VOV4.Jarai - Jơnum min mơnuih ƀon sang tơring čar Daklak phrâo hơmâo hră pơ-ar kơ bruă ngă lông lăng lơ̆m brơi mơnuih ƀă klin Covid-19 glăi pơ sang tañ ƀiă lơ̆m tlâ̆o 2 ară vaccine hăng pơčrang lăng huăi ƀiă klin dong tah. Tui anun, Jơnum min mơnuih ƀon sang tơring čar brơi: tơdơi kơ 7 hrơi dong mơng hrơi pơčrang lăng huăi ƀă klin hăng RT-PCR ƀơi sang ia jrao, ƀing mơnuih F0 hơmâo tlâ̆o laih 2 ară vaccine, amra brơi glăi pơ sang pơjrao pơhrua dong.

Buôn Ma Thuột - Daklak glăk ngă lông lăng kơ bruă pơjrao brơi mơnuih F0 pơ sang

Blung hlâo, bruă anai hơmâo pơphun ƀơi ƀon lan hơmâo wai lăng, pơjrao brơi mơnuih F0 pơ sang, hăng git gai ngă tui hăng ƀing F0 ƀu mưn ră amăng drơi jăn ƀudah ruă rơnang. Jơnum min mơnuih ƀon sang tơring čar jao Gơnong bruă ia jrao črâo ba, pel ĕp, wai lăng bruă anai ƀơi djop sang ia jrao, ƀon lan kiăng pơhlôm brơi djơ̆ tơlơi pơkă.

Siu Đoan: Pơblang