Covid-19 mrô 3836 glăk pơjrao ƀơi Sang ia jrao ruă kơsŏ hăng hơtai boh glăk ƀơƀrư̆ suaih tui yơh. Hơdôm mrô pơkă lăng, pô anai hơmâo jôr drah phrâo, hơdư̆ mơñum jrao ngă hơđong amăng akŏ glô. Lơ 27/5 mơnuih ruă anai amra lui suă jua hăng mă hăng hing lăng amăng 2 hrơi pơ anăp anai amra brơi suă jua mă pô. Mơnuih ƀă klin Covid-19 mrô 3836 hơmâo Ding jum ia jrao ƀuh amăng lơ 15/5/2021.

Daklak hơmâo pơhrua dong 3 boh măi suă jua brơi kơ Sang ia jrao pơjrao ruă kơsŏ hăng hơtai boh

Tơdơi kơ 8 hrơi pơjrao ƀơi sang ia jrao ruă kơsŏ hăng hơtai boh tơring čar Daklak, pô anai arăng ƀuh ruă kraih, tơnap suă jua, đông drah. Laih anun ñu khŏm suă jua hăng măi, hơmâo pơjrao brơi ječ. Ƀơi anăp kơ tơlơi ngă tơnap tap yua hơmâo mơnuih ƀă klin, gơnong bruă ia jrao Daklak hơmâo pơƀut măi mok hăng pơpha 3 tal ơi ia jrao kiăo tui lăng lĕ ƀing ơi ia jrao mơng Sang ia jrao prong kual Dap kơdư truh pơ Sang ia jrao pơjrao ruă kơsŏ hăng hơtai boh kiăng kơ pơjrao suaih brơi pô anai.

Siu Đoan: Pơblang