VOV4.Jarai - Truh ră anai, 4/5 čô mơnuih ƀă klin Covid-19 lơm hơđuh đĭ tal 4 anai ƀơi Daklak dưi glăi pơ sang laih. Sit biă ñu, amăng 4 čô anai, hơmâo mơnuih ƀă klin Covid-19 mrô 3.836 ruă kraih khŏm suă pran hăng măi amăng hơtai boh. Bruă pơjrao suaih brơi pô anai ba glăi tơlơi đăo gơnang prong prin mơng ƀing ơi ia jrao amăng bruă pơgang klin Covid-19.

Djă hră pơ-ar brơi glăi pơ sang tơdơi kơ 41 hrơi pơjrao yua ƀă klin Covid-19, ayong V.Đ.D, thun tơkeng 1971, ƀơi phường Đạt Hiếu, plơi prong Buôn Hồ, tơring čar Daklak ƀu hơgŏm ôh pran jua hok mơ-ak hăng mơ-it tơlơi pơpŭ bơni kơ ƀing nai ia jrao, ơi ia jrao hơmâo pơjrao brơi kơ ñu amăng hơdôm hrơi laih rơgao. Ayong D. brơi thâo: Lơ̆m hmư̆ ñu ƀă klin Covid-19 ñu bral rơngal biă mă, bơngŏt hloh lĕ lơ̆m ruă kraih yơh. 1 wŏt hrơi tơjuh pơjrao hăng lu ia jrao, gơnam măi mok dưm amăng drơi jăn, đa ngă ruă bă drơi jăn, tơnap suă jua ngă kơ ñu hŭi biă mă. Samơ̆, hơmâo tơlơi pơalum mơng ơi ia jrao, ñu dưi găn rơgao hĭ mơng ruă kraih dưi glăi pơ sang anŏ.

“Lơ̆m suă pran hăng măi lơ̆m ruă kraih kâo bral rơngal biă mă, ăt hŭi dong mơn. Suă jua tơnap tap, samơ̆ hơmâo ƀing ơi ia jrao pơ alum pran jua kâo kah mơng dưi găn rơgao dưi pơjrao suaih. Rơngiao hăng bruă khăm pơjrao rĭm hrơi ăt djru brơi kâo gơnam ƀong huă, ia tơsâo rơmô mơñum dong. Kâo bơni biă mă ƀing nai ia jrao, ơi ia jrao pơjrao brơi kâo amăng hơdôm hrơi laih rơgao”.

Mơnuih ƀă klin Covid-19 mrô 3.836 amăng hơdôm hrơi ruă kraih

Ayong D lĕ mơnuih ƀă klin Covid-19 mrô 3.836 amăng lơ 15/5/2021.Ñu lĕ F1 kơ mơnuih ƀă klin mrô 3.052 ƀơi Thuận Thành, Bắc Ninh. Yua kơ ƀă djuai klin Covid-19 mơng India yua anun ñu ruă kraih. Ơi ia jrao Châu Đương, Khua sang ia jrao pơjrao ruă kơsŏ hăng hơtai boh tơring čar Daklak brơi thâo: Kiăng pơjrao brơi mơnuih ƀă klin mrô 3.836 anai sang ia jrao khŏm rơkâo tơlơi gum djru mơng ƀing ơi ia jrao mơng Sang ia jrao prong kual Dap kơdư hăng Sang ia jrao Chợ Rẫy mơng ƀôn prong Hồ Chí Minh hrŏm hăng gơnam măi mok gah ia jrao. Hrŏm hăng anun, rĭm hrơi, sang ia jrao ăt pơčrang lăng na nao brơi pô anai laih anun mơ-it nao mrô pơkă lăng brơi kơ Anom bruă pơjrao mơnuih ƀă klin Covid-19 dêh čar kiăng kơ hơmâo hơdră pơjrao brơi lăp djơ̆.

Tơlơi gir run mơng ơi ia jrao hơmâo ba glăi lu tơlơi dưi, truh lơ 17/6 mơnuih ƀă klin mrô 3.836 pơčrang lăng huăi ƀă virus SARS-CoV2 tal blung a. Truh lơ 25/6 tơdơi kơ 3 wŏt pơčrang lăng lêng kơ huăi ƀă klin, pô anai arăng brơi glăi pơ sang. Lăi nao bruă pơjrao mơnuih ƀă klin mrô 3.836 ơi ia jrao Châu Đương brơi thâo:

“Mơnuih ƀă klin anai lĕ sa amăng ƀing mơnuih ruă  kraih, pô anai ba rai pơjrao amăng lơ 14/5, 3 hrơi tơdơi anun ruă kơtang tui, mơnuih anai tơnap suă jua, pô anai hơmâo ƀing ơi ia jrao mơng Sang ia jrao prong kual Dăp kơdư brơi suă pran hăng măi laih anun jôr plih drah na nao. Truh 24 hrơi ƀing  ơi ia jrao mơng Sang ia jrao Chợ Rẫy rai gum djru brơi. Tơdơi kơ 7 hrơi pơjrao pô anai plai ƀiă yơh, ñu huăi jôr plih drah dong tah, huăi suă pran hăng măi. Mơnuih ƀă klin anai ruă kraih samơ̆ tơdơi kơ pơjrao ăt tañ suaih mơn”.

Mơnuih ƀă klin Covid-19 mrô 3.836 ƀơk bơnga pơpŭ bơni ƀing ơi ia jrao abih pran jua pơjrao brơi ñu amăng 41 hrơi hlâo anun

Ơi Nguyễn Văn Hùng, Kơ-iăng khua anom bruă ia jrao tơring čar Daklak brơi thâo, mơng hrơi klin Covid-19 hơđuh đĭ truh ră anai, Daklak găn rơgao 2 wŏt pơjrao brơi mơnuih ƀă klin Covid-19 hăng 8 čô mơnuih. Samơ̆ mơnuih ruă kraih kar hăng mơnuih ƀă klin mrô 3.836 lĕ ƀuh blung a ngă tơnap brơi gơnong bruă ia jrao Daklak. Lơ̆m gơnam măi mok pioh pơjrao mơnuih ruă dŏ kơƀah, ƀing ơi ia jrao aka ƀu kjăp amăng bruă pơjrao brơi mơnuih ƀă klin, bruă pơjrao suaih brơi mơnuih ƀă klin mrô 3.836 lĕ tơlơi ngă hok mơ-ak hăng ƀiong nai ia jrao ƀơi Sang ia jrao pơjrao ruă kơsŏ hăng hơtai boh laih dong anai lĕ kiăng ƀing ơi ia jrao thâo amăng bruă pơjrao brơi mơnuih ƀă klin:

“Hăng bruă dưi pơjrao suaih brơi mơnuih ruă kraih anai ba glăi lu tơlơi găn rơgao yôm phăn mơng ƀing ơi ia jrao. Sit biă ñu ăt hrăm gah pơjrao mơnuih ruă kraih 3 thun, samơ̆ aka ƀu ƀuh mơnuih ruă kơtang tui anai, aka ƀu pơjrao brơi hlơi yua anun aka ƀu thâo lơi. Mah ƀing ơi ia jrao mă bruă sui thun ăt thâo tui tơlơi hrăm đôč. Pơhmu tui lơ̆m mrô đĭ trun amăng măi khŏm thâo kiăng pơplih brơi lăp djơ̆. Anai lĕ tơlơi găn rơgao yôm phăn biă mă”.

Truh ră anai, Daklak hơmâo pơjrao suaih brơi 7 amăng 8 čô mơnuih ƀă klin amăng 2 wŏt hơmâo mơnuih ƀă klin. Hơdôm tơlơi gum pơgôp abih pran mơng ƀing nai ia jrao, ơi ia jrao lêng hơmâo tơlơi đing nao hmao tlôn kiăng kơ pơpŭ bơni amăng bruă pơjrao brơi mơnuih ruă kă.

Nam Trang: Čih

Siu Đoan: Pơblang